Exode 8 - Ma Zhiklè

¹ A Ndo nzi pèc pècèk a ngaɗa na Moise: Gaɗa na Aaron: Tarda gada nte ri ngaya a géɗ woyam, a wurrihai, a drav iyamhai, a mproko kudofihai auda a géɗ kokwar Egypte.

² A Aaron a ntarda gada a géɗ woyam te kokwar Egypte tè-lèba.

³ Aman ndohi mʼmbèh skwai ta gu lèmèlèmè arsa a maya mbèh skwi tengaʼa. Ta prokodi kudofihi auda a géɗ kokwar Egypte.

⁴ A Pharaon a mbaha na Moise a Aaron, a ngaɗa: Va-tsu ri a Zhiklè kinè, a nhulkoy kudofihai auda a tsagai, a tsagi ndohi ga, a i da va ta civèɗ a ndohi aman ta dè a ta zli skwi a Zhiklè ta.

⁵ A Moise a mʼmbeɗa na a ma Pharaon: Ngray patsaʼa, man ka woy a i tsi ri a Zhiklè a géɗ ngaya, a ndzam ta kudofìhi auda a sam ngaya, te gi ndohi ngaya, a ta hayda va ta a woyam Nil genè.

⁶ A ngaɗa: Angoslèm! A Moise a ngaɗa: Ara man ka woyaʼa. A ka da suna, skwi ngiɗè ngar Ndo nzi pèc pècèk, Zhiklè nga, azɓai.

⁷ A hela ka kudofìhi auda a tsagai, te gi ngaya, a tsagi golahi ngaya, a tsagi ndohi ngaya, a ta hayda va ta a woyam Nil genè.

⁸ Aman Moise a Aaron to do auda a sam Pharaon ma, Moise a ntsu ri a Ndo nzi pèc pècèk a géɗ kudofihai, man a nzlündokoɗa a sam Pharaon.

⁹ A Ndo nzi pèc pècèk a ntsena ntsi ri Moise: kudofihai ta bazl ta te gai, a dalmagai, te dak.

¹⁰ A ta patskoɗauda; a kokwar tèlèba a zhkè a géɗ tengaʼa.

¹¹ Aman Pharaon a nrka, kudofìhi asaɓai, a nsassaya ndav na, a nfa gèɗ a ma tengaʼa ɓai, ara man Ndo nzi pèc pècèk a goɗ a matsa.

Skwi ngiɗè ara nvakamai

¹² Te deɓaʼa Ndo nzi pèc pècèk a ngaɗa na Moise: Co gada ngaya, tsau mberfenèk herkeda, a ndi na a mvakamai te kokwar Egypte tèlèba.

¹³ A ta gu arsa: Aaron a ntor gada nte ri na, a ntsau mberfe-nèk herkeda. A mberfenèk a nʼnde na nvakamai, a ta je ndohai a skwi ndzhamhai. Mberfenèk tèlèba a géɗ herkeda a nʼnde na nvakamai te kokwar Egypte tèlèba.

¹⁴ A ndohi mʼmbèh skwai ta woy a ta pra ta nvakamai a va ndohi lèmèlèmè, a maya mbèh skwi tengaʼa. Aman ta slaha bai. Aranta nvakamai ta ndi ndohai a skwi ndzhamhai.

¹⁵ A ndohi mʼmbèh skwai ta gada na Pharaon: Ri Zhiklè a ngau. Aman ndav Pharaon nsassaya genè, a nfa gèɗ a ma tengaʼa bai, ara man Ndo nzi pèc pècèk a goɗ a matsa.

Zlra

¹⁶ Te deɓaʼa Ndo nzi pèc pècèk a ngaɗa na Moise: Angoslèm a prèk te gai, do a ma Pharaon, aman a da dè a ma woyam, a ka gada na: Ndo nzi pèc pècèk a goɗkoɗa ar haha: Va ta civèɗ a ndohi ga, a ta da slèbèrdyè.

¹⁷ Aman ka da pra ta ndohi ga azɓai, na haha, i proko kinè zlra a va, a golahi ngaya, a ndohi ngaya, a gi ngaya, a gi ndohi Egypte tèlèba ta ndha a zlra; ko sam nʼnzai, zlra a pa.

¹⁸ A pats nasa i woy a i ɓer kokwar Gosen, man ndohi ga te pa, a zlra a dè a pa azɓai, a ka da suna, iyè Ndo nzi pèc pècèk, i zhè te ndev kokwar.

¹⁹ I woy a i gia tsaɗ tsaɗ: a sam ndohi ga tsaɗ, a sam ndohi ngaya tsaɗ. Angoslèm i da ngra ka skwi haha.

²⁰ A Ndo nzi pèc pècèk a ngu arsa: zlra ɗekɗekaʼa ta hi a gi Pharaon, a gi golahi nengaʼa, te kokwar Egypte tèlèba, a ta sau matakwan tèlèba a géɗ zlra.

²¹ A Pharaon a mbaha ta nda Moise a Aaron, a ngaɗa: Anai, va-zlau skwi a Zhiklè kinè te kokwar haha!

²² A Moise a ngaɗa: Nga slaha nga gi arsa azɓai. Skwi man nga zli a Zhiklè nga, a ndara ta ndohi Egypte. Aman nga da zlèh skwi a Zhiklè a sam di ndohi Egypte, man a ndara ta, ta da kal nga a kwa.

²³ Nga woy a nga dè hèshè-kèɗ, dra a gi mʼmèn 3, a nga zli skwi a Ndo nzi pèc pècèk, Zhiklè nga, ara man Ndo nzi pèc pècèk a da njè nga.

²⁴ A Pharaon a ngaɗa: I woy a i va kinè civèɗ, a kin slaha kin zli skwi a Zhiklè kinè te hèshè-kèd. Aman kin do dra ɓai! Va-tsu ri a Ndo nzi pèc pècèk a géɗ ga!

²⁵ A Moise a mʼmbeɗa na a ma: Aman i do auda a sam ngaya ma, i woy a i tsi ri a Ndo nzi pèc pècèk, aman zlra a nhulko va na auda te gi Pharaon, te va golahi nengaʼa, te va ndohi nengaʼa tèlèba. Aman Pharaon da ngwode nga asaɓai, da va ta civèɗ a ndohai, aman ta zli skwi a Ndo nzi pèc pècèk!

²⁶ Te deɓaʼa Moise a njèkeda Pharaon, a ntsu ri a Ndo nzi pèc pècèk a géɗ nengaʼa.

²⁷ A Ndo nzi pèc pècèk a ntsena ntsi ri Moise, a nhulkoɗi zlra auda te gi Pharaon, golahi nengaʼa a ndohi nengaʼa tèlèba, aman ko staɗ njèka bai.

²⁸ Ko ar haha ndav Pharaon nsassaya genè, a mva ta civèɗ a ndohi bai.