Ezéchiel 21 - Ma Zhiklè

Vogwa a ndi wof nhayaʼa

¹ Ndo nzi pèc pècèk a ngaɗayè ar haha:

² Ka ndo, peda di a civèɗ dukwaɗ, goɗ ma ngaya a civèɗ te tsagai, a ka hod ma a géɗ wof nhayaʼa tʼherkeda te civèɗ dukwaɗ.

³ Ka da gaɗa na sam nhèyè wof, te civèɗ dukwaɗ: Tsena ma Ndo nzi pèc pècèk! Bi Zhiklè a goɗ ar haha: Na haha i vècè vogwa te ndev ngaya, man a ndeda wof mɓayaʼa a wof ngworaʼa tèlèba a ma a sam ngaya. Nèʼèn vogwa a da mbècè azɓai, a nde ta ndohi tèlèba a ma, a hinè te dukwaɗ, ha ndè man a géɗèʼa.

⁴ Ndohi tèlèba ta da rkaʼa, iyè Ndo nzi pèc pècèk, iyè nvatsa vogwa sa. A vogwa a mbècè azɓai.

⁵ Aman i gaɗa: Ah, ah, Bi Zhiklè Ndo nzi pèc pècèk! Tengaʼa ta gèɗè a géɗ ga: Ndo sa a gèdè ma njkedè ndo pèc pècèk.

Gwèsh Zhiklè

⁶ Ndo nzi pèc pècèk a ngaɗayè ar haha.

⁷ Ka ndo, peda di a civèɗ kokwar Jérusa-lem, goɗ ma ngaya a géɗ sam nkezlaʼa, hod ma a géɗ herkeda Israel!

⁸ Ka da gaɗa na herkeda Israel: Ndo nzi pèc pècèk a goɗ ar haha: I woy a i lama ka! I phko gwèsh auda te gi na, a i zede ndohi tèlèba, ndo nzuraʼa a ndo nzura ka ɓai.

⁹ Te man i zede ndo nzuraʼa a ndo nzura ka bai te ndev ngaya, i phko gwèsh auda te gi na, a i bazl ta, a hünko te civèɗ dukwaɗ a ndè a civèɗ man a géɗèʼa.

¹⁰ A ndohi tèlèba ta da suna, i Ndo nzi pèc pècèk, i phko gwèsh auda te gi na, a i da ciɓa a gi na azɓai.

¹¹ Anai ka, ndo, ngoy va ɗerɗeraʼa a géɗ skwi man a dza ka, a ka sakat ngaya a sam ta.

¹² Aman ta da gaɗa ka: Ka sakat ngaya èhèmè? Ka gaɗa: A géɗ ma man i tsenaʼa. Aman a da gi arsa, ndav ndohi tèlèba a da mbéɗ na, ri tèlèba a wushahai, tukwal a te ndav ta bai, gur-mbèzh a ndi na. Na haha a shkè, na zhè ma, Bi Zhiklè Ndo nzi pèc pècèk a gaɗa.

¹³ Ndo nzi pèc pècèk a ngaɗayè ar haha:

¹⁴ Ka ndo, hod ma! Gada ta: Bi Zhiklè a goɗ ar haha: Kafahi gwèsh, kafahi gwèsh, ntasla!

¹⁵ Mpeza, aman a bèzlè skwai, mpeza aman a si dai.

¹⁶ I va na a ri ndo nkeɗa ndo, a ngshè tʼhwaɗ ri na. Gwèsh ntasla, mpeza, aman a dè a ri ndo nkeɗa ndo.

¹⁷ Ka ndo, tsu lalau, gu wobau, aman a shkè a géɗ ndohi ga, a géɗ tsuvomhi Israel tèlèba, a bazl ta a nda ndohi ga tèlèba. Gar haha peda ri a gèɗ!

¹⁸ Bi Zhiklè Ndo nzi pèc pècèk a ngoɗa.

¹⁹ Ka ndo, hod ma, tsu ri pèsl-pèslèʼa! Gwèsh staɗ a bazla ndohi cèw, makar. Gwèsh a bèzlè ndo kumba, gwèsh a verzi ndohi kumba.

²⁰ A mbeɗama ta ndav a ndohi a ta kumba ta wush ta hai. I zlündo tsakwal a ntamagi tengaʼa tèlèba, a ta bazl ta. Gwèsh a si dai, a keɗa ndo.

²¹ Nzuma wètètèʼa a sam tèlèba, a gu ngwoda va auna ngwoda va auna.

²² Iyè a ri ga i woy a i tsa ka ri a dai, a ndav ga a mènèhai. Iyè Ndo nzi pèc pècèk, a ngoɗa.

Bi Babel a shkè

²³ Ndo nzi pèc pècèk a ngaɗkayè ar haha:

²⁴ Ka ndo, bazla civèɗ cèw, a tsakwal bi Babel a bizhè a pa. Ta slèmbèɗè te kokwar staɗ. A ka Zlatseda skwi nkezli gèɗ civèɗ a civèɗ ndè a kokwar mbiaʼa staɗ staɗ tèlèba,

²⁵ a gwèsh a dè a kokwar Rabbath, man a ndohi Ammon, a kokwar Jérusalem te Juda, a kokwar man nʼngala te pa.

²⁶ A vava bi Babel a zlècè a sam nkezli gèɗ civèɗ, aman a pi kwa. A gidè sulom, a jhèɗè théraphim, a ɗèlè te menaɗ.

²⁷ A civèɗ ri mandai, lamba Jérusalem a pa, a bi Babel a winè ma na, a tsi lalau var, a bèhè a var, a zlècèdè gaɗa nwurzlè zlazlar a ntamagai a ɗizlè kwahai a ta tivè a pa.

²⁸ A sam di ndohi Israel, mpi kwa ara ncèkèlma. Aman mali a pca na a gèɗ a Ndo nzi pèc pècèk azɓai. A géɗ mali ta, a gs ta.

²⁹ Gar haha Bi Zhiklè a gaɗa: A géɗ man mali kinè a hakay a gèɗ, a mali kinè nʼngreda auda, a skwi man kin gau tèlèba, i gs kinè a géɗèʼa.

³⁰ Aman ka ndo man ambaɓai a vata, kra bi Israel, pats ngaya a mshkè, pats nʼndikè ma kita.

³¹ Bi Zhiklè a goɗ ar haha: Feda mpèɗè gèɗ a hai, ce na mpèɗè gèɗ auda te gèɗ! Skwa da nza a gèɗ bai! Skwi tʼhai do do a géɗèʼa! Skwi nte géɗèʼa da shkè a hai, a i woy a i mbeda kokwar, i mbeda mʼmbedè.

³² Wobau a géɗ nengaʼa, da nza aranta, ha pats man nengaʼa man a gi kita, a shkè a i va na a ri a nengaʼa.

Nhodko ma a géɗ ndohi Ammon

³³ Aman ka ndo, hod ma a ka gaɗa: Bi Zhiklè a goɗ a géɗ ndohi Ammon, a sam mʼmbèh skwi tengaʼa a géɗ za: Gwèsh mpho tʼuda ma, gwèsh man a keɗa ndo, mpeza, a si dai.

³⁴ Aman ta njè ka nshunè ncèkèlma, ta hodko ka ma ncèkèlma; gwèsh a keɗa ka a nda ndohi malihai, man pats tengaʼa a mshkè, pats nʼndikèma kita.

³⁵ Men ngay a deɓa, ka gu ndudoh ɓai! Men ngay a deɓa a kokwar man ta yaka ka te pa; te kokwar nyakaɗ ngaya i da ga ka kita.

³⁶ I da vatsa ka vogwa ndzoan ga a gèɗ, i va ka a ri a nderkèzhè ndohai man ta vhè ma a géɗ a ndo.

³⁷ Vogwa da nda ka ma, Pombaz ngaya da hu te ndev kokwar! Ta da hér ka asaɓai, a géɗ man iyè, Ndo nzi pèc pècèk, i goɗa.