Ezéchiel 11 - Ma Zhiklè

Kita a géɗ tsuvom ndohai

¹ Mèzhèɓ a nʼndzavyè a géɗèʼa, a ndiyè a ntamagi gi Zhiklè, man a zhè te civèɗ mvèng pats, man a nʼngwoda ma a civèɗ mvèng pats. A ntamagi, ngurhi 25 ta zhè. I rka Jaazania, kra Azzur, a Pelathia, kra Benaja, tsuvom ndohai te va tengaʼa.

² A ngaɗayè: Ka ndo, nasa ndohai man ta hér malai a skwi ambaɓiaʼa te kokwar haha.

³ Ta gaɗa: Tok tok haha ta ɗaɗayda gihi ta a pa zaʼa ɓi dè? Kokwar, nara shidèf. Nga, ara zluèɗ nte pa!

⁴ Gar haha, hod ma a géɗ tengaʼa, hod ma, ka ndo!

⁵ Mèzhèɓ Ndo nzi pèc pècèk a mshkè a géɗ ga, a ngaɗayè: Goɗo, Ndo nzi pèc pècèk a goɗ ar haha: Kin ndohi Israel, kin goɗ kata kata. Skwi man a shkè auda te ndav kinè, i suna.

⁶ Kin bazl ta ndohi kumba te kokwar haha, kin ndha civèdhi nengaʼa a ndohi mbazlaʼa.

⁷ Gar haha Zhiklè Ndo nzi pèc pècèk a goɗ ar haha: Ndohi mbazlaʼa man kin bazl ta te kokwar, tengaʼa zluèɗ. Kokwar, nengaʼa shidèf. Aman kinè, i da helka kinè auda te pa.

⁸ Kin gi zlau tsakwal; a i zlindè tsakwal a sam kinè! Bi Zhiklè a gaɗa.

⁹ I da helka kinè auda te kokwar haha, a i pe kinè a ri ndohi man verzi ta tsaɗ, a i ga kinè kita.

¹⁰ Tsakwal a da bazl kinè. I da gi kita kinè a ma kuma Israel, a kin da suna, i Ndo nzi pèc pècèk.

¹¹ Kokwar, nengaʼa shidèf kin ka ɓai, kinè zluèɗ nte pa ka ɓai. Aman i da ga kinè kita a ma kuma Israel,

¹² a kin da suna, i Ndo nzi pèc pècèk, man kin dzodzor ma nkwèr nengaʼa ɓai. Aman kin dzodzor mʼmbèh skwi ndohi nte deɓa man ta zhè a tsagi kinè.

¹³ Te va man i hèdè ma, Pelathia, kra Benaja, a mʼmets na. A i kalahi a deɓ sak nengaʼa, i kuɗau a vata, a i gaɗa: Ah, ah, ah, Bi Zhiklè Ndo nzi pèc pècèk! Ka woy a ka zeda njèkèɗi ndohi Israel ɗè?

Mpèsl ri Zhiklè

¹⁴ Ndo nzi pèc pècèk a ngaɗayè:

¹⁵ Ka ndo, i jèka ta nshèffè a kramamhi ngaya, gwoli ngaya, man kin te ɓèlè a nda ta, a ndohi Israel tèlèba, man ndohi Jérusa-lem ta gèɗè a géɗ tengaʼa: Ta dra a sam Ndo nzi pèc pècèk; nga, nga ngots kokwar haha a skwi nga!

¹⁶ Gar haha goɗa: Bi Zhiklè Ndo nzi pèc pècèk a goɗ ar haha: A vava i dzam ta dra a va ndohi nte deɓa, a i ksar ta a géɗ herkeda, a i ndi a sam-nkezlaʼa te kokwar man i dzam ta a pa, nʼnzi kètè.

¹⁷ Aman i da ɓicka ta a deɓa te ndev ndohi herkeda, te kokwar man i ksar ta a pa, a i ɓic ta a i va ta kokwar Israel.

¹⁸ Aman ta da ndikè a pa, a ta da gedassa skwi mbèh skwi a skwi hori tèlèba te pa.

¹⁹ I da ngwoda ndav ta, a i va ta Mèzhèɓ mɓuaʼa a ndav ta. I cèma ta ndav ngworaʼa ara kwa auda te va tengaʼa, a i va ta ndav mɓuaʼa ara gwoli ndohai,

²⁰ aman ta da gi ara man ma nkwèr ga a gaɗa, a ta jèjèr ma kita ga. Te deɓaʼa ta gi a ndohi ga, a iyè, i gi a Zhiklè tengaʼa.

²¹ Aman ndohi man ndav tengaʼa a gshè va a skwi mbèh skwai, i da ngwoda ta mali ta a gèɗ, Bi Zhiklè a gaɗa.

Nʼnjèl Zhiklè a shkè auda a géɗ Jérusalem

²² A chérubimhai ta winè kelpasl ta. A skwi nara sak mota to do a nda ta.

²³ A nʼnjèl Ndo nzi pèc pècèk a nslambaɗna auda te ndev kokwar, a nzlatsahi a géɗ za man a zhè a tsagi kokwar, te civèɗ mvèng pats.

²⁴ Mèzhèɓ Zhiklè a ndzavyè, a ndiyè a deɓa a kokwar Chaldée, a sam ndohi man a hel ta a ɓèlè te skwi Zhiklè man a rkayè a dai. A skwi Zhiklè man a rkayè a di, kal na.

²⁵ Skwi man Ndo nzi pèc pècèk a rkayè a di tèlèba, i njè ta ndohi te ɓèlè.