Ezéchiel 43 - Ma Zhiklè

Nʼnjèl Zhiklè a nʼndha gi Zhiklè

¹ Te deɓaʼa a ndiyè a ntamagai man a zhè te civèɗ mvèng pats.

² Na haha nʼnjèl Zhiklè Israel a mshkè te civèɗ mvèng pats, a hèzlèwè ara kuɗ iyam mbiaʼa. Gèɗ herkeda nhela a géɗ nʼnjèl nengaʼa.

³ A skwi man i rka te nshunè haha, lèmèlèmè ara skwi man i rkaʼa, aman Zhiklè a mshkè a ngédèshè kokwar Jérusalem. Kiki man i rkaʼa, lèmèlèmè ara man i rkaʼa a ma woyam Kebar. A i kalahai a deɓ sak nengaʼa.

⁴ A nʼnjèl Ndo nzi pèc pècèk a mbeza a ntamagai te civèɗ mveng pats, a ndo a sam nkezlaʼa.

⁵ Mèzhèɓ a ndiyè a géɗèʼa, a ndiyè a gala tʼhwaɗaʼa. Na haha gi Zhiklè nʼndha a nʼnjèl Ndo nzi pèc pècèk.

⁶ A i tsena ngèɗè man a gadkayè te gi Zhiklè; ndo a nzlatsa a sam ga,

⁷ a ngaɗkayè: Ka ndo, ka rka sam nʼnzi bi ga, a sam nfi sak ga, man i woy a i nzi te ndev Israel. Ndohi gi Israel ta da dérɗè nzlembaɗ ga nkezlaʼa a ma asaɓai a mali ta, ko tengaʼa, ko bihi ta. Ta dérzlè ntamagi gi dzavi ta a ntamagi gi ga asaɓai,

⁸ man ta gau, aman ta derzla gi dzavi ta a gi ga. Zlazlar te ndev nga cèw a kezle nga genè. Ta derde nzlembaɗ ga nkezlaʼa a skwi hori man ta gau, ha i gedas ta a ndzoan ga.

⁹ Aman antanta ta da jèkeda mali ta, a ta da hela na nckondo bihi ta auda a sam ga. Te deɓaʼa i woya a i nzi a sam ta a mèdèp.

¹⁰ Aman ka, ndo, ngreda ta gi Zhiklè haha a ndohi gi Israel; ngi na, a skwi man ta lèmdè a vna.

¹¹ Pa ta hori a di a géɗ skwi tèlèba man ta gau. Vèheda gi Zhiklè a pa, a kolongwi na tèlèba, a ntamagi man ta shkè auda te pa, a ntamagi man ta dè a pa, a va gi tèlèba. Ngra ta ma nkwèr a ma kita Zhiklè tèlèba, Windo a sam di ta, aman ta da jèjèr ma nkwèr nengaʼa a ma kita nengaʼa zuraʼa.

¹² Na haha ma nkwèr a géɗ gi Zhiklè: A géɗ za, sam man a tsagi nengaʼa tèlèba, da nda a sam nkezli nkezlaʼa. Na haha ma nkwèr a géɗ gi Zhiklè.

Sam mvi skwi a Zhiklè

¹³ Na haha nlivè sam mvi skwi a Zhiklè; a tsi ri, man ta livèʼa, lèmèlèmè ara matsa. Sakaʼa, ngur nengaʼa, a tsi ri 1, nguzlohaʼa a tsi ri 1. Skwi mveɗkaɗ na a pa a maʼa, ara hwaɗ ri staɗ.

¹⁴ Nasa ngurèʼa: a hinè te sak tʼherkeda, ha ndè a sam nʼngalaʼa nshèlèkuraʼa, te godok, a tsi ri cèw; nguzlohaʼa a tsi ri 1. A hinè a sam nengaʼa nkèshèʼa, ha ndè a sam ngiɗè mbiaʼa, ngurè nengaʼa a tsi ri 4; nguzlohaʼa a tsi ri 1.

¹⁵ Skwi nte ndevaʼa a tsi ri 4. A gèɗ skwi nte ndevaʼa, dromhi 4 a pa.

¹⁶ Skwi nte ndevaʼa, ngurèʼa a tsi ri 12, nguzlohaʼa a tsi ri 12, tsagi 4 lèmèlèmè.

¹⁷ Sakaʼa mbiaʼa, ngurè nengaʼa a tsi ri 14, nguzlohaʼa 14, civèɗ 4 lèmèlèmè. Ma man ta pa na a deɓa, a tsi ri rètaʼa. Sakaʼa a tsi ri 1. Skwi ntivè a pa te civèɗ mvèng pats.

¹⁸ Bi Zhiklè a ngaɗayè: Ka ndo, Bi Zhiklè a goɗ ar haha: Na haha ma nkwèr sam mvi skwi a Zhiklè, a pats man a da gau, a ta da feda skwi man ta ndara na Zhiklè a pa, a ta gucèɗa pombaz a pa.

¹⁹ Ka da pe ta ndohi mvi skwi a Zhiklè te Lèvi (te verzi Tsadok man ta herda va a sam ga a ta gi mizlinè ga, Bi Zhiklè a gaɗa). A géɗ mpil gèɗ mali ta, kra mari staɗ.

²⁰ Ged pombazaʼa a dromhi 4, a zlogomhi 4 a sam sakaʼa te géɗèʼa, a sam man ta pa na a deɓa. Aranta ka da cè na mali auda, a ngècè skwi mpil gèɗ.

²¹ Te deɓaʼa co kra marai, a ta fa na vogwa a sam nte gai man ta tila a géɗ nengaʼa; a sam nkezlaʼa ka ɓai.

²² Pats macecèwaʼa ka da vi mazawal nsuɗekɗekaʼa, a géɗ malai, a ka cè na mali auda a sam mvi skwi a Zhiklè, lèmèlèmè ara marai, a nce na mali auda.

²³ Aman malai nca ma, ka vi marai, nsuɗekɗekaʼa, a drok, nsuɗekɗekaʼa, te va rèwè skwi.

²⁴ Ka va na Ndo nzi pèc pècèk. Ndohi mvi skwi a Zhiklè sèi ta bsoma a boma, a ta ndara na Ndo nzi pèc pècèk.

²⁵ Arsa ka zli mazawal staɗ, pèc pècèk, a gèɗ malai, mʼmen 7. A ta zli kra marai a drok te va rèwè skwai, cèw cèw ba nsuɗekɗekaʼa,

²⁶ a skwi mpil gèɗ; a ta til sam mvi skwi a Zhiklè, a ta pi a mizlinè.

²⁷ Aman mʼmèn 7 klèng, a pats matsamakaɗaʼa, a patshi man a ma, ndohi mvi skwi a Zhiklè ta da ndèr skwi kinè, a ta vi skwi kinè te nshid gèɗ, a gèɗ sam mvi skwi a Zhiklè. A i da va kinè pombai, Bi Zhiklè a gaɗa.