Ezéchiel 23 - Ma Zhiklè

Demamhi cèw

¹ Ndo nzi pèc pècèk a ngaɗayè ar haha:

² Ka ndo, ngwozi ngiɗè cèw ta zhè, mam ta nstaɗ.

³ Ta gu mphömè te Egypte, ta hüno mphömè te dalai. Te pa ta bertsama ta wa.

⁴ Nzlembaɗ tsuvomaʼa Ohola. Oholiba, demam na. Ta ara dalahi ga, a ta yu wudahi a dalahai. Nzlembaɗ ta Ohola, ara Samarie; a Oholiba ara Jérusalem.

⁵ Ohola a njèkyè, a ngu ntétékè a ndohi Assyrie man ta woyaʼa.

⁶ Golahi mbelahiaʼa tèlèba, maslaka vèvèzh mʼmadza a va, bihai a mbibihiaʼa, ndohi plèsh a deɓ plèsh.

⁷ A ngu mphömè a nda tengaʼa, a nda ndohi Assyrie mparahiaʼa. A sam tèlèba man a gi ntétékè tengaʼa, a lizhè va na a skwi mbèh skwi tengaʼa.

⁸ Aman ko mphömè a Egypte a njèkeda bai, man a gu mphömè, a mʼmana a vna te dalai, a mpara na wa a ngu mphömè a vna.

⁹ A géɗ nengaʼa i va ta a ri ndohi man ta gi mphömè a nda ta, ndohi Assyrie man a tétékè ta.

¹⁰ Tengaʼa ta suɗama na maslaka auda a va, ta helama na wudahi a dalahi na, a ta keɗda pa a tsakwal. A ngwozi ta tsu tsaval a géɗèʼa. Ta ga na kita aranta.

¹¹ Oholiba, demam na, a nrka ma ba, aman a ngu ntétékè holholaʼa, a fena demam na.

¹² A ntétüko ndohi Assyrie, bihai a mbibihiaʼa, ndohi var, a maslaka mbelaʼa a va, ndohi plèsh a deɓ plèsh, golahi mbelahiaʼa tèlèba.

¹³ I rkaʼa, a lizhè va na: cèw ta ba, ta gu lèmèlèmè.

¹⁴ Aman nengaʼa a ngu mphömè a ma ma a nda ndohi mvèhèʼa a dergai, skwi man ndohi Chaldée ta vèhèda pa a skwi nduzoʼa,

¹⁵ skwi deɓ te deɓa, gèɗ mpaɗaʼa, a maslaka sraffaffaʼa, tèlè ara bihi sojèhai, skwi mèzhèb ndohi Babylone; kokwar tengaʼa Chaldée.

¹⁶ Mrke ta, ta gso ndav na, a nzlünde ndo a sam ta a kokwar Chaldée.

¹⁷ A ndohi Babylone ta shkè a sam na, a ta mana a vna, a ta lizhè va ta a mphömè na. Aman nengaʼa a lizhè va na a sam ta ma, ta ngezla na a gèɗ.

¹⁸ A nʼngheda mphömè na bai, a nsuɗa maslaka na auda a va. Ta ngezlay a gèɗ; demam na ba, a ngezlay a gèɗ.

¹⁹ Aman nengaʼa a nhurkoɗi pats dali na, man a gu mphömè a Egypte.

²⁰ A ntétékè ndohi man a gau mphömè a nda ta, man nfèfen va ta ara nfèfèn va kɗèh, man iyam va nengaʼa ara iyam va mari plèsh.

²¹ Ka, Oholiba, ka lèyè mphömè man ka gokoɗi te dali ngaya, man ndohi Egypte ta bertsko wa ngaya.

²² Gar haha Oholiba, Bi Zhiklè a gaɗa: I woy a i poko ta gèɗ auda a ndohi man ka gu mphömè a nda ta, man ta ngezla ka a gèɗ, a i bahka ta a sam ngaya te sam tèlèba:

²³ ndohi Babylone, ndohi Chaldée tèlèba, Pekod, Shoa a Koa, a ndohi Assyrie tèlèba a nda tengaʼa, golahi mbelahiaʼa tèlèba, bihi a tsuvomhiaʼa, bihi sojè, mbibihiaʼa, tèlèba ndohi plèsh.

²⁴ Ta da kala ka va, a nda kikai a sak kikai, ndohi rèdèdèʼa, a ta nza ka a ma a gwèsh, a tsakwal, a dzokwom te gèɗ. I vi kita a ri ta, a ta da ga ka kita a maya kita ta.

²⁵ I woy a i gi srak a géɗ ngaya a ta ga ka skwi a shèwa. Ta ngelama ka htsan a zlembaɗ, a ndohi te verzi ngaya ta bazl ta a tsakwal. Ta da helama ka wudahi a dalahi ngaya, a ta fa ta vogwa a ndohi te verzi ngaya.

²⁶ Ta da suɗama ka maslaka auda a va, ta cèma ka skwi wi ngaya.

²⁷ I da ndevda mphömè ngaya man nlizhèʼa man ka hünkoɗi te Egypte. Ka da pi di a tengaʼa asaɓai, ka da hér Egypte asaɓai.

²⁸ Aman Bi Zhiklè a gaɗa: Na haha i da ve ka a ri a mayamhi ngaya, a ndohi man ta ngezla ka a gèɗ.

²⁹ Ta da ga ka shèwa, skwi tèlèba man ka ɓüco, ta cèma ka, a ta jèke ka a pa adai, skwa az a va ngaya bai, a mphömè ngaya a ngredekaɗauda. A géɗ skwi hori man ka gu a ntétékè ngaya,

³⁰ ka ngots aranta a géɗ man ka gau mphömè a ndohi nte deɓa, a ka lizhè va ngaya a skwi mbèh skwi tengaʼa.

³¹ Ka dzodzor civèɗ demam ngaya, Gar haha ka da cè kokwi nengaʼa a ri ngaya.

³² Gar haha Bi, Zhiklè a gaɗa: Sèi ka da si te kokwi demam ngaya, kokwi mbiaʼa, man skwi a dè a pa a vata. Ta da ngwossaha ka a géɗ kokwi mbiaʼa, a ta derde ka.

³³ A da keɗ ka ara zom, a ka ngeza a nlèyè. Kokwi demam ngaya, kokwi, zlau a ngudzak.

³⁴ Sèi ka sokoɗauda te pa tèlè ndèzl, a ka da peda na ma kokwi a va. Ka kuratsa maslaka man a va ngaya, aman iyè, Bi Zhiklè, i goɗa.

³⁵ Gar haha Bi Zhiklè a gaɗa: A géɗ man i pca ka a gèɗ, a ka kaldyè a deɓa, sèi ka cè hori mphömè ngaya, a skwi ngaya nlizhèa.

³⁶ A Ndo nzi pèc pècèk a ngaɗayè: Ka ndo, ka woy a ka ga ta kita a Ohola a Oholiba de? Ngreda ta skwi hori tengaʼa!

³⁷ A man ta gau mphömè. Pombaz a ti ta. Ta gau mphömè a skwi mbèh skwi tengaʼa man nlizhèa, a ta bezde ta wudahi tengaʼa man ta yokoyè a ndev vogwa.

³⁸ A skwi haha bata gau: Ta lizhè sam ga nkezlaʼa a pats nasa, a ta derde patshi nshèk va ga.

³⁹ Aman ta zlaha wudahi ta, a ta va ta a vrihai, a pats nasa to do a gi ga nkezlaʼa a ta derɗaʼa. Na haha skwi man ta gu te gi ga.

⁴⁰ A vaʼa ha: ta zlündo ndohi sak a sam ndohi dra, a ta shke tsam tsam. A géɗ tengaʼa man ta pana va ta, a ta faɗda mbar a va a ta tila va ta.

⁴¹ Ta nzahai a sam mʼmèn mbelaʼa, a skwi nʼndi ntila a tsagai, a ta faɗda ɓurdi ga a mbar ga a pa.

⁴² Ndohi kumba man ta slu dimèsh a daʼai a vata, a ta wuffè a sam ta. Ta shkè te civèɗ hèshèkèɗ Saba tèlèba, a dasi te rai, a ta paɗa gèɗ ta a skwi mpèɗè gèɗ mbelaʼa.

⁴³ Te deɓaʼa, i gaɗa na ngwoz man a gedassa va na a mphömè: Ani ndohi haha ta woy a ta gi mphömè; a ka dè?

⁴⁴ To do a sam Ohola a Oholiba, ngwozi mphomaʼa, ara man ta dè a sam fali dam.

⁴⁵ Ndohi nzuraʼa ta da ga ta kita, kita ngwozi mphömè, kita ngwozi nkeɗa ndo. Tengaʼa ngwozi mphomaʼa, Pombaz a ri ta.

⁴⁶ Aman Bi Zhiklè a ngaɗa: Da ɓica ta mpi ndohai a gèɗ! Da pa ta zlau a gèɗ, da cèma ta skwi ta!

⁴⁷ Da kal ta a, kwa te va mpi ndohai! Da tsah ta a gwèsh! Da bazl ta wudahi a dalahi ta, da pa na vogwa a gi ta!

⁴⁸ I woy a i ndeva mphömè te kokwar, a ngwozi tèlèba ta hérèʼa a ta gi mphömè ara kinè asaɓai.

⁴⁹ Kin ngècè kita a gèɗ mphömè kinè, a mali mʼmbèh skwi kinè a da ngwoda kinè va a gèɗ, a kin da suna, i Bi Zhiklè Ndo nzi pèc pècèk.