Exode 5 - Ma Zhiklè

Pharaon a gi mèdègèɗ

¹ Te deɓaʼa Moise a Aaron to do a gi Pharaon, a ta gada na: Ndo nzi pèc pècèk, Zhiklè Israel, a gada: Va ta civèɗ a ndohi ga, aman ta dè hèshèkèɗ, a ta slébèrdyè te pa.

² A Pharaon a mʼmbeɗa ta a ma: Ndo nzi pèc pècèk a wa, aman a i cinè ma nengaʼa, a i va ta civèɗ a ndohi Israel? I sun Ndo nzi pèc pècèk bai. Ndohi Israel ba, i va ta civèɗ azbai.

³ Ta gada na: Zhiklè ndohi Hébreu a ngudoko nga va a dai. Pre nga, a nga dè hèshèkèɗ, dra ara man a gi mʼmèn makar, a nga da zli skwi a Ndo nzi pèc pècèk, Zhiklè nga. Man bai a pra nga gidiɓèr a va, a bazl nga a tsakwal.

⁴ Aman bi Egypte a ngaɗa ta: Moise a Aaron, kin woy a kin helamay ndohi mizlinè, a sam mizlinè tengaʼa èhèmè? Va da gu mizlinè ɓèl kinè!

⁵ A Pharaon a ngaɗa: Ndohi ta gi wudar kumba ma, a kin woy a kin gada ta, a ta saka na va a di a mizlinè ɓèl tengaʼa dè?

⁶ A pats nasa, Pharaon a ngaɗa ta ndohi mɓer mizlinè a sojèhai:

⁷ Kuza man kin hushè a di a wujèɗ, kin va ta bai, sèi ta dè a ta zli skwi ta a ri ta.

⁸ Ko arsa, sèi kin gada ta, a ta gi kwa tar mpats ngiɗè, da jèkaha va bai, ko staɗ! Ta ndohi wudar! A gèɗ nengaʼa ta bèhè: nga woy a nga dè a nga zli skwi a Zhiklè nga!

⁹ Sèi kin va ta mizlinè a gèɗ kumba, a nkeda ta va a hai, a ta fi zlembaɗ a ma ambali azɓai.

¹⁰ A sojèhi a ndohi mɓer mizlinè to do, a ta ngra ta ndohai: Pharaon a gada, da va kinè kuza bai.

¹¹ Vo-do, va-woy skwi a ri kinè, a sam man kin ngècè kuza. Aman mizlinè a mindè va a deɓa azbai.

¹² A ndohi ta venda gèɗ a kokwar Egypte tèlèba, a ta woy kuza nhushè a di a wujèɗ.

¹³ A sojèhai ta vas ta, a ta gada: Mizlinè kinè a mindè va a deɓa azbai, sèi kin gi kwa lèmèlèmè, a nga ngrèʼa tar mpats ngiɗè, man nga va kinè kuza.

¹⁴ A ndohi mɓer ndohi Israel, man sojèhi Pharaon ta pau, ta tse ta, a ta gada ta: A patsna kin helka kwa tar mpats ngiɗè bi èhèmè?

¹⁵ A ndohi mɓer mizlinè ndohi Israel to do a sam Pharaon, a ta kuɗi a sam na: Ka ga ta matakwan a ɓèlèlihi ngaya ar haha èhèmè?

¹⁶ Ɓèlèlihi ngaya ta ngatsa kuza ɓai, a ka gada ta: Va-gu kwa! A ta tse nga a vaʼa. Man ar haha, ka gu mali a sam ndohi ngaya.

¹⁷ A nengaʼa a ngaɗa ta: Kin tèlèba, kin ndohi wudar! A géɗ nengaʼa kin gada, nga woy a nga dè a nga zli skwi a Ndo nzi pèc pècèk.

¹⁸ Va-kazlay auda a tsagai, vo-do a sam mizlinè! Da va kinè kuza ɓai, a kwa nga ngre lèmèlèmè tar mpats ngiɗè.

¹⁹ A ndohi mɓer ndohi Israel ta suna, a gi wuɗitpa a sam ta, a gèɗ man ta gada: Kwa a zi auda te ndevaʼa azɓai, ko staɗ.

²⁰ Aman to do auda te gi Pharaon, ta zlü gèɗ a Moise a Aaron, man ta zlatsa a ta zhèr ta.

²¹ A ndohi nhalaʼa ta gada ta: Ndo nzi pèc pècèk da jèke kinè ɓai, da gu kita kinè, a géɗ man kin poko na gèɗ auda a Pharaon a ndohi na, a ta ga nga shèwa, a kin va ta tsakwal a rai, a ta bazl nga a vna.

Zhiklè a baha na Moise zaʼa

²² A Moise a ntsu ri a Ndo nzi pèc pècèk, a gada: Bi-Zhiklè ka gi skwi ambaɓiaʼa a sam ndohi ngaya ar haha èhèmè? Ka zlindekayè a sam tengaʼa èhèmè?

²³ Ndè ga a sam Pharaon, a i ngra na nzlembaɗ Ndo nzi pèc pècèk, a nga ta matakwan a ndohi haha holholaʼa. Aman ka, ka pre ta auda bai.