Ezéchiel 22 - Ma Zhiklè

Mali te Jérusalem

¹ Ndo nzi pèc pècèk a ngaɗayè ar haha:

² Ka ndo, ka woy a ka gi kita, ka ga na kita a kokwar nkeɗa ndo ɗè? Ngreda na mali na tèlèba!

³ Gada na: Bi Zhiklè a goɗ ar haha: Wobau a géɗ kokwar man a kéɗè ndo man a sam na; aman pats man a ngaya a mshkè, kokwar man a mbèh skwai – mali mbiaʼa – alizhè va na a vna.

⁴ Aman ka keɗa ndo, ka feda mali a gèɗ ngaya; aman ka mboh skwai, ka lizhè va ngaya. Aranta ka herdeka pats kita ngaya. Mvi kita ngaya a ndikè ma ndul ndul. Gar haha i gi a ndohi nte deɓa ta ngwossaha ka, a kokwar-bihi tèlèba ta liv ka.

⁵ Labar ma ngaya ambaɓiaʼa, sam ngaya tèlèba ndzakaɓa, ndohi man ta ndul ndul a ndohi man ta dra ta da ngwossaha ka.

⁶ Na haha tsuvomhi Israel a sam ngaya ta tilè wuɗi ta, a ta kédè ndo a vna.

⁷ A sam ngaya ndohi ta derde bab ta a mam ta. A sam ngaya ta ga na wuɗi a kra dikai, a ngwoz mazai, a ndohi mbrokihai.

⁸ Sam ga nkezlaʼa kin gedassaʼa, a kin dérɗè patshi nshèk va ga.

⁹ Ndohi man a sam ngaya ta ngre ndo, a ta keɗaʼa. Ta mbèh skwai a sam ngaya a géɗ za, ta gi mphömè a sam ngaya.

¹⁰ A sam ngaya ta mènè a ngwoz bab ta, ta kèlè a va ngwozi man hwaɗ a va.

¹¹ Ngiɗè a mènè a ngwoz nslamagi na, ngiɗè a gi mwèslè a dem kra na, ngiɗè a gi mwèslè a demam na, dem bab na.

¹² Ta ruɓ ndo dai, aman a ta dè a ta keɗa ndo. Ka jhèɗè mpataka skwi a vaʼa, ka gu ri a sam nslamagi ngaya a wuɗai, a iyè i pca ka a gèɗ, Bi Zhiklè a gaɗa.

¹³ Na haha i tsa na ri a di a skwi mèshèlè man ka ngotso, a géɗ ndohi man ka bazl ta a sam ngaya.

¹⁴ A pats man i ga ka skwaʼa, ka da gi slagama genè dè? Wuɗi ngaya a zhè genè dè? Iyè Ndo nzi pèc pècèk, i goɗo, a i da giaʼa.

¹⁵ I da venda ka gèɗ a va ndohi nte deɓa, i ksarde ka a va ndohi herkeda, a i da zeda ka skwi ngaya nlizhèʼa aussa.

¹⁶ Ka derɗa va ngaya a ri ngaya a sam di ndohi herkeda a géɗ mali ngaya, a ka da suna, iyè Ndo nzi pèc pècèk.

Skwi te gezla

¹⁷ Ndo nzi pèc pècèk a ngaɗayè ar haha:

¹⁸ Ndohi Israel ta nde ta a zi züdo a sam ga, ka ndo. A matsa ta tèlèba verzhègenè, guro, züdo, ta nde ta a ziaʼa.

¹⁹ Gar haha Bi Zhiklè a gaɗa: A géɗ man kin tèlèba kin nde kinè a zi züdo, i woy a i ɓic kinè te ndev Jérusalem.

²⁰ Ara man ta humda verzhègenè a guro a züdo te gezla a ta vatsa na vogwa a gèɗ a ta tiaʼa, lèmèlèmè i da humda kinè a ndav ga a ndzoan ga, a i da ga kinè kita a vogwa.

²¹ I da ɓic kinè, i da vatsa kinè vogwa ndzoan ga a gèɗ, a i te kinè a vna ara züdo.

²² Ara verzhègenè man ta tia te gezla, i da te kinè te Jérusalem, a kin gi a skwi man ta wèslè te gezla, a kin da suna, lyè Ndo nzi pèc pècèk, man i ga kinè ndzoan a va.

Ndohi kokwar tèlèba ta gi malai

²³ Ndo nzi pèc pècèk a ngaɗayè ar haha:

²⁴ Ka ndo, gaɗa na kokwar Jérusalem: Ka herkeda man daga pats ndzoan ga iyam a nga ka bai.

²⁵ Tsuvomhi kokwar ngaya ta ara marizhèlèhai man ta bebrè a ta cizlè ndo. Ta ndeda ndohi a ma, ta ngezlama ta skwi mèshèlè a skwi mbelaʼa tengaʼa a ma, a ngwozi kokwar kumba ta nde ta a ngwozi mazai.

²⁶ Ndohi mvi skwi a Zhiklè te pa ta ngwoda ma kita ga, ta derde skwi ga nkezlaʼa. Ta ɗèlè ɓai te ndev skwi nkezlaʼa a skwi nkezlaɓiaʼa, te ndev skwi nlizhèʼa a skwi nlizhèɓiaʼa. Ta fa na gèɗ a pats nshèk va ga bai, a ta derɗyè a vna a sam ta.

²⁷ Ndohi ngaya mbibihiaʼa nara kdadihi dak man ta cizlè skwai, a ta keɗa ndo, a ta gedassa nshèffè a ta ndi hwaɗ a vna.

²⁸ Ndohi nhadka ma ngaya ta zlakede ta ndohai, ta njè ta nshunè ncèkèlma, ta hodko ncèkèlma, ta tila ma ta mbelaʼa. Ta gaɗa: Bi Zhiklè a goɗ ar haha – ko Ndo nzi pèc pècèk a ngaɗa bai.

²⁹ Ndohi kokwar ta gi skwi a wuɗai, ta gi metsar, ta zumda ta gèɗ a ta ga ta wuɗai a mpataka ndohai, a ndo mbrok. Ma kita a ngaɗa arsa bai.

³⁰ A i hoss ndo man a zlècè ara zlazlar, man a nza na di a slrats a sam di ga, a kokwar a gédèshè azɓai. Aman i ngatsa ndo ɓai, ko staɗ.

³¹ Te deɓaʼa i ga ta ndzoan a va, a i gedas ta a ndav ga man nvatsa ara vogwa, a i ngwoda ta mali ta a gèɗ.