Ezéchiel 25 - Ma Zhiklè

Ammon

¹ Ndo nzi pèc pècèk a ngaɗayè ar haha:

² Ka ndo, ngwoda ma a civèɗ ndohi Ammon, hod ma a gèɗ tengaʼa!

³ Gada ta ndohi Ammon: Va-tsena ma Bi Zhiklè! Bi Zhiklè a goɗ ar haha: A gèɗ man kin ngwoshè kiɗè kiɗè a gèɗ sam ga nkezlaʼa man ta derɗaʼa, a gèɗ herkeda Israel man a nʼnde na hèshèkèɗ, a gèɗ ndohi Juda, man ta hel ta a ɓèlè –

⁴ a gèɗ nengaʼa i ve kinè a ri a ndohi te civèɗ mvèng pats. Ta da gi gi tengaʼa a sam kinè, a ta nzi a sam kinè. Tengaʼa ta ndi nyi wof kinè, tengaʼa ta si wa kinè.

⁵ I ndeda Rabba a sam nwèr zlugumihai, a kokwar Ammon a sam nwèr tambakihai, a kin da suna, i Ndo nzi pèc pècèk.

⁶ Gar haha Bi Zhiklè a gaɗa: Ka tsu ri pèsl pèslèʼa, ka gatseda sak dakwa dakwaʼa, a kin tsu wagèsh a ka wuff te ndav ngaya a gèɗ Israel, a shèwa;

⁷ gar haha i tara ka ri a dai, i da fe ka a ri a ndohi herkeda, a ta helama kinè skwi kinè. I da zedka ka auda te ndev ndohi herkeda, i da gedas ka aranta te va kokwar-bihai. I gedas ka, a kin da suna, i Ndo nzi pèc pècèk.

Moab

⁸ Gar haha Bi Zhiklè a gaɗa: Moab a gaɗa: Ndohi Juda lèmèlèmè ara ndohi herkeda ngiɗè tèlèba.

⁹ Gar haha i woya a i winè zlazlar kokwar Moab, kokwar mbelaʼa te va kokwar man a gèɗ herkeda tèlèba: Beth-Jeshimoth, Baal-Meon a Kirjathaim.

¹⁰ I da pe ta a ndohi te civèɗ mvèng pats, a nda ndohi Ammon. A ta hérta te deɓaʼa asaɓai te ndev kokwar-bihai.

¹¹ I da gi kita a gèɗ Moab, a ta da suna, i Ndo nzi pèc pècèk.

Edom

¹² Gar haha Bi Zhiklè a gaɗa: A géɗ man Edom a ntsoko di man a na auda a sam ndohi Juda, a ngau mali kumba arsa, a ngu a shèwa holholaʼa,

¹³ i woy a i torko ri a gèɗ Edom, i zedkoɗi ndohi a skwi ndzhamhi auda te pa, a ndi na hèshèkèɗ. A hinè te Théman, ha ndè Dedan, sèi ta bazl ta a tsakwal.

¹⁴ I woya aman Israel, ndohi ga, ta gi kita a géɗ Edom te di man a ga. Ta da gi a sam Edom lèmèlèmè ara ndzoan ga, ara ndav ga man a dzay worworaʼa. A Edom a sun kita ga, Bi Zhiklè a gaɗa.

Philistie

¹⁵ Gar haha Bi Zhiklè a gaɗa: A géɗ man ndohi Philistie ta ntsoko di man a tengaʼa auda, a ta tsu wagèsh a ta gu shèwa a géɗ mayam ta zlèzlèʼa,

¹⁶ Bi Zhiklè a gaɗa: Na haha i woy a i tara ta ri a di a ndohi Philistie, i da zedkoɗi ndohi Kéreth aussa, a i gedas ta njèkèdia a ma woyam mbiaʼa.

¹⁷ I woy a i ga ta kita mbiaʼa, a ndzoan a vata, a ta da suna, iyè Ndo nzi pèc pècèk, aman ta da pelay gèɗ.