Ezéchiel 26 - Ma Zhiklè

¹ Te mvi llaʼa, a ki 1, Ndo nzi pèc pècèk a ngaɗayè ar haha:

² Ka ndo, Tyr a goɗ a géɗ Jérusalem: Yowa, kokwar gani mbiaʼa ngedas na! Anai i da ɓicè skwi mèshèlè ndohi man ta gedas ta.

³ Gar haha Bi Zhiklè a gaɗa: Di man a ngaya ma, Tyr! I da baha ta ndohi rèdèdèʼa, a ta shkè a sam ngaya, ara iyam man a kala ta a gèɗ.

⁴ Ta da mbeɗa zlazlar Tyr, a ta ngezlda gi nengaʼa ngurèʼa aussa. I da patseda nkulama aussa, i jèkeda pra a pa.

⁵ A ndi a sam man ta wuzhè lata ta a pa, te ndev iyam. Aman iyè, Bi Zhiklè, i goɗa. A ndohi herkeda sèi ta cedama.

⁶ Aman dalahi nengaʼa man ta te dak, ta da bazl ta a tskwal, a ta da suna, i Ndo nzi pèc pècèk.

⁷ Gar haha, Bi Zhiklè a gaɗa: Na haha i baha na Nebucadnetsar, bi Babylone, bi a géɗ bihai, te man a géɗèʼa, a kala na va a Tyr a plèsh, a kiki var, a ndohi plèsh, ndohi herkeda rèdèdèʼa.

⁸ Dalahi ngaya man ta te dak, ta da bazl ta a tsakwal. Nebucadnetsar a da ɗizle kwa a ma zlazlar ngaya, a da tivè a pa a vna, a da rèm gi ara gambar.

⁹ A da wurzl zlazlar ngaya a gaɗa nwurzl zlazlar, a da mbeɗa gi ngaya ngurèʼa a gaɗa züdo nhurmaʼa.

¹⁰ Sam sak plèsh ta tsa ka lokotor a dai, ndohi plèsh a sak kiki var ta da gudzeda zlazlar ngaya, aman ta da bizhè a ntamagi kokwar ngaya, ara man ta duma kokwar.

¹¹ Sam sak plèsh ta da rda civèɗ ngaya aussa a sak. Ndohi ngaya ta bazl ta a tsakwal, a sak gai man ka mboh skwi te pa, a ka gso va a vna, a mbeɗ na aussa.

¹² Ta cèma ka skwi mèshèlè ngaya, ta gi metsar skwi man ka gu gani a vna, ta mbeda zlazlar ngaya, ta duma gi mbèh skwi ngaya. Kwahi ngaya, nciɓè ngaya, herkeda ngaya, tèlèba ta wusheda va iyam.

¹³ I ndivè dimèsh mwuffe ngaya, a ta cinè ganzavar te kokwar ngaya asaɓai.

¹⁴ I ngwode ka a pra kurndazlndazlaʼa, sam man ta wuzhè lata ta a pa. Ta ɗaɗay ka te deɓaʼa asaɓai. Aman iyè, Ndo nzi pèc pècèk, i goɗa, Bi Zhiklè a gaɗa.

¹⁵ Bi Zhiklè a ngaɗa na Tyr: A sam nhèzlèwè, man ka kalahi pra, herkeda te ndev iyam a gudzai, a ndohi man tsakwal a ntez ta ta shèkètè; aman tsakwal a bèzlè ndo a sam ngaya.

¹⁶ Bihi a ma woyam tèlèba ta shkè hai a géɗ sam nʼnzi bi ta, ta da suɗa dawar a maslaka man gadabu a pa auda a va. Ta feda maslaka sam kuɗa a va, a ta nzahi a herkeda. Lèk lèk ta gudzi a ta gi zlau ngaya.

¹⁷ A ta tsi nguzlah a géɗ ngaya, a ta gaɗa: Ka kokwar man ta sléɓèrdèʼa, man ka mbiaʼa a ma woyam mbiaʼa, ka za te iyam a nda ndohi ngaya, kè? Nengaʼa a mpra ta zlau a va ndohi ngiɗè tèlèba man ta nza a tsagi na.

¹⁸ Anai, a pats man ka kalahi pra, herkeda a ma woyam a gudzai, zlau a dza ta ndohai a géɗ ndikè-ma kita ngaya.

¹⁹ Gar haha Bi Zhiklè a gaɗa: Aman i da gedassa kokwar ngaya, lèmèlèmè ara kokwar man ndo a nzi a pa azɓai. Aman i kalde ka a va iyam, a woyam mbiaʼa, a i zede ka a pa.

²⁰ I zukde ka a sam ndohi te vèvèɗ, a sam ndohi vèvèɗ nhalaʼa, a ka nzi a herkeda tʼhwaɗaʼa, ara gihi dikai kokwar zlèzlèʼa; a sam ndohi vèvèɗ, a ka shkè a deɓa a herkeda man ndohi ta zhè a nshèffè asaɓai.

²¹ I woy a i ndevde ka a nasanasa, a ka zi ngaya rè. Ko ta da woy ka, ta da ngats ka asaɓai.