Ezéchiel 14 - Ma Zhiklè

Kita a géɗ ndohi mʼmbèh skwai

¹ Matrhiaʼa te va ndohi Israel nhalaʼa ta shkè a sam ga, a ta nza a tsagi ga.

² A Ndo nzi pèc pècèk a ngaɗayè ar haha:

³ Ka ndo, ndohi haha ta hér vri te ndav ta, a slafadama ta sak, a ta kalahi a malai. Kos ta za dzhadyè kè?

⁴ Anai, gaɗa ta ar haha: Bi Zhiklè a goɗ ar haha: Ko wawa te ndev ndohi Israel man a hér vri te ndav na, a nslafama na sak, a nkalahi a malai, te deɓaʼa a shkè a sam ndo nhadka ma, iyè Ndo nzi pèc pècèk i da mbeɗa na a ma a ri ga, a géɗ vrihi nengaʼa man ta zhè kumba.

⁵ A i da mbeɗama ta ndav a ndohi Israel, tengaʼa man ta jèkyè, a gèɗ vri tengaʼa kumba.

⁶ Gar haha gaɗa ta ndohi Israel: Bi Zhiklè a goɗ ar haha: Va-ngwoda ta deɓa a vrihi kinè! Va-jèkeda skwi hori kinè tè-lèba!

⁷ Ndo man a kwolyè te va ndohi Israel, man ɓai te va mbrokihi man ta zhè te Israel, a hér vri te ndav na, a slafadama na sak a kèlèhi a malai, te deɓaʼa a dè a sam ndo nhadka ma, aman a dzhadyè, iyè, Ndo nzi pèc pècèk i da mbeda na ma a ri ga.

⁸ I ngwoda na gèɗ a va ndo sa, a gi a skwi man ta ngèlè gèdèʼa; i zedkoɗauda te va ndohi ga, a kin da suna, i Ndo nzi pèc pècèk.

⁹ Aman ndo nhadka ma aman acèʼaman i peda a wai, a nhodko ma, iyè Ndo nzi pèc pècèk i tara na ri a dai, a i zedkoɗauda te va Israel, ndohi ga.

¹⁰ Mali ta; sèi ta ngècè kita a géɗèʼa, ta cèw ba, ndo nhadka ma a ndo ndzhodo.

¹¹ A ndohi gi Israel ta da zlèkè auda a sam ga azɓai, ta lizhè ndav ta a mali tengaʼa tèlèba te deɓaʼa azɓai, a ta gi a ndohi ga, a iyè i gi a Zhiklè ta, Bi Zhiklè Ndo nzi pèc pècèk a gaɗa.

Ndohi Zhiklè nzuraʼa

¹² Ndo nzi pèc pècèk a ngaɗayè ma haha:

¹³ Ka ndo, aman kokwar ngiɗè a gi mali a sam ga, a jèkyè, i tara na ri a dai, i cèma na movar auda te ma, a i zlindè mai, a i zedkoɗi ndohai, a skwi kuɗom, auda a sam ta.

¹⁴ Aman agassa ndohi mʼmakara haha ta zhè te ndev tengaʼa: Noé, Daniel a Job – sèi tengaʼa ta mbél ta, a géɗ ngi-zuraʼa tengaʼa, Bi Zhiklè Ndo nzi pèc pècèk a gaɗa.

¹⁵ Aman agassa i pra ta skwi dak a va kokwar, a ta dè a ta zede ndo te pa, a ndi na hèshèkèɗ, a ndo a bizhè a pa azɓai, a géɗ zlau skwi dak –

¹⁶ a ndohi haha makar ta zhè te kokwar, ara man a vava i zhè, Bi Zhiklè a gaɗa ko golahi tengaʼa, ko dalahi tengaʼa ta mbélè azɓai, sèi tengaʼa genè; a kokwar a ndi na hèshèkèɗ.

¹⁷ Man ɓai, aman agassa i zlindè tsakwal a kokwar ngiɗè, a i gaɗa: tsakwal da bazla ndohi te kokwar! – a i zedkoɗi ndohai, a skwi kuɗom auda,

¹⁸ a ndohi haha makar ta zhè te kokwar, ara man a vava i zhè, Bi Zhiklè a gaɗa, ko golahi tengaʼa, ko dalahi tengaʼa ta mbélè azɓai, sèi tengaʼa genè.

¹⁹ Man ɓai aman agassa i zlindè gidiɓèr a kokwar ngiɗè, a i keɗa ndo a ndzoan ga, a i zedkoɗi ndohi a skwi kuɗom auda,

²⁰ aman Noé, Daniel a Job te kokwar, ara man a vava i zhè, Bi Zhiklè a gaɗa, ko golahi tengaʼa, ko dalahi tengaʼa, ta mbélè azɓai, sèi tengaʼa genè, a géɗ ngi-zuraʼa tengaʼa.

²¹ Aman Bi Zhiklè a goɗ ar haha: Ko i zlindè kita ga mwuɗitpa faɗ a haha a kokwar Jérusalem: tsakwal, mai, skwi dak a gidiɓèr,

²² na haha njèkèɗi ndohi man ta mbel ta ta zhè te pa, ko golahi, ko dalahai. Ta da shkè auda te pa a sam kinè. Kin da rka maya nshèffè ta, skwi man ta giaʼa, a nda bid kinè a géɗ matakwan man i ga na Jérusalem, a géɗ skwi mwuɗitpa tèlèba man i ga na kokwar.

²³ Ta da bid kinè, aman kin rka maya nshèffè ta, a skwi man ta giaʼa, a kin da suna, skwi tèlèba man i ga na kokwar, i gau ambali ka ɓai, Bi Zhiklè a gaɗa.