Ezéchiel 41 - Ma Zhiklè

Sam nkezli nkezlaʼa

¹ A ndiyè a gi nte ndevaʼa: nguzli zlohaʼa a tsi ri 6.

² Ntamagai, nguzlohaʼa a tsi ri 10. Dergai a ntamagai te civèɗ cèw, staɗ staɗ tèlèba a tsi ri 5. Sam tʼhwaɗ gi Zhiklè: ngurèʼa a tsi ri 40, nguzlohaʼa a tsi ri 20.

³ A ndo a hwaɗaʼa, a nlüv sak gi ntamagai: a tsi ri cèw. Ntamagai a tsi ri 6. A tsagi ntamagi cèw, nguzlohaʼa a tsi ri 7.

⁴ A nlüv gi nte ndevaʼa: a tsi ri 20, ngurèʼa; nguzlohaʼa a tsi ri 20. A ngaɗayè: Nasa sam nkezli nkezlaʼa.

Gi Zhiklè tʼuda

⁵ A nlüv dergai, ndazl nengaʼa a tsi ri 6. Civèɗ nʼngalaʼa a zhè a sam tèlèba, nʼngalaʼa a gi tsaɗ tsaɗ, nliv ta tèlèba a tsi ri 4.

⁶ Gihi sa, 30, ngiɗè makar a géɗ ngiɗè a géɗ ngiɗè, ha ta ndikè a géɗ gai, a sam man civèɗ nʼngalaʼa a zhè; ta derzla na va a gi ɓai.

⁷ Civèɗ nʼngalaʼa man ta tèuda gai, a gihi tengaʼa, ta ga a mbiaʼa. I rka ara man ta dè a géɗèʼa. Te gi te godok ta dè a nte ndevaʼa, te nte ndevaʼa ta dè man a géɗèʼa.

⁸ Na haha sam man a shkè a géɗèʼa a zhè, a ntèuda civèɗ nʼngalaʼa a pa, a tsi ri 6, tèlèba a ndè a maʼa.

^9-10 Nckè dergai, a sam civèɗ nʼngalaʼa, a tsi ri 5. Civèɗ te ndev gi nʼngalaʼa a sam gi man ndohi mvi skwi a Zhiklè ta gi mizlinè a pa, a sam gihai, a tsi ri 20. A tèuda gi Zhiklè tèlèba, sam mwinèʼa.

¹¹ Ntamgihi cèw a sam civèɗ nʼngelaʼa ta zhè, ngiɗè te dukwaɗ, ngiɗè te man a géɗèʼa. Sam mwinèʼa, nguzlohaʼa a tsi ri 5, a tèuda gi Zhiklè a pa.

¹² Gai zuraʼa a dalmagi te civèɗ nkèl pats, nguzlohaʼa a tsi ri 70. Tèlèba, ngur nengaʼa a tsi ri 90. Dergai, nckè nengaʼa a tsi ri 5.

¹³ A nliva gi Zhiklè: ngur nengaʼa a tsi ri 100. Dalmagai, gai a dergi nengaʼa, ngur tengaʼaʼ a tsi ri 100.

¹⁴ Ma gi Zhiklè, a dalmagi te civèɗ mvèng pats, nguzlohaʼa a tsi ri 100.

¹⁵ A nliva ngur gai a tsagi dalmagi, man a deɓaʼa, te civèɗ ngiɗè te civèɗ ngiɗè: a tsi ri 100, a hwaɗ gala tʼuda a sam nʼngalaʼa.

Gi Zhiklè tʼhwaɗaʼa

¹⁶ Gi Zhiklè, gi tʼhwaɗaʼa, a hwaɗ gala tʼuda a sam nʼngalaʼa, a ntatak gai, a nvakavar, a civèɗ nʼngalaʼa makar man ta tèuda a pa, mbè te pa a wof, tèlèba.

¹⁷ A nliva sam ntʼhai a ndè a sam nvakavar. A nliva nvakavar ba. A nliva civèɗ a sam ntamagi ha ndè a sam nkezli nkezlaʼa, tʼuda ba, tʼhwaɗaʼa ba.

¹⁸ A sam gi tèlèba, chérubimhai ta zhè, a vah gangar mvèhèʼa te ndev chérubimhai.

¹⁹ Chérubim staɗ staɗ tèlèba, a medi cèw, te civèɗ ngiɗè ara gèɗ ndo, te civèɗ ngiɗè ara gèɗ marizhèlè, ta pu di a vah gangar sa.

²⁰ Tʼherkeda ha ndè a géɗ ntamagai, ta pata chérubimhai a vah gangar a pa, lèmèlèmè a der gi Zhiklè tèlèba.

²¹ Ntatak gai a sam gi Zhiklè, tsagi 4 lèmèlèmè.

²² Sam mvi skwi a Zhiklè a zhè, nʼnga a wof. Njüv nengaʼa a tsi ri 3, ngurèʼa a nguzlohaʼa a tsi ri cèw. Zlogomaʼa a tsagihiaʼa tèlèba, nʼngaʼa a wof. A ngaɗayè: Nasa table man a zhè a sam di Ndo nzi pèc pècèk.

²³ Ntamagi a sam gi Zhiklè, a ntamagi a sam gi nkezli-nkezlaʼa,

²⁴ a winè auna a winè auna, skwi mpizlè maʼa cèw.

²⁵ Chérubimhai a vah gangar mvèhèʼa, lèmèlèmè ara a sam dergai. A pa mozodo a wof a zhè tʼuda, a ma gala.

²⁶ Tʼhwaɗ gala, nvakavar a zhè, a vah gangar a chérubimhai kumba, tʼhwaɗ gala a dergi ba.