Ezéchiel 31 - Ma Zhiklè

Wof gevda

¹ Te mvi 11, a ki 3, mʼmèn 1, Ndo nzi pèc pècèk a ngaɗayè ar haha:

² Ka ndo, gaɗa na Pharaon, bi Egypte, a ndohi nengaʼa rèdèdèa: Aman ka mbiaʼa, ka lèmèlèmè ara ngè?

³ Na haha, ka ara wof gevda te Liban, a ri wof mbelaʼa, a vah ndizlimaʼa, ngurèʼa te zhiklè. Ncèlèkwöm gèdèʼa a ndikè a va vanai.

⁴ A grè a sam man iyam a pa, iyam a pa a gu aman a grè a vata. Woyamhi ta hi a sam man na pa, a ndè dak tèlèba.

⁵ Gar haha a grè a zhiklè, a fena wofhi ngiɗè te dak tèlèba. A pi ri kumba, a nhi wof nengaʼa nguɗ guɗaʼa, a gèɗ man iyam a pa kumba.

⁶ Tʼhwaɗ ri wof nengaʼa, ɗiakihi tsaɗ tsaɗ ta gi gi ta a pa. Te mèzhèɓ nengaʼa, skwi dak tsaɗ tsaɗ a yi kra a pa. Ndohi herkeda kumba ta nza a mèzhèɓ nengaʼa.

⁷ Nʼnga a wof mbelaʼa, mbiaʼa, a ri wof nengaʼa ngur-gurèʼa, te man zluzlor nengaʼa kala a va iyam.

⁸ Ko lakalak te gi lak Zhiklè, az tar nengaʼa ɓai, ko ɗawai az ara ri wof nengaʼa bai; ko ri wof tsna mbelaʼa az tar nengaʼa bai. Wof ngiɗè te gi lak Zhiklè mbelaʼa az ara nengaʼa bai.

⁹ I ga a mbelaʼa a gèɗ ri wof nengaʼa kumba, a wofhi te Eden tèlèba, te gi lak Zhiklè, ta gu srak a gèɗ nengaʼa.

Wof gevda nʼngel na

¹⁰ Gar haha Bi Zhiklè a gaɗa: A gèɗ man ka gra a vata, a ncèlèkwöm gèɗ na a lamka na a vanihai, a ndav nengaʼa a fi va a gèɗ ngur nengaʼa,

¹¹ i da va na a ri ndo wuɗai te va ndohi herkeda. A da ga na skwi a shèwa, a da ngeldaussa.

¹² Ndohi man verzi ta tsaɗ, man ta ge shèwa ka bai, ta ngeldaussa, a ta jèkeda pa. A ri wof nengaʼa mʼmbeɗ na hai, a nʼngel na a slrats ɓalɓalɓalaʼa, a ndohi herkeda tèlèba ta hi ta auda te mèzhèbaʼa, a ta jèkeda pa.

¹³ Ɗiakihai a skwi dak tèlèba ta shkè a ta nzi a godozlomaʼa, a hwaɗ ri wof nengaʼa.

¹⁴ Wof ngiɗè da gra a ma woyam mbiaʼa aranta asaɓai, da fu va ɓai a gèɗ ngur nengaʼa, a sam man iyam a pa. Tèlèba ta te ri mʼmetsai. Ta dè vèvèɗ a hwaɗaʼa, a va ndohi dzavai.

¹⁵ Gar haha Bi Zhiklè a gaɗa: A pats man wof gevda kala a gi dzavai, woyam a kuɗiaʼa. Iyam a hi a pa azɓai, iyam mbiaʼa a zlècè hai. A gèɗ nengaʼa i va na maslaka sam kuɗa a va a Liban, a wofhi te dak tèlèba ta ɓerzl ta.

¹⁶ Aman a kèlèhi kèngèm, a hèzlèwè, ndohi herkeda ta gudzai. Aman i zukda a gi dzavai a nda ndohi nte vèvèɗ tʼhwaɗaʼa. Wofhi mbelaʼa te Eden tèlèba, mparahiaʼa te Liban, ta tèlèba man ta nza a ma iyam, ta bid va ta.

¹⁷ Tengaʼa ba ta dè a vaʼa, a sam ndohi man ta bazl ta a tsakwal, verzi ndohi herkeɗa man ta nza a mèzhèɓ nengaʼa.

¹⁸ Te va wofhi te Eden nʼnzalaʼa, mbiaʼa ngar ka nangwa? I zukde ka a vèvèɗ tʼhwaɗaʼa a nda wofhi tʼherkeda tèlèba. Ka dè a va tengaʼa man ngwon nʼngel bai, a sam ndohi man ta bazl ta a tsakwal. Nasa Pharaon a nhèyè ndohi nengaʼa, Bi Zhiklè a gaɗa.