Ezéchiel 1 - Ma Zhiklè

Zhiklè a rka na di a Ezéchiel

¹ Te mvi 30aʼa, a ki 4, mʼmèn 5, aman i nza te va ndohi Juif man ta hel ta a ɓèlè, a ma woyam Kebar, a giɗfèk a mwin na, a skwi te zhiklè a nrkay a dai.

² Mʼmèn 5 a ki sa, mvi 5 te deɓ man ta da bi Jojakin a ɓèlè,

³ Ndo nzi pèc pècèk a ngaɗa na Ezéchiel, kra Buzi, ndo mvi skwi a Zhiklè, te kokwar Chaldée, a ma woyam Kebar. A pa, Ndo nzi pèc pècèk a mfa na ri a gèɗ.

⁴ A i pu dai: I rka ara ndombozlor a shkè a civèɗ te man a géɗèʼa, vani mbiaʼa, a tsagi vani sam nhelaʼa a vogwa man a mbècè azɓai. Te ndev vogwa, skwi ngiɗè a si dai ara koturmai.

⁵ Nte ndevaʼa, skwi faɗ a nshèffê, ngi va ta ara ndo.

⁶ Gèɗ staɗ staɗ tèlèba, medi faɗ, kelpasl faɗ.

⁷ Sak tengaʼa saraʼa, ara dakwar kra zlè. Ta si di ara züdo nterkaslaʼa.

⁸ Tʼhwaɗ kelpasl ta, te zlazlar ta faɗ, ri ndo a pa. Kelpasl skwi faɗ tèlèba,

⁹ mwinèʼa, ngiɗè a lama na ngiɗè, ngiɗè a lama na ngiɗè. Aman ta dè, ta pi di a deɓa azɓai, staɗ staɗ tèlèba a dè zuraʼa a ma nengaʼa.

¹⁰ Di tengaʼa faɗ tèlèba: di man a ma, di ndo; te civèd ri mandai, di marizhèlè; te civèɗ ri gula, di marai; te civèɗ ngiɗè, di vezai.

¹¹ Kelpasl tengaʼa ta peda ma a zhiklè. A sam skwi faɗ tèlèba, staɗ staɗ a kelpasl cèw. Ngidè a lama na man a ngiɗè, a kelpasl cèw ta pizlè va ta a pa a vna.

¹² Staɗ staɗ tèlèba to do zuraʼa a ma tengaʼa, ara man Mèzhèɓ Zhiklè a feda ta ma. Aman ta dè, ta pi di a deɓa azɓai.

¹³ Te ndev skwihi a nshèffê, skwi man i rka ara ndazli vogwa, man vogwa a pa. Aman i pu dai, nara skwi ntivè vogwa, a shèwèlè te ndev skwihi a nshèffê faɗ. Vogwa a si dai, ara ndidiyam man a shkè auda te vogwa.

¹⁴ Skwi a nshèffê ta dè auna, ta dè auna ara ndidiyam.

¹⁵ I pu di a skwihi a nshèffè, na haha i rka skwi ndalalkaʼa ara sak mota a tsagi skwihi a nshèffê faɗ.

¹⁶ Sak mota ta si dai ara chrysolithe, kwa mbelaʼa. Faɗ tèlèba lèmèlèmè. Nʼngaʼa ara man sak ngiɗè ngiɗè tʼhwaɗaʼa.

¹⁷ Aman ta dè, ta slalia ta dè a tsagi faɗ tèlèba, a ta ngwèdè va a civèɗ ngiɗè azɓai.

¹⁸ Züdo man nara sak mota, di nɗaha a pa, a sak mota faɗ tèlèba.

¹⁹ Aman skwihi a nshèffê ta dè, sak mota ta dè a tsagi tengaʼa. Aman skwihi a nshèffê ta slèmbèdè, sak mota ba a slèmbèdè.

²⁰ A sam man Mèzhèɓ Zhiklè a de ta a pa, to do a pa, a sak mota ta slambaɗa a nda tengaʼa. Aman Mèzhèɓ skwi man a nshèffê faɗ sa, te va skwi man nara sak mota.

²¹ Aman ta dè, tengaʼa ba ta dè. Aman ta zlècèhai, tengaʼa ba ta zlècèhai. Aman ta slèmbèdè, sak mota ba a slèmbèdè a nda tengaʼa, te man Mèzhèɓ skwihi a nshèffè a zhè te va sak mota.

²² Gidfèk man a nzaka ta a gèd, a si dai ara cristal, kwa mbelaʼa. Nʼnga a gèd tengaʼa.

²³ Tʼhwaɗ skwi man a nʼnzaka ta a gèd, kelpasl a winèʼa, a ta mbedè va ta a pa. Staɗ staɗ tèlèba a kelpasl cèw man ta pizlè va ta a pa a vna.

²⁴ Aman ta dè, kelpasl tengaʼa a hèzlèwè, ara iyam mbiaʼa, ara daʼai Bi Zhiklè man a gèɗè, ara nhèzlèwè ndohi var. Aman ta zlatsa tʼhai, ta pizla kelpasl ta;

²⁵ nhèzlèwè a zhè a sam skwi nʼnzaka ta a gèd.

²⁶ Te géɗèʼa, nara saphir, kwa mbelaʼa; te vaʼa lèmèlèmè ara sam nʼnzi bai. A géd skwi man lèmèlèmè ara sam nʼnzi bi matsa, skwi nʼnza a pa ara ndo.

²⁷ I rkaʼa: a si dai, a hinè a sam mʼmèn skwi deɓa a ndè aman a géɗèʼa. A sam mʼmèn skwi deɓa a ndè man a godok, i rka sam nhelaʼa ara vogwa, man a hela sam man a zlatsa a pa a tsagi nengaʼa tèlèba.

²⁸ Ara kwarai man a rkè te va vanai a pats man iyam a gai; sam nhelaʼa a si dai te tsagi tèlèba. Aranta skwi man i rkaʼa, nʼnjèl Ndo nzi pèc pècèk man a ngudko va. Aman i rkaʼa, a i kalahi a deɓ sak nengaʼa. I tsena daʼai ngiɗè man a gaɗa.