Ezéchiel 4 - Ma Zhiklè

Jérusalem a di a gédèsh na

¹ Ka ndo, tsulong brique, fedahi a ma ngaya, vèhèda kokwar Jérusalem a pa!

² Ngalda pa ara ndohi mayamhai, a skwi var te rai, a golahi a skwi nwurzl zlazlar te rai.

³ Woy kizlèd züdo a ka feda a ndev kinè a kokwar, ara zlazlar züdo. Pu di zuraʼa a ma nengaʼa a ka nza na ma. Nasa skwi malwuɗai a sam ndohi Israel.

⁴ Manahi a zlazlar ri gula ngaya, i woy a i fa ka mali ndohi Israel a gèɗ. Mʼmèn man ka mènè a pa sa, lèmèlèmè ara mvi man ka ceda mali ta a gèɗ ngaya.

⁵ Mvi mali tengaʼa, i ngra ka a gèɗ ara mʼmènè, a gi 190. Ka cè mali ndohi Israel agèd ngaya.

⁶ Aman ka ndikeda ma, ngwoda va a zlazlar ri mandi ngaya a ka ceda mali ndohi Juda, mʼmèn 40. Mʼmèn staɗ a géɗ mvi staɗ.

⁷ Te deɓaʼa pu di a ka nza na ma a kokwar, a ka gudko ri auda te maslaka a ka hodko ma a géɗ kokwar.

⁸ I dzaw ka a teɓa, a ka slalia ka ngwèdè va a sam ngiɗè azɓai, ha ka ndeva pats matakwan ngaya sa.

⁹ Hul tser dau dau a gèɗ, a marori, a ɗia, a mtwoz, a menda, a ntemas, a ka peda tèlèba a shidèf staɗ, a ka tu a maras. Mʼmèn tèlèba man ka mana tʼhai a zlazlar ngaya, a ka peɗiaʼa, mʼmèn 190.

¹⁰ Ka livèʼa te di pats staɗ staɗ, a ka hilèʼa a ka ndiaʼa kètè kètè kètè, ha pats a nkèlè.

¹¹ Iyam man ka siaʼa, ka livèʼa. Ka sia koloba staɗ, a pats staɗ staɗ tèlèba.

¹² Ka ndu mɓelaslasla marorai a ka pa na zi ndo a verzai a sam di ta.

¹³ Te deɓaʼa Ndo nzi pèc pècèk a gaɗa: Aranta ndohi Israel sèi ta da ndi movar nlizhèa te ndev ndohi nte deɓa man i da dzam ta a va tengaʼa.

¹⁴ I gaɗa: A, a, a, Bi Zhiklè Ndo nzi pèc pècèk! Daga nyakaɗ ga va ga nlizhè di bai; i nda skwi mʼmets mʼmetsi bai, i ndau skwi man skwi dak a nkeɗa bai. Zluèɗ mbèh skwai i tara te ma ga di bai!

¹⁵ Te deɓaʼa a ngaɗayè: Man ar haha, i va ka civèɗ a ka pa na zi zlè a verzai te di man a zi ndo, a ka ti movar ngaya a vna.

¹⁶ A ngaɗayè: Ka ndo, i cèma ta movar auda te ma ndohi Jérusalem. Ta ngècè movar man ta livè tʼhwaɗ ri tʼhwaɗ rai, a ta kuɗi a pa. Ta da si iyam man ta livè a ndèlèk, a ta nzi a zlau.

¹⁷ Movar a iyam a da slra bai, a ta tiɗ ta staɗ staɗ tèlèba, ta ndev ta a géɗ mali ta.