Ezéchiel 13 - Ma Zhiklè

Kita a géɗ ndohi nhadka ncèkèlma

¹ Ndo nzi pèc pècèk a ngaɗayè:

² Ka ndo, hod ma a gèɗ ndohi nhadka ma Israel! Hod ma a géɗ tengaʼa man ta hodko ma te gèɗ ta:

³ Va-tsena ma Ndo nzi pèc pècèk! Ta dzodzor nhér gèɗ ta, a skwi Zhiklè man a rka ta a di ka ɓai.

⁴ Ndohi nhadka ma ngaya, Israel, ta ara kdadihi dak te dikai.

⁵ Aman zlazlar mʼmbeɗ na, kin do a pa a kin ramda a pa ɓai, aman ndohi Israel ta da nzi taraʼa te var a pats Ndo nzi pèc pècèk.

⁶ Ta rka skwi ncèkèlma, ta hadka ncèkèlma, ta gaɗa: Ma Ndo nzi pèc pècèk! Njè-kèm Ndo nzi pèc pècèk a nzlinde ta ka ɓai. Te deɓaʼa ta zhèr aman a da rufa ma tengaʼa.

⁷ Skwi man kin rkaʼa, skwi ncèkèlma ka ɓi dè? Ko man i gaɗa ɓai, kin gaɗa: Ma Ndo nzi pèc pècèk.

⁸ Gar haha Bi Zhiklè a gaɗa: A géɗ man kin hadka ma nʼngwèdè ndo, a kin rka skwi ncèkèlma, a vava i gi a mayam kinè.

⁹ I tara ta ri a di a ndohi nhadka ma man ta rka skwi nʼngwèdè ndo, a ta hadka ncèkèlma. Sèi da nza a va mpi ndohi ga asaɓai! Da winda ta a ɗèlèwèr a va ndohi Israel asaɓai! Da shkè a deɓa a kokwar Israel asaɓai, a kin da suna, i Bi Zhiklè Ndo nzi pèc pècèk.

¹⁰ A géɗ man ta zlakede ta ndohi ga, a ta gaɗa: gumai! aman gumi azɓai. Aman ndohi ta rèm zlazlar, tengaʼa ta geda slalia a pa.

¹¹ Gada ta ndohi man ta geda slalia a pa: I zlindè iyam nchè-nchè man a gedassa herkeda, a vandzal, a ndombozlor.

¹² A mbeɗda zlazlar aussa. Ta da gaɗa kinè azɓi dè? Slaha man kin geda a pa, na tema?

¹³ Gar haha Bi Zhiklè Ndo nzi pèc pècèk a gaɗa: I da zlindè ndombozlor, a iyam nchè-nchè a ndzoan, a i gédèshè tèlèba a vandzal, a ndzoan ga.

¹⁴ I da mbeɗa zlazlar man kin geda slalia a pa, a i mbeɗdahai kala verziaʼa. A mʼmbeɗ na, a kin zi kinè te pa, a kin da suna, i Ndo nzi pèc pècèk.

¹⁵ I ngreda ndzoan ga auda tèlèba a sam zlazlar, a sam ndohi man ta geda slalia a pa. Ta da gaɗa kinè: Ndohi man ta geda slalia a zlazlar, ta tema?

¹⁶ Ndohi nhadka ma Israel, tengaʼa man ta hodko ma a géɗ Jérusalem, a ta rka gumi nengaʼa te nshunè, aman gumi azɓai, Bi Zhiklè Ndo nzi pèc pècèk a gaɗa.

¹⁷ Aman ka, ndo, ngwoda ta ma a dalahi ndohi ngaya, ngwozi man ta hodko skwi te gèɗ ta. A ka hodko ma a géɗ tengaʼa.

¹⁸ Ka gaɗa: Bi Zhiklè Ndo nzi pèc pècèk a gaɗa: Wobau a géɗ ngwozi man ta ɗèhe di maslaka ara dasi rai, a ta ɗèhe maslaka man ndohi ta ngheda di ta a vna, ko mbiaʼa, ko nkèshèʼa, a ta woy a ta bidka ta ndohi a vna. Kin woy a kin zede ta nshèffè ndohi ga, a kin mbél nshèffê kinè dè?

¹⁹ Kin derɗyè a sam ndohi ga, a géɗ marori guva ri kètè, a géɗ movar a vi a ma staɗ; a kin zeda nshèffè ndo man a woy ar da nza a nshèffè; a kin mbél nshèffè ndohi man a woy ar da bazl ta, a kin ngwode ta ndohi ga a ta fi zlembaɗ a ncèkèlma.

²⁰ Gar haha Bi Zhiklè Ndo nzi pèc pècèk a gaɗa: Na haha i woy a i gedassa di maslaka kinè man kin bid ta ndohi a vna; i ngezlama kinè auda te rai; a i pra ta ndohi man kin bid ta, a ta hi ta ara ɗiakihai.

²¹ Ko maslaka man kin feda a gèɗ, i woy a i kuratsaʼa, a i mbel ta ndohi ga auda te ri kinè. Ta gi a gadda te ri kinè asaɓai, a kin da suna, i Ndo nzi pèc pècèk.

²² A géɗ man kin mbeɗama na ndav a ndo nzuraʼa a ncèkèlma, ndo man i woy a i ga na matakwan bai, a kin va ta wuɗai a ndohi nderɗe Zhiklè; a ta ngwèdè gèɗ a deɓa te civèɗ tengaʼa ambaɓiaʼa azɓai, aman ta mbél ta.

²³ A géɗ nengaʼa kin da rka skwi ncèkèlma asaɓai, kin da hodko ma asaɓai. I preka ta ndohi ga auda te ri kinè, a kin da suna, i Ndo nzi pèc pècèk.