Ezéchiel 10 - Ma Zhiklè

Chérubim

¹ A i pu dai, a i rka a géɗ skwi man a nʼnzaka ta a gèɗ chérubimhai man ara saphir, kwa mbelaʼa, skwi ngiɗè a pa ara sam nʼnzi bai.

² Zhiklè a ngaɗa na ndo man maslaka ntsentsai a va: Do a pa a hwaɗ skwi nara sak mota man a zhè tʼhwaɗ chérubimhai, a ka hulko ndazli vogwa man vogwa a pa, guv guv ri cèw, auda te ndev chérubimhai, a ka wusheda a géɗ kokwar! Do a pa a sam di ga!

³ Aman a mdo a pa, chérubimhai ta zhè te civèɗ ri mandai te gai, a vani nʼndha te gi ntʼhwaɗaʼa.

⁴ A nʼnjèl Ndo nzi pèc pècèk a mshkè auda a géɗ chérubimhai, a ndo a géɗ ntamagi gi Zhiklè, a gi Zhiklè nʼndha a vanai; aman gala nʼndha a nʼnjèl Ndo nzi pèc pècèk man a si dai.

⁵ Nhèzlèwè kelpasl chérubimhai a tsenkaɗi a gala tʼuda, ara daʼai Zhiklè man wuɗi na zhè, man a gèdè.

⁶ Aman a ngaɗa na ndo man maslaka ntsentsai a va, a ndzhodo: Do a ka hulko vogwa auda te va skwi nara sak mota, te ndev chérubimhai! A nengaʼa a mdo, a nzlatsa a sam sak mota.

⁷ A chérubim a ntorko ri na, a mhulkoɗi vogwa auda te ndev chérubimhai, a mpa na a ri ndo man maslaka ntsentsi a va; nengaʼa a mco, a ndo auda.

⁸ A skwi ngiɗè arkè te ndev chérubimhai, tʼhwaɗ kelpasl ta, ara ri ndo.

⁹ I pu dai, a i rka skwi nara sak mota faɗ a tsagi chérubimhai, a sam staɗ staɗ tèlèba sak mota staɗ staɗ. Sak mota a si dai ara chrysolithe, kwa mbelaʼa.

¹⁰ Ngi va ta, ta faɗ tèlèba lèmèlèmè. Ara man sak mota ngiɗè tʼhwaɗ ngiɗè.

¹¹ Aman ta dè, ta dè a tsagi faɗ tèlèba, ta ngwèdè va azɓai. Ara man nshèlèkuraʼa a dè, ngiɗè ba ta dè, ta ngwèdè va azɓai.

¹² Va chérubimhai tèlèba, deɓ ta, ri ta, kelpasl ta, a skwi nara sak mota, di nɗaha a pa tèlèba, ta faɗ tèlèba lèmèlèmè.

¹³ Ta baha na sak mota ‘ndombozlor’ – i tsena zuraʼa.

¹⁴ Staɗ staɗ tèlèba a medi faɗ. Nshèlèkuraʼa di chérubim, macecèwaʼa di ndo, mamakaraʼa di marizhèlè, mafadaʼa di vezai.

¹⁵ Chérubimhai ta slèmbèdè; nasa skwi man i rka a sam woyam Kebar.

¹⁶ Aman chérubimhai ta dè, sak mota a dè a tsagi ta. Aman chérubimhai ta winè kelpasl ta, aman ta slèmbèdè a ta dè a géɗèʼa, sak mota ba ta zhè a tsagi ta.

¹⁷ Aman ta zlècèhai, tengaʼa ba ta zlècèhai. Aman ta slèmbèɗè, tengaʼa ba ta slèmbèdè a nda tengaʼa, te man Mèzhèɓ skwi man a nshèffè a zhè te va tengaʼa.

¹⁸ A nʼnjèl Ndo nzi pèc pècèk a ndo na auda a géɗ ntamagi gi Zhiklè, a ndo a deɓa a géɗ chérubimhai.

¹⁹ Aman chérubimhai to do, ta slambaɗa kelpasl a géɗèʼa, a ta hi auda a sam di ga, a sak mota a nda tengaʼa. A ta zlatsa a ntamagi gi Zhiklè, a ntamagi te civèɗ mvèng pats. Nʼnjèl Zhiklè Israel a nʼnza a géɗ tengaʼa.

²⁰ Nasa skwihi man a nshèffè, man i rka ta a sam sak Zhiklè Israel, a ma woyam Kebar. I sen ta, tengaʼa chérubimhai.

²¹ Staɗ staɗ tèlèba a medi faɗ, staɗ staɗ tèlèba a kelpasl faɗ, a skwi ngiɗè nara ri ndo tʼhwaɗ kelpasl ta.

²² A géɗ medi tengaʼa, medi ara man i rka ta a ma woyam Kebar. Staɗ staɗ tèlèba ta dè zuraʼa a ma tengaʼa.