Ezéchiel 18 - Ma Zhiklè

Ko wawa a skwi ntul na

¹ Ndo nzi pèc pècèk a ngaɗayè ar haha:

² Kin goɗ ngèlègèɗ ma mè a géɗ herkeda Israel? Babhi ta ndau nyi wof nduang-nduangaʼa, a mpa ta ɓorom a ma zlèʼèn wudahai.

³ Ara man a vava i zhè, Bi Zhiklè Ndo nzi pèc pècèk a gaɗa, kin da ngècè ngèlègèd ma haha te Israel asaɓai.

⁴ Na haha nshèffè ndohi tèlèba a ga: nshèffè bab kra, a nshèffè kra, ta a ga. Ndo man a gi malai, sèi a metsi na.

⁵ Ndo nzuraʼa, man a gi skwi nzuraʼa, te ngi-zuraʼa,

⁶ a ndi vri a géɗ za azɓai, a pi di a mʼmbèh skwi azɓai, a lama na ngwoz nslamagi na azɓai, a mènè a ngwoz azɓai man hwaɗ a va,

⁷ a gi wuɗi a ndo ngiɗè azɓai, a skwi man a nco a dua a mindè a deɓa, a gi metsar azɓai, a vi movar a ndo man mi a keɗaʼa, a va na maslaka a va ndo man adai,

⁸ a vi skwi a nslembolom a jhèɗè mpataka a vaʼa azɓai, ri nengaʼa a gi skwi ambaɓiaʼa azɓai, a bèzlè kita zuraʼa te ndev ndohai,

⁹ a jèjèr ma nkwèr a ma kita ga, a lèɓèslè te pa, nengaʼa a vava ndo nzuraʼa, a da nzi a nshèffè, Bi Zhiklè a gaɗa.

¹⁰ Aman a myu kra man a gi skwi a wuɗai, man a keɗa ndo, a gi skwi ngiɗè aranta,

¹¹ aman nengaʼa nʼnga mali aranta bai, – kra a ndi vrai a géɗ za, a gi malai a ngwoz nslamagi na,

¹² a ngezlama na skwi a ndo ntawassa a mbelaw ndo, a gi metsar, skwi man a nco a dua a vi a deɓa azɓai, a pi di a skwi mbèh skwai, a gi mphömè,

¹³ a vi skwi a nslembolom a njhèdè mpataka a vaʼa, ri nengaʼa a gi skwi ambaɓiaʼa, a da nzi a nshèffè ɗè? Aʼai, a da nzi a nshèffè azɓai. A ngu skwi hori haha tèlèba, da mets na. Slèslèɓ nengaʼa da kela na a géɗ.

¹⁴ Aman na haha ndo ngiɗè a myu kra nguraʼa man a rka mali bab na tèlèba, a rka ma ba, aman a gi aranta azɓai,

¹⁵ a ndi vri a géɗ za azɓai, a pi di a mʼmbèh skwi ndohi Israel azɓai, a gi mali a ngwoz nslamagi na azɓai,

¹⁶ a ngezlama na skwi a ndo azɓai, a vi skwi a nslembolom, a jhèɗè mpataka a vaʼa azɓai, a gi metsar azɓai, a va na movar a ndo man mi a keɗaʼa, a va na maslaka a va ndo man adai,

¹⁷ ri nengaʼa a gi skwi ambaɓiaʼa azɓai, a jhèɗè mpataka skwi a vaʼa azɓai, a jèjèr ma ga, a gi ara man ma nkwèr ga a gaɗa: ndo ar haha a da metsi na a géɗ mali bab na azɓai, a da nzi a nshèffè.

¹⁸ Bab na, a géɗ man a ngu malai, a ngu metsar, a ngu skwi man ambaɓai a sam gwoli na, a metsi na a géɗ mali na.

¹⁹ Kin gaɗa: Kra a ngècè kita a géɗ mali bab na azɓi èhèmè? Aman kra a ngau skwi nzuraʼa te ngi-zuraʼa. A ndzodzor ma nkwèr ga tèlèba. Nengaʼa a da nzi a nshèffè.

²⁰ Ndo man a gi malai, sèi nengaʼa da mets na. Kra da ngots kita mali bab na, a bab kra da ngots kita mali kra bai. Ndo nzuraʼa da mbel na a géɗ ngi-zuraʼa nengaʼa. Ndo ambaɓiaʼa, skwi ambaɓia nengaʼa da ngwoda na va a gèɗ.

²¹ Ndo ambaɓiaʼa, man a mʼmenkaɗa deɓa te mali na man a gau, a jèjèr ma nkwèr ga tèlèba, a gi skwi nzuraʼa te ngi-zuraʼa, a da metsi azɓai, a nzi a nshèffè.

²² Mali nenga tèlèba man a gau, ta hérèʼa asaɓai, a géɗ ngi-zuraʼa nengaʼa man a gau, a da nzi a nshèffè.

²³ Bi Zhiklè a gaɗa: Mʼmetsi ndo nderɗa Zhiklè ambahayè ɗè? Aman a menkaɗa deɓa te mali na a nzi a nshèffè ambahay holholaʼa ka ɓi dè?

²⁴ Aman ndo nzuraʼa a njèkeda ngi-zuraʼa nengaʼa, a gi skwi nzura ka bai, a gi skwi nzuraʼa azɓai, skwi hori tèlèba lèmèlèmè ara ndo nderɗa Zhiklè, skwi nzura tèlèba man a gau, ta hérèʼa asaɓai. A géɗ man nlèɓèslè ɓai, a géɗ mali man a zhè a géɗ nengaʼa, a da metsi na.

²⁵ Aman kin gaɗa: civèɗ Ndo nzi pèc pècèk amba zura bai! Ndohi Israel, va-tsenaʼa! Civèɗ Ndo nzi pèc pècèk amba zura bai èhèmè? Civèɗ kinè ka bi dè, man ta amba zura bai.

²⁶ Aman ndo nzuraʼa a njèkeda ngi-zuraʼa nengaʼa, a gi skwi nzura ka bai, a metsi na, a metsi na a géɗ mali man a gau.

²⁷ Aman ndo ambaɓia a njèkeda mali nengaʼa man a gau, a gi skwi nzuraʼa te ngi-zuraʼa, nengaʼa a nzi a nshèffè.

²⁸ A di nengaʼa a mwin na a njèkeda mali na tèlèba man a gau. A da nzi a nshèffè a vava, a da metsi azɓai.

²⁹ Aman kinè, ndohi Israel kin gaɗa: Civèɗ Ndo nzi pèc pècèk amba zura ɓai. Ndohi Israel, civèɗ ga man amba zura ɓi ɗè? Civèɗ kinè ka ɓi dè, man amba zura bai?

³⁰ Gar haha i da gi kita kinè, ndohi Israel, staɗ staɗ a géɗ civèɗ nengaʼa, Bi Zhiklè a gaɗa. Va-menkada deɓa, va-jèkeda mali kinè tèlèba, man ɓai a de kinè a kita.

³¹ Va-wusheda mali tèlèba man kin gau aussa a sam kinè! Va-woy ndav mɓuaʼa a mèzhèɓ mɓuaʼa. Kinè ndohi Israel, kin woy mʼmetsi èhèmè?

³² Aman i wuffè azɓai a géɗ ndo man a mets na, Bi Zhiklè a gaɗa. Aman va-ngwoda ndav kinè, a kin nzi a nshèf-fè!