Ezéchiel 12 - Ma Zhiklè

Ezèchiel skwi nrkedai

¹ Ndo nzi pèc pècèk a ngaɗayè ar haha:

² Ka ndo, ka nza te ndev ndohi mèdègèɗ. Di ta a zhè, ta rka bai. Zlembaɗ ta a zhè, ta tsena ɓai, a géɗ man ta ndohi mèdègèɗ.

³ Aman ka, ndo, ɓica skwi ndè nshèwèlè a di patsaʼa, a sam di ta. Jèkeda kokwar ngaya a sam di ta, a ko do a kokwar ngiɗè! Wa ngiɗè ba ta rkaʼa: aman ta ndohi mèdègèɗ.

⁴ Hulko kolongwi ngaya a skwi ndè nshèwèlè auda a sam di ta, a di patsaʼa. A dakwaɗ ka shkè auda te gai a sam di ta, ara ndo man a cèkèl va na.

⁵ Zlina gai a ka beza auda a pa a sam di ta.

⁶ Kelawda skwi a zlazlar a sam di ta. Man vad ma, a ko do ngaya! Feda ri a dai, a ka pu di a skwa ɓai! I ge ka a skwi nrkedi a géɗ ndohi Israel.

⁷ A i gau ara man Zhiklè a gaɗayè. I hulko kolongwi auda a di patsaʼa, kolongwi ndè nshèwèlè. A dakwaɗ i zlina gai, man vaɗ ma, a i do auda a i kelawda skwi a zlazlar a sam di ta.

⁸ Te mangoslèmaʼa Ndo nzi pèc pècèk a ngaɗayè:

⁹ Ka ndo, ndohi Israel, ndohi mèdègèɗ. Ta gaɗa ka ɓi dè: Ka ga haha mè?

¹⁰ Gaɗa ta: Bi Zhiklè a goɗ ar haha: Skwi man a ngra kinè haha a zhè a géɗ wud bihi te Jérusalem, a géɗ ndohi Israel tèlèba man ta zhè te pa.

¹¹ Goɗa: iyè skwi nrkedi a sam kinè. Skwi man i gau, a da ga ta tengaʼa. Sèi ta da helka ta a ɓèlè.

¹² Kra bai man a zhè a sam ta, a dè kèlewè skwi a zlazlar na, a dè auda man vaɗ ma. A da zlina gai, a da bizhè auda a vna, a da paɗa di na, aman a rka kokwar ɓai.

¹³ I da pa na gadda ga a hai, a i gshè a vna. A i daʼa a kokwar Babylone, a kokwar Chaldée. Aman nengaʼa a da rka ɓai. Te pa a da metsi na.

¹⁴ A ndohi ntakaha tèlèba, ndohi var nengaʼa tèlèba, man ta zhè a sam na, i da ksar ta a géɗ herkeda tèlèba, a i da dzam ta a tsakwal.

¹⁵ A ta da suna, i Ndo nzi pèc pècèk, man i ksar ta a va ndohi herkeda, a i venda ta gèɗ a kokwar ngiɗè.

¹⁶ I gi aman i jèkaha ta kètè. Tsakwal a mai a gidiɓèr a ndev ta tèlè azɓai, a ta da njè skwi hori ta a ndohi herkeda, man ta da dè a sam ta; a ta da suna, i Ndo nzi pèc pècèk.

Zhiklè a ngatsa ta maya a ndohi Israel

¹⁷ Ndo nzi pèc pècèk a ngaɗayè ar haha:

¹⁸ Ka ndo, ka da ndi movar ngaya a ngudzai, ka da si iyam ngaya a nkuɗi a zlau.

¹⁹ Ka da gaɗa ta ndohi kokwar: Bi Zhiklè Ndo nzi pèc pècèk a gaɗa ta ndohi kokwar Jérusalem man ta zhè tʼherkeda Israel: ta da ndi movar ta te ndev nlèyè, ta da si iyam ta a zlau; a herkeda tengaʼa a ndi na a hèshèkèɗ, a skwi nʼndha te pa pats ngiɗè, a ndev na, a géɗ skwi man ndohi man ta nza a pa ta gu shèwa.

²⁰ Kokwar man ndohi ta nza a pa, ta mbeɗ ta, a kokwar a ndi na hèshèkèɗ, a kin suna, i Ndo nzi pèc pècèk.

Nhèdè ma nʼngwèdè ndo

²¹ A Ndo nzi pèc pècèk a ngaɗayè:

²² Ka ndo, ma man kin gèɗè te kokwar Israel, ma ngwèshè a ndo mè? Pats a dè a ma ma; skwi man a rka ta a di tèlèba a gi azɓai.

²³ Gada ta: Bi Zhiklè a goɗ ar haha. I da; ndivè ngèɗ tengaʼa a haha, ta da gèɗè te Israel asaɓai. Aman sèi ka gaɗa ta: Pats a zhè ndul ndul ma, a skwi Zhiklè man a nrka ta a dai, a gai.

²⁴ Aman nshunè ncèkèlma, nhèdè ma nʼngwèdè ndo, a da gi te kokwar Israel asaɓai.

²⁵ Iyè Ndo nzi pèc pècèk, i dè gèdèʼa: Ma man i woya a i gèɗèʼa, a da gai. I da gèɗèʼa, kinè a zhè dai, ndohi mèdègèɗ, a i da giaʼa, arsa, Ndo nzi pèc pècèk a gaɗa.

²⁶ Ndo nzi pèc pècèk a ngaɗay zaʼa:

²⁷ Ka ndo, ndohi Israel ta gaɗa: Skwi man ndo nhadka ma a nrka te nshunè, a gi di azɓai, njèkèdai, a nhodko ma a géɗ mpats giɗè a ma dra.

²⁸ Gar haha gaɗa ta: Bi Zhiklè Ndo nzi pèc pècèk a gaɗa: Ma ga tèlèba a gi ndudoh azɓai. Ma man i gèdèʼa, a da gai, Bi Zhiklè a gaɗa.