Exode 39 - Ma Zhiklè

Maslaka Aaron

¹ A ta tsu a maslaka, maslaka mʼmadzaʼa a nduzoa a vèvèsh, aman ta gi mizlinè a sam nkezlaʼa a vna. A ta tsa na maslaka nkezlaʼa a Aaron, ara man Ndo nzi pèc pècèk a gada na Moise.

² A ta gu Ephod a guro, maslaka mʼmadzaʼa a nduzoa a vèvèzh a maslaka ntsentsai.

³ Guro ta kezla kèfkèfèa, a ta cizlèʼa ara gogumai njèrnjèrèa, a ta tsu a ta dza-kaɓda na va maslaka mʼmadzaʼa a nduzoa a vèvèzh a bata maslaka, ara man ndo nsen ntsi maslaka a giaʼa.

⁴ Ta gau ria a géɗ nkelbadza, a ta ngerzla maʼa, ta ngerzla maʼa cèw.

⁵ A ta kelawa na di maslaka a vaʼa, a mizlinè lèmèlèmè, a maslaka staɗ a vaʼa, a guro, maslaka mʼmadzaʼa a nduzoa a vèvèzh, a maslaka ntsentsai, ara man Ndo nzi pèc pècèk a gada na Moise.

⁶ Te deɓaʼa ta tül kwa onyx, ta tseda a pa a guro, ara man ndohi ngum kwa ta giaʼa, a ta vèhda nzlembaɗ wudahi Israel a pa.

⁷ A ta nüɓda a va ri maslaka a géɗ nkelbadza man a Ephod, a kwa man ta hér ndohi Israel a pa, ara man Ndo nzi pèc pècèk a gada na Moise.

⁸ Te deɓaʼa ta gau maslaka ara limbèt a maslaka ntsentsai mbelaʼa, ara man ta gu Ephod, a guro, a maslaka mʼmadzaʼa a nduzoa a vèvèzh a maslaka ntsentsai.

⁹ Tsagiaʼa faɗ lèmèlèmè, ta cèw, tsagiaʼa ndahaʼa ara gozhèm, ngurèʼa a ndèrɗè ri dèok staɗ, nguzlohaʼa a ndèrɗè ri dèok staɗ.

¹⁰ A ta nüɓda kwa mbelahiaʼa a pa, nzluhaʼa a gi civèɗ faɗ. A civèɗ nshèlè-kuraʼa, sardoine, topaze, éméraude.

¹¹ A civèɗ macecèwaʼa, escarboucle, saphire, diamant.

¹² A civèɗ mamakaraʼa, opale, agate, améthyste.

¹³ A civèɗ mafadaʼa, onyx, chrysolithe, jaspe. Ntsa te pa a guro, ta nüɓda a pa.

¹⁴ Kwa 12, ara nzlembaɗ wudahi Israel 12, ara nzlembaɗ ta. A deb kwa staɗ staɗ tèlèba ta vèhda nzlembaɗ verzi 12 staɗ a pa, ara man ndohi ngum kwa ta giaʼa.

¹⁵ Te deɓaʼa ta derzla na va maslaka ara limbèt a cirèɓ guro, ndzerngazlaʼa ara teɓa, a guro ndaɓalaʼa.

¹⁶ Te deɓaʼa ta tsaffa guro cèw, a ta gu danguri guro cèw, a ta derzla ta dangurihi cèw a ma maslaka cèw man a maslaka ara limbèt.

¹⁷ A ta derzla cirèɓ guro cèw a va dangurihi cèw a ma maslaka ara limbèt.

¹⁸ Ma cirèɓ cèw ta derzla a ma guro ntsaffaʼa cèw, a ta derzl ta a ma maslaka nkelbadza cèw, man a Ephod, a ma.

¹⁹ Te deɓaʼa ta gau dangurihi cèw, a ta derzl ta a ma maslaka ara limbèt, tʼhwaɗaʼa, a ma, te civèɗ man a Ephod.

²⁰ A ta gau dangurihi guro cèw, a ta derzl ta a ri maslaka nkelbadza Ephod cèw, te verziaʼa, a ma nengaʼa, a sam man nderzla a pa, a géɗ di maslaka Ephod.

²¹ Te deɓaʼa ta manda maslaka ara gozhèm a danguri nengaʼa, a nda danguri Ephod, a teɓa maslaka mʼmadzaʼa, a maslaka ara gozhèm a nʼnza a deɓa a di maslaka Ephod, a slaha a njèr va auda a sam Ephod azɓai; ara man Ndo nzi pèc pècèk a gada na Moise.

²² Te deɓaʼa ta gu sajibèr Ephod, a maslaka ntsentsai, mʼmadzaʼa.

²³ Nte ndev maslaka, ara daʼai limbèt mpasla, aman a kurècè azbai.

²⁴ A ta pasla te verziaʼa, a ta geda skwi ndèlèlk-ndèlèlkèʼa a pa a maslaka mʼmadzaʼa; a nduzoa a vèvèzh a maslaka ntsentsai,

²⁵ a ta gu ngurlèlèi a guro ndaɓalaʼa, a ta peda a ndev skwi ndèlèlkèʼa staɗ staɗ, a ta tèuda verzi sajibèr mpaslaʼa. Ta peda te ndev skwi ndèlèlkèʼa,

²⁶ ta veni nvenai, ngurlèlèi staɗ, a skwi ndèlèlkèʼa staɗ, a ta tèuda ma maslaka sajibèr, a ngi mizlinè Zhiklè, ara man Ndo nzi pèc pècèk a gada na Moise.

²⁷ Te deɓaʼa ta gau suɗkova a bata maslaka man a Aaron a wudahi nengaʼa, ntsentsai,

²⁸ a mpèɗè gèɗ a bata maslaka, a pokwa te gèɗ, a bata maslaka, a sirla kalahai a maslaka gogumi ntsentsai,

²⁹ a skwi deɓa a maslaka gogumi ntsentsai, mʼmadzaʼa a nduzoa a vèvèzh, a maslaka ntsentsai ndurtsotsoʼa, ara man Ndo nzi pèc pècèk a gada na Moise.

Lamba mpèdè gèɗ

³⁰ Te deɓ tèlè ta gau lamba, lamba mpèɗè gèɗ nkezlaʼa, a guro ndaɓalaʼa, a ta vèhda a pa, ara man ndohi ngum kwa ta giaʼa: Nkezlaʼa a sam Ndo nzi pèc pècèk!

³¹ A mʼmanda a deb mpèdè gèɗ a teɓa maslaka mʼmadzaʼa, ara man Ndo nzi pèc pècèk a gada na Moise.

³² Aranta ta ndeva mizlinè a sam gi nkezlaʼa, gi mɓicè-va, tèlèba. A ndohi Israel ta gau zuraʼa, lèmèlèmè ara man Ndo nzi pèc pècèk a gada na Moise. Ta gau arsa.

Kolongwi mizlinè

³³ A ta cko gi a sam Moise, gi nkezlaʼa, a kolongwi nengaʼa tèlèba: züdo nhurmaʼa, kaf, gada man ta tarda a pa, sak gai a sak tengaʼa,

³⁴ gèɗ gai a bkwi bhwal, bkwi drok nteva,

³⁵ koti ma kita a gada nengaʼa, a skwi mpizl kotai,

³⁶ table a kolongwi nengaʼa tèlèba, a movar nkezlaʼa,

³⁷ s skwi nfi vogwa a guro ndaɓalaʼa, a skwi hototok nengaʼa, man ta feda skwi nhel sam a sam tengaʼa, a kolongwi nengaʼa tèlèba, a mbar skwi nfi vogwa.

³⁸ Sam mvi skwi a Zhiklè guro, mbar man ta fèɗè a skwai, burdi man a zhkè amba, maslaka a ntamagi gi nkezlaʼa.

³⁹ Sam mvi skwi a Zhiklè züdo, a züdo njèrnjèraʼa nengaʼa ntsaffaʼa, a gada nengaʼa, a kolongwi nengaʼa tèlèba. Shidèf züdo a sak nengaʼa.

⁴⁰ Maslaka dala nʼngalaʼa, a sak gi nengaʼa, a sak tengaʼa, maslaka a ntamagi dala nʼngalaʼa, a teɓa nengaʼa, a gada mɓèr dala nʼngalda a pa, a kolongwi nengaʼa tèlèba, aman ta gi mizlinè te gi nkezlaʼa a vna.

⁴¹ Maslaka ntsentsai, aman ta gi mizlinè a sam nkezlaʼa a vna, maslaka nkezlaʼa a Aaron, ndo mvi skwi a Zhiklè, a maslaka wudahi nengaʼa, a ngi mizlinè ndo mvi skwi a Zhiklè.

⁴² Zuraʼa lèmèlèmè ara man Ndo nzi pèc pècèk a gada na Moise, ndohi Israel ta gau mizlinè tèlèba.

⁴³ Aman Moise a rka, mizlinè tèlèba a ndeva ma, ara man Ndo nzi pèc pècèk a ngaɗa na, – ta gu arsa – a mpshè ta ma.