Ezéchiel 3 - Ma Zhiklè

¹ A ngaɗayè: Ka ndo, ndau ɗèlèwèr haha! Te deɓaʼa do a ka njè ta ndohi Israel!

² A i winè ma ga, a nengaʼa a mvay ɗèlèwèr sa a i ndau.

³ Te deɓaʼa a ngaɗayè: Ka ndo, ndheda hwaɗ, ngezda ɗèlèwèr haha man i va ka a hwaɗ! A i ndau mènè, a jèn te ma ga ara vongwom.

⁴ A ngaɗayè: Ka ndo, slambaɗa, a ko do a sam ndohi Israel, a ka gaɗa ta ma ga.

⁵ A vava a i zlinde ka a sam ndohi man daʼai tengaʼa tsaɗ ka bai, man a cinè azɓi ka ɓai, a sam ndohi herkeda man ka tsena daʼai tengaʼa bi ka bai. I zlinde ka a sam ndohi Israel.

⁶ Aman agassa i zlinde ka a sam ndohi man daʼai tengaʼa tsaɗ, man a cinè azɓai, a sam ndohi herkeda kumba man ka tsena daʼai tengaʼa bai, ar ta cinè ma ngaya.

⁷ Aman ndohi Israel ta woy a ta tsena bai, ta fi zlembaɗ a ma ga azɓai; aman gèɗ ndohi Israel tèlèba nshfaʼa ndav tengaʼa ngwora.

⁸ Na haha i sassaya ka di ngaya lèmèlèmè ara di tengaʼa, a i nshfa gèɗ ngaya lèmèlèmè ara gèɗ tengaʼa.

⁹ Gèɗ ngaya shfa ara ɗaz kwa, wuɗi na zhè a fena kwa ambalai. Ka gu zlau tengaʼa bai, zlau da dza ka a sam ta bai, a géɗ man ta ndohi mèdègèɗ.

¹⁰ A ngaɗayè a vaʼa: Ka ndo, ma ga tèlèba man i gaɗa ka, co a ndav, fa na gèɗ!

¹¹ Te deɓaʼa slambaɗa, do a sam ndohi man ta hel ta a ɓèlè, a sam wudahi ndohi ngaya. Ka da gaɗa ta ar haha: Bi Zhiklè Ndo nzi pèc pècèk a goɗ ar haha. Ko ta tsenaʼa, ko ta tsena ɓi ba.

¹² Te deɓaʼa Mèzhèɓ Zhiklè a ngsyè. I tsena nhèzlèwè mbiaʼa te deɓ ga, a nʼnjèl Ndo nzi pèc pècèk a ndo auda a samaʼa.

¹³ I tsena kelpasl skwihi man a nshèfíè ta hèzlèwè man ta lama na ngiɗè a ngiɗè, a sak mota sa a nhumda va a nhèzlèwè mbiaʼa.

¹⁴ Mèzhèɓ Zhiklè a ngsyè, a ncyè, a i do a ndav; ri Ndo nzi pèc pècèk a nzakay a gèɗ a wuɗai.

¹⁵ I shkè a Thel-Abib, a sam ndohi man ta hel ta a ɓèlè, man ta nza a ma woyam Kebar. I nza a pa a sam tengaʼa mʼmèn 7, ara ndo nrzla.

¹⁶ Te deɓ mʼmèn 7, Ndo nzi pèc pècèk a ngaɗkayè aranta:

¹⁷ Ka ndo, i ge ka a ndo mɓer ndohi Israel: Ka da tsena ma te ma ga, a ka da ngra ta maya a nzlembaɗ ga.

¹⁸ Aman i gaɗa na ndo ambaɓiaʼa: Ka metsi ngaya! A ka fa na a zlembaɗ ɓai, a ka nza ngay tètè a ka ngatsa na maya a ndo ambaɓiaʼa a géɗ mali na bai, aman a mbél na, – ndo ambaɓi matsa a metsi na a géɗ mali na; aman i da jhèɗè nshèffè na te ri ngaya.

¹⁹ Aman ka, ka ngatsa na maya a ndo ambaɓiaʼa a nengaʼa a jèkeda mali na azɓai, a menkada a deɓa azɓai, ndo sa a da metsi na a géɗ mali na. Aman ka, ka mbela nshèffè ngaya.

²⁰ Aman ndo nzuraʼa a jèkeda ngi zura nengaʼa, a gi skwi ambaɓiaʼa, i da slafadama na sak, a da metsi na. Aman ka ngatsa na maya ɓai, a da metsi na a géɗ mali na. A skwi nzuraʼa man a gau, ndo a hérè nengaʼa te deɓaʼa asaɓai. Aman nshèffè nengaʼa i jhèɗè te ri ngaya.

²¹ Aman ka ngatsa na maya a ndo nzuraʼa, da gu mali ɓai, a nengaʼa a gi mali azɓai, a da nzi a nshèffè. A géɗ man ka ngatsa na maya, a ka mbela nshèffè ngaya.

²² Ndo nzi pèc pècèk a mfay ri a gèɗ, a ngaɗayè: Slambaɗa, do auda a dala, te pa i da gaɗa ka.

²³ I slambaɗa, i do auda a dala, a nʼnjèl Ndo nzi pèc pècèk a zhè a pa. I rkaʼa, ara man i rka a ma woyam Kebar. I kalahi a deɓ sak nengaʼa.

²⁴ Te deɓaʼa Mèzhèɓ Zhiklè a mshkè a ndav ga, a nzlatsedyè a sak ga, a ngaɗayè: Do, ka pizlèda va ngaya a gai!

²⁵ Ka ndo, ta da dzaw ka a teɓa, aman ka slalia ka dè auda a sam ndohi azɓai.

²⁶ A i gi aman nèʼèn ngaya a tkwècè a gerɗak ngaya. Ka gi a ndaɓazlam, ka slalia ka njè ta a ka ngatsa ta maya bai, a géɗ man ta ndohi mèdègèɗ.

²⁷ Aman i da gaɗa ka, i da winè ma ngaya, a ka da gaɗa ta: Bi Zhiklè Ndo nzi pèc pècèk a goɗ ar haha. Ndo man a woya a ncinèʼa, da tsuno! Ndo man a woya bai, da jèkeda – a géɗ man ta ndohi mèdègèɗ.