Ezéchiel 44 - Ma Zhiklè

Ntamagi te civèɗ mvèng pats

¹ Te deɓaʼa a ndiyè a deɓa a ntamagai sam nkezlaʼa, man a zhè te civèɗ mvèng pats. Mpizlèʼa.

² Ndo nzi pèc pècèk a ngaɗayè: Ntamagi haha da pizlèʼa, ndo da wina ɓai, ndo da beza a pa ɓai, a gèɗ man Ndo nzi pèc pècèk, Zhiklè Israel, a mbeza a pa a vna. Gar haha da pizlèʼa.

³ Sèi kra bai, da nzahi a haha, a gèɗ man a gi bai, aman a ndi skwi nʼndi man a va na Ndo nzi pèc pècèk a sam nengaʼa. Da beza a civèɗ mozodo gi Zhiklè, da shkè auda a civèɗ man a ndo a pa a vna.

Ndohi mvi skwi a Zhikiè a ndohi Lévi

⁴ Te deɓaʼa a ndiyè a ntamagi te civèɗ man a géɗèʼa, a ma gi Zhiklè. Aman i pu dai, na haha nʼnjèl Ndo nzi pèc pècèk a nʼndha gi Zhiklè. A i kalahi a deɓ sak nengaʼa.

⁵ Aman Ndo nzi pèc pècèk a ngaɗayè: Ka ndo, wor zuraʼa, pu dai, fu zlembaɗ a ma tèlèba man i gaɗa ka a gèɗ ma kita, a ma nkwèr gi Zhiklè. Fu zlembaɗ a gèɗ skwi tèlèba man i gaɗa ka a géɗ ndè a gi Zhiklè, a géɗ mshkè auda te sam nkezlaʼa.

⁶ A ka gaɗa ta ndohi Israel, ndohi mèdègèɗ: Bi Zhiklè a goɗ aranta: Skwi hori kinè man kin giaʼa, ndohi Israel, dèʼay ma!

⁷ Kin va ta civèɗ a ndohi man verzi ta tsaɗ, ndohi man ngwon nʼngel ɓai, man ta ngwoda ndav ta ɓai, a ta shkè a sam ga nkezlaʼa, a ta dérɗèʼa, aman kin vau skwi nʼndi ga mbeza a Pombaz. Aranta kin pra nderzlè-ma ga, a skwi hori kinè tèlèba.

⁸ A kin fa na gèɗ a mizlinè ga nkezlaʼa ɓai; kin va ta a ri ndohi ngiɗè, aman ta gi mizlinè a sam ga nkezlaʼa.

⁹ Gar haha Bi Zhiklè a gaɗa: Ndo man verzi na tsaɗ, ko wawa, man a ngwoda ndav na bai, man ngwon ta nʼngel bai, da shkè a sam ga nkezlaʼa bai, ko ndo wawa, man a zhè te ndev ndohi Israel.

¹⁰ Aman ndohi Lévi, man ta jèkyè, te va man Israel a nzlak na, a mdo a verzi skwi mbèh skwi nlizhèʼa, sèi i ga ta kita a gèɗ.

¹¹ Tengaʼà ta da ɓir ntamagai a sam ga nkezlaʼa, a ta gi mizlinè te gi ga. Tengaʼa ta da ndaray skwai, a ta zlay skwai man ndohi ta hulkoyè, a tengaʼa ta da zlècè a sam ndohai, ta takaha ta.

¹² A géɗ man ta takaha ta a sam skwi mbèh skwi nlizèʼa, a ta ga a skwi man a slafadama ta sak a ndohi Israel, a ta gu malai. Gar haha i gidè ri ga a géɗ tengaʼa, Bi Zhiklè a gaɗa, a i ga ta kita a gèɗ.

¹³ Da shkè a sam ga, aman ta gi mizlinè a sam ga bai, da herda na va a sam ga nkezlaʼa bai, a sam skwi nkezli nkezlaʼa. Nasa mali ta a géɗ skwi hori man ta gau.

¹⁴ Gar haha i pe ta a ndohi mɓer ma nkwèr gi ga, a géɗ mizlinè te gai, a skwi tèlèba man ta da gia te pa.

¹⁵ Aman ndohi mvi skwi a Zhiklè Lévi, te verzi Tsadok, man ta dzodzor ma nkwèr ga a sam nkezlaʼa, te va man ndohi Israel ta zlak ta a sam ga, tengaʼa ta da herdekay va, a ta gi mizlinè ga, a ta shkè a sam ga, aman ta vay mbeza a Pombaz, Bi Zhiklè a gaɗa.

¹⁶ Tengaʼa ta dè a sam ga nkezlaʼa ta da herda va a table ga, man ta gi mizlinè ga. Ta da jèjèr ma nkwèr ga.

¹⁷ Aman ta da bizhè a ntamagi sam nʼngalaʼa tʼhwaɗaʼa, sèi ta vi maslaka bata a va, maslaka gwots tambak ka bai, a ta dè a sam ga nʼngalaʼa a ta gi mizlinè te gi ga.

¹⁸ Ta pèdè gèɗ a maslaka bata, a ta vi maslaka bata a verzai. Ta vi skwi man a paha ta vazaza azɓai.

¹⁹ Aman ta shkè auda a sam nʼngalaʼa tʼuda, a sam ndohai, sèi tasuɗko maslaka man ta gu mizlinè a vna auda a va, man bai maslaka tengaʼa nkezlaʼa a da ngwoda ta va a gèɗ a ndohi ngiɗè.

²⁰ Ndohi mvi skwi a Zhiklè da sha gèɗ kurzl bai, da za dzuvda a pa bai, aman da ɓatsaʼa.

²¹ Ndo mvi skwi a Zhiklè da su zom bai, aman a dè a sam nʼngalaʼa tʼhwaɗaʼa.

²² Ndohi mvi skwi a Zhiklè man ta cè ngwoz, ngwoz mazi ka bai, ngwoz man ndo ngiɗè a nkwola ka bai, sèi bidalai te verzi ndohi Israel, man bai ngwoz ndo mvi skwi a Zhiklè ngiɗè man a mets na.

²³ Ta da senda ta ndohi ga, aman ta sun nɗèlè te va skwi nkezlaʼa a skwi nkezlaɓiaʼa, te va skwi nlizhèɓiaʼa a skwi nlizhèʼa.

²⁴ Aman ma a zhè, ta slalia a ta bèzlè kita. Ta da gi kita ara ma ga, ta da jèjèr ma kita ga, ma nkwèr ga, a ta gi ngolala ga a ta slébèrdè pats nshèk va ga.

²⁵ Ndo mvi skwi a Zhiklè a dè a sam ndo mʼmetsaʼa azɓai, man bai a lizhè va na. Sèi a sam bab na a mam na, kra man bai demaʼa, kramam na man bai demam na, man baki ta az di bai. Te pa a slalia a ndè a pa, ko a lizha na va.

²⁶ Te deɓ man ntila va na ma, sèi ta ngrè mʼmèn 7.

²⁷ Te deɓaʼa man a dè a sam nkezlaʼa zaʼa, a sam nʼngelaʼa tʼhwaɗaʼa, aman a da gi mizlinè a sam nkezlaʼa, da vau skwi a géɗ mali na, Bi Zhiklè a gaɗa.

²⁸ Skwi nʼndi gi tengaʼa ngiɗè azɓai, sèi iyè. Ncèkè ta te Israel azɓai, te man skwi man i va ta, iyè.

²⁹ Tengaʼa ta da ndi movar ndohi man ta va na Zhiklè, skwi a géɗ malai, a géɗ mphömè; skwi man a Zhiklè, man ndohi Israel ta slalia ta ngè-cè bai, a tengaʼa.

³⁰ Tsuvomhi skwai, te skwi tèlèba, skwi man ta ngotskoɗauda tèlèba a ta geda na Zhiklè, sèi ndohi mvi skwi a Zhiklè ta ngècèʼa. Skwi mbelaʼa te mɓelaslaslaʼa, va-va ta ndohi mvi skwi a Zhiklè, a mpshè ma a zhè a géɗ gihi kinè.

³¹ Aman zluèɗ nhuslaʼa, man bai zluèɗ man skwi dak ncizlaʼa, ko wotsak, ko ɗiakihai, ko skwi sak faɗ, ndohi mvi skwi a Zhiklè da ndu ɓai.