Ezéchiel 5 - Ma Zhiklè

¹ Ka, ndo, co kafahi gwèsh ntaslaʼa. Fu a pidök a ka she gèɗ ngaya, a bozozom ngaya, a ka co skwi nlivè skwai a ka livè gwots gèɗ a vna. Kezla te va makar,

² ngiɗè ka fa na vogwa te ndev kokwar, a pats man nʼnzi a ma kokwar klèng. Ngidè ratsaʼa a kafahi gwèsh a ka ksarda a der kokwar tèlèba. Ngidè wusheda na ma kozlar. I woy a i da bazl ta ndohi a tsakwal.

³ Aman manda gwots kèshkata a ma maslaka ngaya.

⁴ Te va gwots kèshkata, hul kètè zaʼa a ka wusheda a vogwa, a vogwa a ndiaʼa.

Jérusalem a gédèshè èhèmè?

⁵ Bi Zhiklè Ndo nzi pèc pècèk a goɗ ar haha: Jérusalem a da gi aranta: I feda Jérusalem a ndev ndohi herkeda, a nda kokwarhi man a tsagiaʼa.

⁶ Te man nengaʼa a ngu mèdègèɗ, a ta tawaɗaha ma kita ga, a shèwa a fena ndohi nte deɓa. A ta kwola ma nkwèr ga, ta dzadzara bai, a fena ndohi te kokwar man a tsagiaʼa.

⁷ Gar haha Bi Zhiklè Ndo nzi pèc pècèk a gaɗa: A géɗ man kin gu mèdègèɗ a fena ndohi nte deɓa man ta zhè a tsagi kinè, a kin dzodzor ma nkwèr ga a ma kita ga ɓai, a kin dzodzor ma kita ndohi nte deɓa man ta zhè a tsagi kinè,

⁸ i gi kita ngaya, Jérusalem, a sam ngaya, a sam di ndohi nte deɓa tèlèba. I gi a mayam ngaya, Jérusalem!

⁹ I ga ka skwi ara man i ga ka halaʼa ɓai, a ma ma ba i da gi arsa azɓai, a géɗ skwi hori tèlèba man ka gau.

¹⁰ Te deɓaʼa bab wudahi te ndev kinè, ta da nde ta wudahi ta a ma, a wudahi ta da ndi babhi ta a ma. I woy a i gi kita te kokwar ngaya, a njèkèɗi ndohi ngaya ta wushede ta a ma kozlar.

¹¹ Gar haha, ara man a vava i zhè, Bi Zhiklè Ndo nzi pèc pècèk a gaɗa, a géɗ man ka lizhè sam ga nkezlaʼa a skwi mbèh skwi man hori te pa, i ba i woy a i kwol ka, i woy a i pi di mwoy-ndo azɓai, ta siyè te va azɓai.

¹² Ndohi ngaya i kezla makar; ngiɗè gidiɓèr a da hel ta ma, man ɓai ta da tiɗ ta a mai; ngiɗè ta bèzl ta a tsakwal; ngiɗè i da wushede ta a ma kozlar, a tsakwal a dzadzar ta.

¹³ Aranta i rufa ndzoan ga, a i manda ndav ga a hai a sam ta. I gi srak. A ta da suna, iyè Ndo nzi pèc pècèk, i goɗa a ndav.

¹⁴ I woy a i ndeda kokwar ngaya a hèshèkèɗ, a kokwar man a tsagi ngaya tèlèba, a sam di ndohi tèlèba man ta bizhè a pa.

¹⁵ Ndohi nte deɓa man ta zhè a tsagi ngaya ta da dérdèʼa, ta ngwossaha, ta ngècè maya te pa, ta rzl ta, aman i da gi kita, a ndzoan, a ndav.

¹⁶ Aman i da ɓar ka a sulom mai a i gedas ka, a i ɓar kinè a i gedas kinè, a mi a ga kinè a ma ma, a i cèma kinè movar auda te ma,

¹⁷ a i pra kinè mai a skwi dak a va, a ta parama kinè wud kinè, a gidiɓèr a ndo nkeɗa ndo a tsakwal a zhè te ndev kinè. Iyè Ndo nzi pèc pècèk, iyè a ngoɗa.