Ezéchiel 42 - Ma Zhiklè

¹ Te deɓaʼa a ndiyè a sam nʼngalaʼa tʼhwaɗaʼa, a civèɗ ndè a géɗèʼa. A ndiyè a sam gihai, zuraʼa a dalmagai, zuraʼa a gi man a géɗèʼa.

² Ngur nengaʼa a tsi ri 100, te civèɗ man a géɗèʼa, nguzlohaʼa a tsi ri 50.

³ Zuraʼa a ma sam nʼngalaʼa man a tsi ri 20 sa, a sam ndizlèʼa te gi nʼngalaʼa tʼuda, civèɗ a zhè, ngiɗè a géɗ ngiɗè, sak makar.

⁴ Tʼhwaɗaʼa a samaʼa, civèɗ a zhè, a ntamagiaʼa, nguzlohaʼa a tsi ri 10. Tèlèba te man a géɗèʼa ngurèʼa a tsi ri 100.

⁵ Gihi te géɗèʼa, nkè-shèʼa, mba nte godok a nte ndevaʼa, te man civèɗ ndè a pa a ngela samaʼa.

⁶ Gihi makar, ngiɗè a géɗ ngiɗè, sak gi ta azɓai, az ara gihi nʼngala bai man sak ta a zhè. Gar haha sam nʼngalaʼa a sam gihi te godok a nte ndevaʼa.

^7-8 Dergi tʼuda, a ma gihi sa, zuraʼa a gi nʼngalaʼa tʼuda, ngurèʼa a tsi ri 50. Gihi zuraʼa a sam nʼngalaʼa tʼuda, ngurèʼa a tsi ri 50. Aman te civèɗ gi Zhiklè, a tsi ri 100.

^9-10 Tʼhwaɗ gihi sa, ntamagi a zhè man a shkè te civèɗ mvèng pats, tʼhwaɗ gala tʼuda. Te civèɗ dukwaɗ, zuraʼa a dalmagai, zuraʼa a gai, a dergai, gihi nʼngalaʼa ta zhè.

¹¹ A ma tengaʼa ba civèɗ a zhè, lèmèlèmè ara a sam gihi matsa, man ta zhè te man a géɗèʼa. Ngur tengaʼa, nguzlöh ta, a skwi tèlèba lèmèlèmè ara a sam tengaʼa matsa.

¹² Ntamagi tengaʼa lèmèlèmè ara ntamagi gihi te man a géɗèʼa. A sam man civèɗ a hinèʼa, sam ndè a pa a zhè, a sam dergi te man a géɗèʼa.

¹³ A ngaɗayè: Gihi te man a géɗèʼa, a gihi te man a dukwaɗ, zuraʼa a dalmagai, nasa gihi nkezlaʼa, man ndohi mvi skwi a Zhiklè, man ta herda na va a Ndo nzi pèc pècèk, ta ndi skwi nkezli nkezlaʼa man ta zla na Zhiklè. Skwi nkezli nkezlaʼa man ta zla na Zhiklè: movar, skwi a géɗ malai, a gèɗ mphömè, sèi ta peda a pa, te man nengaʼa sam nkezlaʼa.

¹⁴ Aman ndohi mvi skwi a Zhiklè ta dè a pa, da shkè auda a sam nkezlaʼa a sam nʼngalaʼa tʼuda bai, sèi da suɗda maslaka tengaʼa man ta gu mizlinè a vna, auda te gi dai, te man ta kezla. Sèi ta vi maslaka ngiɗè a va, ga ta dè auda a sam ndohai.

Sam a ntamagi gi Zhiklè

¹⁵ Aman a nliva gi tʼhwaɗa klèng ma, a ndiyè auda a sam ntamagai te man a civèɗ mvèng pats, a nliva a sam tèlèba a pa.

¹⁶ Te civèɗ mvèng pats a nliva a gaɗa, 500.

¹⁷ Lèmèlèmè te civeɗ man a géɗèʼa, 500;

¹⁸ te dukwaɗ, 500;

¹⁹ te civèɗ man a nkèl pats, 500 zaʼa.

²⁰ Aranta, dergi man a nlüva, tsagi 4 tèlèba, lèmèlèmè, 500. Nasa aman a ngela sam nkezlaʼa te sam nkezlaɓiaʼa.