Ezéchiel 16 - Ma Zhiklè

Jérusalem nlèɓèslɓiaʼa

¹ Ndo nzi pèc pècèk a ngaɗayè ar haha:

² Ka ndo, ngra na skwi hori man kokwar Jérusalem a gau!

³ Ka gaɗa: Bi Zhiklè a ngaɗa na kokwar Jérusalem: Verzi ngaya, man ka cüzlko va te pa, kokwar Canaan. Bab ngaya ndo Amor, mam ngaya dem Heth.

⁴ A pats nyakaɗ ngaya ta ngela zhimèl ngaya bai, ta pana ka va ngaya a iyam bai, ta faɗaha ka mbar ɓai, a ta mana ka maslaka a verzi ɓai.

⁵ Ndo a nrka ka aranta a ka sia te va azɓai. Ta kalde ka a dala, a géɗ man ta rka ka ara skwi ambalai, pats nyakaɗ ngaya.

⁶ A i beza a tsagi ngaya, i rka, ka zlér va te va Pombaz ngaya, a i gaɗa ka: Nza a nshèffè! Nza a nshèffè!

⁷ A ka grè a ma ma, ara skwi man a dai te dak, ka grè a ma ma a ka nde ngaya a bidalai, wa te ndav ma, gwots gèɗ ngaya ndzuva. Aman ka, ka adai, skwa az a va ngaya bai.

⁸ A i beza a tsagi ngaya zaʼa, a i rka tiɗè sam man ta tsaka ka di ma, i kalda dawar ga a géɗ ngaya, a i nghede ka, man ka adai, a i mbaɗa ka, a nga derzla ma a ka, a ka gaʼa a skwi ga, Bi Zhiklè a gaɗa.

⁹ I pana ka Pombaz auda a va a iyam, a i faɗa ka mbar a va.

¹⁰ I va ka maslaka ntsentsai mvècaʼa tsaɗ tsaɗ a va, i va ka kotokoroh a sak, i paɗa ka gèɗ a bata maslaka, maslaka matsalai.

¹¹ I dzazla ka va ngaya a skwi va, i va ka dasi a rai, a skwi daʼai a daʼai.

¹² I pa ka iyam a htsan, i pa ka skwi zlembaɗ a zlembaɗ ngaya, a i paɗa ka gèɗ a skwi mpèɗè gèɗ mbelaʼa.

¹³ Ka jèzlè va ngaya a guro a verzhègenè, maslaka ngaya maslaka ntsentsi mbelaʼa, bata maslaka, maslaka matsalai. Ka ndu gufa nkerɗa dérnènènèʼa, vongwom a mbar. Ka mbikaɓai, ka ga a bai.

¹⁴ Ta gèdè a géɗ mbambi ngaya te kokwar-bihi tèlèba, a géɗ man ntila tédèdèʼa, a géɗ skwi va man i dzazla ka a va, Bi Zhiklè a gaɗa.

¹⁵ Aman ka, ka gso va a mbambi ngaya, ka fu va a géɗ labar ma ngaya, a ka gu falai a ka gu mphömè a ndohi tèlèba man ta beza ka a tsagai.

¹⁶ Ka hul maslaka ngaya a ka tila sam a géɗ za, a ka gu mphömè te pa.

¹⁷ Skwi va ngaya, nʼngaʼa a guro a verzhègenè ga, man i va ka, ka hulo a ka rom skwi ara ndo, a ka gi mphömè a vna.

¹⁸ Ka hul maslaka ntsentsi ngaya, a ka pa ta a va, ka ndara ta mbar a ɓurdi ga.

¹⁹ Movar man i va ka, gufa nkerɗa ndérnènènèʼa, mbar a vongwom man i va ka a ka ndiaʼa, ka va ta tengaʼa, aman a zhkèha ta amba, Bi Zhiklè a gaɗa.

²⁰ Ka hul wudahi a dalahi ngaya man ka yakayè, ka zlaha ta a tengaʼa. Mphömè ngaya a slra ka bi dè?

²¹ A ka zlaha ta wudahi ga a ka pa ta, a ka ndara ta?

²² A sam mphömè ngaya, a sam skwi hori ngaya, ka héra pats dali ngaya bai, man ka adi dai, skwa az a va ngaya bai, a ka zlur va te va Pombaz ngaya.

²³ Te deɓ shèwa ngaya haha tèlèba wobau, wobau a géɗ ngaya, Bi Zhiklè a gaɗa.

²⁴ Ka rom sam mʼmbèh skwi a géɗ za, a dala tèlèba;

²⁵ a zolom civèɗ tèlèba, ka rom sam mʼmbèh skwai a ka derɗa mbambi ngaya a vna. Ka pe ta ndohi man ta beza ka a tsagai, a wai, a ka gau mphömè kumba.

²⁶ Ka gu mphömè a nda ndohi Egypte, nslamagihi ngaya man wuɗi ta zhè, a ka gu mphömè a ma ma, a ka pokoy gèɗ ndav auda a vna.

²⁷ Na haha i tara ka ri a dai, i cèma ka skwi ngaya. I va ka a ri ntétékè mayamhi ngaya, dalahi Philistie, man hori a keɗ ta a géɗ maya nshèffè ngaya man ambaɓi a vata.

²⁸ Ka gu mphömè a nda ndohi Assyrie, a géɗ man mphömè a ngeza ka di ɓai. Te deɓaʼa ka gu mphömè a ma ma, ka ngeza bi genè.

²⁹ Te deɓaʼa ka gu mphömè te kokwar Canaan, ha ndè Chaldée, te kokwar ndohi ganai; aman ka ngeza ɓi genè.

³⁰ Kai! I gi ndav kumba a géɗ ngaya, Bi Zhiklè a gaɗa, aman ntétékè a keɗ ka arsa, ka fali dam man a ftska na va.

³¹ Ka gu sam mvi skwi a Zhiklè a zolom civèɗ tèlèba, a dala tèlèba. Ka ara fali dam ngiɗè ka bai. Ka woy ta, ko ta va ka skwa ɓai.

³² Ngwoz mphömè a woy ndo ngiɗè tsaɗ, baki na ka bai.

³³ Fali dam staɗ staɗ tèlèba ta va ta skwi a pa. Aman ka, ka va ta skwi mbalai a ndohi man ka gu mphömè a nda ta, a ka ruɓ ta, ka woy a ta shkè a sam ngaya te sam tèlèba, a ta gi mphömè a ka.

³⁴ Aranta ka ngwoda maya fali ngwozi ngiɗè: Ka gu mphömè a ndohi man ta hu a verzi ngaya bai. Ka vau skwi a géɗ mphömè, ta va ka skwi a ka ɓai.

³⁵ Gar haha, fali dam tsena ma Ndo nzi pèc pècèk!

³⁶ Bi Zhiklè a goɗ ar haha: A géɗ man mphömè ngaya a nge na mbiaʼa, a mphömè ngaya a ngredeka ka auda, ka adai, a sam di ndohi ngaya man ka gu mphömè a nda ta, a sam di vrihi ngaya man ka mboh skwi a nda ta, a géɗ Pombaz wudahi ngaya man ka vau a géɗ mʼmbèh skwai,

³⁷ a géɗ skwi haha tèlèba i woy a i ɓic ta ndohi tèlèba man ka gu mphömè a nda ta, man ka ambaha ta, tèlèba man ka woy ta, tèlèba man ka gu mayam ta. I da ɓicko ka a gèɗ te sam tèlèba. I da ngredeka ka auda a sam ta, ka adai, a ta rka hori ngaya tèlèba.

³⁸ I ga ka kita ara man ta gi kita ngwozi mphömè a ngwozi nkeɗa ndo. I pra ka shèwa a ndzoan ga a gèɗ.

³⁹ I va ka a ri a tengaʼa, a ta da mbeda sam mʼmbèh skwi ngaya a géɗ za; ta da suɗama ka maslaka ngaya auda a va, a ta helama ka skwi va ngaya auda a va, a ta jèke ka a pa adai, skwa az a va bai.

⁴⁰ Ta da ɓica ka mpi ndohi a gèɗ, a ta da kal ka a kwa, a ta da kal ka a tsakwal.

⁴¹ Ta da fa na vogwa a gi ngaya, ta gi kita ngaya a sam di ngwozi kumba. I gia arsa, aman i ndeva ngi mphömè ngaya, a ka vi skwi mbalai a géɗ mphömè te deɓaʼa asaɓai.

⁴² I ga ka ndzoan ga a gèɗ, te deɓaʼa i gi srak a géɗ ngaya asaɓai, i nza a i gi ndav asaɓai.

⁴³ A géɗ man ka hera pats dali ngaya ɓai, a ka pokoy gèɗ ndav auda a skwi haha tèlèba, iyè ba i ngwoda ka mali ngaya a gèɗ, Bi Zhiklè a gaɗa. Ka mboh skwài, ka gu mphömè, tèlè ka bi dè?

⁴⁴ Na haha ndohi ta ngèlègèd a ka, a ta liv ka, a ta gaɗa: Demaʼa a cka mam na!

⁴⁵ Ka dem mam ngaya man a kwola baki na a wud na. Ka demam te va demamhi ngaya, man ta kwola baki ta a wud ta. Mam kinè, dem Heth. Bab kinè ndo Amor.

⁴⁶ Demam ngaya tsuvomaʼa, Samarie a dalahi na man ta nza a tsagi ngaya te civèɗ ri gul ngaya. Sodome, demam ngaya ntabawaʼa, a dalahi na, man ta nza a tsagi ngaya, te civèɗ ri mandi ngaya.

⁴⁷ Ka dzodzor civèɗ tengaʼa a ka mboh skwi ara tengaʼa ka bi dè? Ka gu mali a fena man a tengaʼa.

⁴⁸ I zhè a nshèffè, Bi Zhiklè a gaɗa: Sodome, demam ngaya, a dalahi nengaʼa, ta ga skwi bai ara man kinè a dalahi ngaya ta gau.

⁴⁹ Sodome, demam ngaya, a ngu mali haha: nfi va, a géɗ nwèl va ta ta hér ngiɗèhi azɓai, ta nzai ta a dalahi ta, ta takaha ta mbelaw ndohai a ndohi ntawassa asaɓai.

⁵⁰ Ta gre gèɗ a ta gu mphömè a sam di ga. A i zede ta, ara man ka rka a di ngaya.

⁵¹ Samarie a nʼnga mali kumba ara man a ngaya bai. Ka, ka gu mali holholaʼa a fena tengaʼa. Aman i lèmdè skwi hori ngaya tèlèba man ka gau, ar demamhi ngaya ta zhè ara ndohi nzuraʼa.

⁵² Co hori ngaya, man ka gu malai a fena demamhi ngaya! Ta gi skwi nzuraʼa a fena ka. Gu horai, co hori ngaya; demamhi ngaya a tsagai ara ndohi nzuraʼa!

⁵³ I da ngwèdè matakwan Sodome a dalahi na, a matakwan Samarie a dalahi na, ko man a ngaya ba,

⁵⁴ a ka cè hori ngaya a géɗ skwi tèlèba man ka gu a ka bid ta a vna.

⁵⁵ Demamhi ngaya, Sodome a dalahi na, a Samarie a dalahi na, ta shkè a deɓa a sam nʼnzi ta halaʼa. A kinè a dalahi ngaya kin da shkè a deɓa a sam nʼnzi kinè halaʼa.

⁵⁶ Te nfi va ngaya ka slef i Sodome, demam ngaya, pèc pècèk ka bi dè?

⁵⁷ Ga ta ngredko ka auda, ka adai. Gar haha antanta ma, dalahi Aram a nslamagihi tenga tèlèba, ta ngwossaha ka, a dalahi Philistie man ta zhè a tsagi ngaya, ta kwol ka.

⁵⁸ Mali ngaya a mphömè ngaya ka pilèʼa antanta, Ndo nzi pèc pècèk a gaɗa.

⁵⁹ Aman Bi Zhiklè a gaɗa: I ga ka lèmèlèmè ara man ka gau, man ka pra nderzlè-ma a ka derɗa ma mʼmbèdè a vna.

⁶⁰ Aman iyè i hér nderzlè-ma nga man nga derzlaʼa, man ka dali dai, a nga derzla ma a ka a mèdèp.

⁶¹ Ka da hér civèɗ ngaya a ka gi horai, aman i da hel ta demamhi ngaya, tsuvomhi a ntabawhia a i pa ka a dalahi ngaya; aman i pa ka a géɗ nderzlè-ma ga ka bai.

⁶² I woy a i til nderzlè-ma nga a ka, a ka da suna, i Ndo nzi pèc pècèk.

⁶³ Aman i da pra ka mali tèlèba man ka gau, ka da hérèʼa; hori a da keɗ ka a pa, ka slalia ka winè ma azɓai, Bi Zhiklè, Ndo nzi pèc pècèk, a gaɗa.