Exode 9 - Ma Zhiklè

Skwi kudom

¹ Te deɓaʼa Ndo nzi pèc pècèk a ngaɗa na Moise: Do a sam Pharaon, a ka gada na: Ndo nzi pèc pècèk, Zhiklè ndohi Hébreu, a gada: Va ta civèɗ a ndohi ga, a ta gi mizlinè ga!

² Aman ka va ta civèɗ azɓai, a ka gs ta a hi genè,

³ na haha, ri Zhiklè a di a bazla skwi ndzham ngaya a gidiɓèr: plèshi, kdèhi, zlugumihi, zlèhi, tambakihi.

⁴ Aman Ndo nzi pèc pècèk a da gi a sam skwi kudom Israel tsaɗ, a sam skwi kudom ndohi Egypte tsaɗ: a skwi ndohi Israel ko staɗ a da metsi azɓai.

⁵ A Ndo nzi pèc pècèk a nhur sam patsaʼa zuraʼa, a ngaɗa: Angoslèm Ndo nzi pèc pècèk a da gi ar haha te kokwar.

⁶ Te mangoslèmaʼa a prèk Ndo nzi pèc pècèk a ngu arsa. Skwi kudom ndohi Egypte tèlèba ta bazl ta. Aman skwi ndohi Israel, ko staɗ a mʼmetsa ɓai.

⁷ A Pharaon a nzlinde ta ndohai a ta da wèrèʼa; a ta rka, skwi ndohi Israel ko staɗ a mʼmetsa ɓai. Ko ar haha ndav Pharaon nsassaya genè, a mva ta civèɗ a ndohi ɓai.

Mblè

⁸ Te deɓaʼa Ndo nzi pèc pècèk a ngaɗa ta nda Moise a Aaron: Va-ndheda mènèwèɗ a ri cèw, va-wusheda a giɗfèk a sam di Pharaon,

⁹ a ngi a lokotor te kokwar Egypte tèlèba, a nga ta mblè a va ndohai a skwi kudom te kokwar Egypte tèlèba, a voroɓ a ngi a pa.

¹⁰ A ta co mènèwèɗ a to do a sam Pharaon, a Moise a nwusheda a gidfèk, a mpa ta mblè a va ndohai, a skwi kuɗomhai, a voroɓ a ngi a pa.

¹¹ A ndohi mʼmbèh skwai ta slaha ta gi arsa a sam di Moise ɓai; aman mblè a nkala ta a va ara man a va ndohi Egypte tèlèba.

¹² Aman Ndo nzi pèc pècèk a nsassaya ndav Pharaon, a Pharaon a nfa gèɗ a ma tengaʼa ɓai, ara man Ndo nzi pèc pècèk a goɗ a matsa.

Vandzal

¹³ A Ndo nzi pèc pècèk a ngaɗa na Moise: Angoslèm a prèk te gai, do a sam Pharaon, a ka gada na: Ndo nzi pèc pècèk Zhiklè ndohi Hébreu, a gada: Va ta civèɗ a ndohi ga, a ta da slèbèrdyè!

¹⁴ Aman antanta i da faha kinè a golahi ngaya a ndohi ngaya matakwan ga tèlèba, a ka da shinèʼa, Zhiklè ngiɗè gar iyè tʼherkeda azɓai.

¹⁵ Aman agassa i woyaʼa, i slaha a i gidè ri ga a i bazl kinè a ndohi ngaya tèlèba a gidiɓèr, a ka zi ngaya tʼherkeda.

¹⁶ Aman i ɓèr ka, a ka da sun wuɗi ga, a ta da njè nzlembaɗ ga tʼherkeda tèlèba.

¹⁷ Ko antanta ka grè gèɗ ngaya, a ka va ta civèɗ a ndohi ga azɓai.

¹⁸ A géɗ nengaʼ a angoslèm a pats aranta, i zlündko vandzal nhuɓalaʼa ara man kokwar Egypte a nrka di ɓai, daga nhinkaɗ herkeda, ha patsna.

¹⁹ Gar haha zlündo ndo, a ta helda skwi kudom ngaya a skwi tèlèba te dak, a gai. Aman ndohi tèlèba, skwi tèlèba, man ta te dak, a ta da a gi ɓai, ta da bèzl ta te ri vandzal.

²⁰ Ko wawa te va golahi Pharaon, man ta gu zlau ma Ndo nzi pèc pècèk, a mɓicka ta ɓèlèlihi nengaʼa a skwi nengaʼa a gai.

²¹ Ndo man a nfa na gèɗ a ma Ndo nzi pèc pècèk ɓai, a njèkeda ɓèlèlihi nengaʼa a skwi nengaʼa a dak.

²² A Ndo nzi pèc pècèk a ngaɗa na Moise: Zlatseda ri ngaya a zhiklè, a vandzal a nzuvkaɗahi a géɗ kokwar Egypte tèlèba, a gèɗ ndohai, a géɗ skwi ndzham, a géɗ kuza te kokwar Egypte tèlèba.

²³ A Moise a ngeda gada a zhiklè, a Ndo nzi pèc pècèk a gu aman iyam a tsai, a vandzal a vogwa a shkè a vaʼa a herkeda. A Ndo nzi pèc pècèk a ngoko vandzal a kokwar Egypte tèlèba.

²⁴ Vandzal a vogwa te vaʼa a ndev ɓai, pèc pècèk, wuɗitpa, az ara mpats ngiɗè ɓai, daga ndohi ta zhè te kokwar Egypte.

²⁵ A vandzal a mbazla skwi tèlèba te kokwar Egypte tèlèba, skwi te dak, ndohai a skwi ndzham. A kuza ba, vandzal a mbazlaʼa, a wof te dak, vandzal a mbazldaussa.

²⁶ Sèi te kokwar Gosen, a sam ndohi Israel, vandzal nʼnga ɓai.

²⁷ A Pharaon a nzlündo ndo, da baha ta nda Moise a Aaron, a ngaɗa ta: Antanta i gu malai. Zhiklè kiriè nzuraʼa, iyè a ndohi ga, nga ndohi nzura ka ɓai.

²⁸ Va-tsu ri a Zhiklè kinè a géɗ nga! Vandzal a ntsi iyam dèha nga ma. I woy a i va kinè civèɗ. Kin nzi a haha azbai.

²⁹ A Moise a mʼmbeɗa na a ma: Aman i dè auda te kokwar haha, i woy a i pi ri a Ndo nzi pèc pècèk, a i tsi rai, a vandzal a gi asaɓai aman ka da suna, herkeda a Ndo nzi pèc pècèk.

³⁰ Aman kinè a golahi ngaya, i sun a vava, kin gi zlau Zhiklè Ndo nzi pèc pècèk di azbai.

³¹ Dau a gogumai ta husl ta ma. Dau, a gèɗ tʼuda ma. Skwi ngiɗè a wurzhè.

³² Marorai a menda ta husl bai, ta gu a deɓa.

³³ Aman Moise a njèkede Pharaon ma, a ndo auda te kokwar, a ntsu ri a Zhiklè. A ntsi iyam a vandzal ta gi asaɓai, a iyam a nɗal na te kokwar Egypte.

³⁴ Aman Pharaon a nrka, iyam a vandzal a ntsi iyam klèng ma, a nʼnza te mali na genè, a nsassaya ndav nengaʼa, nengaʼa a golahi nengaʼa.

³⁵ Ndav Pharaon nsassaya ara madatsuta, a mva ta civèɗ a ndohi Israel bai, ara man Ndo nzi pèc pècèk a goɗ a ma Moise te va nasa.