Exode 6 - Ma Zhiklè

¹ Ndo nzi pèc pècèk a ngaɗa na Moise: Anai ka da rka skwi man i da ga na Pharaon. Wuɗi ri ga a da gi aman a va ta civèɗ, a vava. Wuɗi ri ga a gi man a nda dzamka ta auda te kokwar na.

² A Zhiklè ta goɗ ngèɗè a Moise, a ngaɗa na: I Ndo nzi pèc pècèk;

³ i gudoko na va a di a Abraham, Isaac a Jacob a nzlembaɗ Zhiklè, Bi wuɗai. Aman nzlembaɗ ga Ndo nzi pèc pècèk, i ngra ta bai.

⁴ Nga derzla ma, i da va ta kokwar Canaan, kokwar man ta nza te pa ara mbrok.

⁵ A i tsena nkudi ndohi Israel, man ndohi Egypte ta ga ta ɓèlè, a i hur nderzlè-ma nga.

⁶ Gar haha gada ta ndohi Israel: I Ndo nzi pèc pècèk, i woy a i helka kinè auda te mizlinè bèlè te kokwar Egypte, a i mbel kinè auda te ɓèlè kinè, i tèr ri ga a i preka kinè auda te ɓèl kinè, a i ga ta kita mbiaʼa.

⁷ I woy a i par kinè a ndohi ga, a i gi a Zhiklè kinè, a kin da suna, i Ndo nzi pèc pècèk, Zhiklè kinè, man a pre kinè auda te mizlinè ɓèlè man a nzala kinè te kokwar Egypte.

⁸ A i woy a i de kinè a kokwar man i mbada ta nda Abraham, Isaac a Jacob, aman i gada i da va kinè. I woy a i va kinè, iyè Ndo nzi pèc pècèk.

⁹ A Moise a ngra ta ndohi Israel. Aman ta ca ma Moise bai, a géɗ zlau mizlinè tengaʼa man wuɗitpa.

¹⁰ A Ndo nzi pèc pècèk a ngaɗa na Moise:

¹¹ Do a ka gaɗa na Pharaon, bi Egypte, da va ta civèɗ a ndohi Israel, a ta jèke-da kokwar na.

¹² Aman Moise a ngaɗa na Ndo nzi pèc pècèk: Na haha, ndohi Israel ta ca ma ga bai, a Pharaon a ncinè dè? I nukom ndo, i do goɗ ngèdè bai.

¹³ A Ndo nzi pèc pècèk a mfa ta ma a gèɗ a nda Moise a Aaron, da menda ta ndohi Israel a Pharaon, bi Egypte: sèi nga de ta ndohi Israel auda te kokwar Egypte.

Bababhi Moise a Aaron

¹⁴ Nasa bababhai: Wudahi Ruben, tsuvom Israel: Hénoc, Pallu, Hetsron a Carmi. Nasa ndohi te verzi Ruben.

¹⁵ Wudahi Siméon: Jemuel, Jamin, Ohad, Jakin a Tsochar; a Saul, kra ngwoz Canaan. Nasa ndohi te verzi Siméon.

¹⁶ Na haha nzlembaɗ wudahi Lévi, ara verzi ta, ara verzi ta: Guershon, Kehath a Merari. Mvi Lévi tèlèba, agi mvi 137.

¹⁷ Wudahi Guershon: Libni a Shimei ara verzi ta.

¹⁸ Wudahi Kehath: Amram, Jithsehar, Hébron a Uziel. Mvi Kehath tèlèba, a gi mvi 133.

¹⁹ Wudahi Merari: Machli a Mushi. Nasa ndohi te verzi Lévi, ara verzi ta, ara verzi ta.

²⁰ A Amram a nco Jo-kébed, demam bab na, a ngwoz. A nya na Aaron a Moise. Mvi Amram tèlèba a gi 137.

²¹ Wudahi Jitsehar: Koré, Népheg a Zicri.

²² Wudahi Uziel: Mishael, Eltsaphan a Sithri.

²³ Aaron a nco Elishéba, dem Amminadab, demam Nachson, a ngwoz na. A nya na Nadab, Abihu, Eleazar a Ithamar.

²⁴ Wudahi Koré: Assir, Elkana a Abiasaph. Nasa ndohi Korites.

²⁵ Eleazar, kra Aaron, a nco dem Puthiel a ngwoz. A nya na Phinées. Nasa bababhi ndohi Lévi a ndohi te verzi ta.

²⁶ Nasa Aaron a Moise, man Ndo nzi pèc pècèk a ngaɗa ta: Va-de ta ndohi Israel auda te kokwar Egypte, ara mɓicè-va tengaʼa.

²⁷ Tengaʼa man ta gada na Pharaon, bi Egypte, aman ta de ta ndohi Israel auda te kokwar Egypte – Moise a Aaron.

²⁸ Te va nasa, man Ndo nzi pèc pècèk ta goɗ ngèɗè a Moise te kokwar Egypte,

²⁹ a ngaɗa na: I Ndo nzi pèc pècèk; menda na Pharaon, bi Egypte, ma tèlèba man i da gada ka.

³⁰ Aman Moise a ngaɗa na Ndo nzi pèc pècèk: I nukom ndo, i do goɗ ngèdè ɓai. Pharaon a da cinè ma ga ɗè?