Ezéchiel 6 - Ma Zhiklè

Jérusalem a ndi na hèshèkèɗ

¹ Ndo nzi pèc pècèk a ngaɗayè ar haha:

² Ka ndo, pu di man a zahi Israel, a ka hod ma a géɗ tengaʼa.

³ Ka gaɗa: Zahi Israel, va-tsena ma Bi Zhiklè Ndo nzi pèc pècèk! Bi Zhiklè Ndo nzi pèc pècèk a goɗ a géɗ zahi a ngègèɗhi a slratshi a nkulgodokihi ar haha: Na haha i da zlindè tsakwal a sam kinè, a i gedassa sam mvi skwi a Zhiklè kinè a géɗ za.

⁴ Sam mvi skwi a Zhiklè kinè sèi da gedas ta, a mblomhi kinè sèi ta zukde ta a hai.

⁵ I da wusheda nckondohi Israel a sam skwi mbèh skwi ta, a i ksarda vatasl ta a tsagi sam mvi skwi a Zhiklè kinè.

⁶ A sam kinè tèlèba kokwarhi ta da ndi ta a hèshèkèɗ; a sam mvi skwi a Zhiklè sèi da gedas ta, a ta ndev ta. Mblomhi kinè sèi ta zukde ta a hai; skwi man kin gu a ri kinè da ze na.

⁷ Ndohi ta da bèzl ta a sam kinè, a kin da suna, i Ndo nzi pèc pècèk.

⁸ Aman i da jèkeda ndohi ngiɗè kètè, te ndev kinè, ta da mbél ta auda a sam tsakwal, aman i da venda kinè gèɗ a kokwar tsaɗ tsaɗ.

⁹ Ndohi kinè man ta da mbél ta, ta da héryè te ndev ndohi nte deɓa, te kokwar man i de ta a pa, man i gedassama ta ndav man a hér mʼmbèh skwai a ta kwolyè, a i gedassa di ta man ta wèr vri a mʼmbèh skwi a vna. Skwi man ambaɓi tèlèba man ta gau, man ta gu skwi hori a sam ga, a da ndara ta;

¹⁰ a ta da suna, i Ndo nzi pèc pècèk. Matakwan haha man i guv ta a vna, ambali ka ɓai.

¹¹ Gar haha Bi Zhiklè Ndo nzi pèc pècèk a gaɗa: Tsu ri pèsl-pèslèʼa, gotseda sak dak-dakwaʼa! Gu wobau a géɗ hori ndohi Israel tèlèba man ta dè bèzl ta te ri tsakwal.

¹² Ndo man dra, gidiɓèr a cè a ma. Ndo man ndul ndul, tsakwal a kéɗèʼa. Ndo man njèkaha, a tiɗè a mai. I pra ta ndzoan a gèɗ tèlèba.

¹³ A kin da suna, i Ndo nzi pèc pècèk, aman nckondohai tengaʼa ta zhè a skwi mbèh skwi ta, a tsagi vri ta, a géɗ za tèlèba, te ncèlökwöm za tèlèba, a verzi wof ndizlimaʼa tèlèba, a verzi gètèl wof, a sam man ta ndara ta skwi a zhiklèhi mbèh skwi tengaʼa, aman ambaha ta.

¹⁴ I da tara ta ri a dai, i da ndeda kokwar tengaʼa a hèshèkèɗ, a tazli hèshèkèɗ, a ta da suna, iyè Ndo nzi pèc pècèk.