Exode 38 - Ma Zhiklè

Sam mvi skwi a Zhiklè

¹ Te deɓaʼa a ngau sam mvi skwi a Zhiklè a wof acacia. Ngur nengaʼa a tsi ri 5, nguzloh nengaʼa a tsi ri 5, tsagiaʼa 4 lèmèlèmè, njüv nengaʼa a tsi ri 3.

² A mpeda dromhi nengaʼa a zlogomhi 4 – dromhi ta gakaɗi te gada nstaɗ a vna – a mbèʼa a züdo.

³ Te deɓaʼa a ngau kolongwi sam mvi skwi a Zhiklè tèlèba: Gandafihai, kizlèd gongong, kokwi Pombaz, magatshai, a shidèfihai: kolongwi nengaʼa tèlèba a ngau a züdo.

⁴ A ngau züdo njèrnjèrèʼa ntsaffaʼa man a sam mvi skwi a Zhiklè, zlèlè züdo, a hwaɗ sam man ta paɗa na ma a pa, a dè a hai a verziaʼa, a ngela sam mvi skwi a Zhiklè te va.

⁵ A mvüdo danguri 4 a zlogomhi züdo ntsaffaʼa 4, aman ta tarda gada a pa.

⁶ A ngau gada a wof acacia, a mbèʼa a züdo.

⁷ Te deɓaʼa a ntarda gada a danguri te tsagi sam mvi skwi a Zhiklè, aman ta slaha ta zhüɓè a vna.

Shiɗèf züdo

⁸ A ngau shidèf züdo a vaʼa, a sak nengaʼa züdo. Ta hul koturmi ngwozi man ta gu mizlinè a ma gi nkezlaʼa, a ta vüdo skwi haha a vna.

Dalmagi nʼngalda a pa

⁹ Te deɓaʼa a nʼngalda dala a dalmagi a pa: Te civèɗ dukwad, maslaka dala nʼngalaʼa a maslaka ntsentsai, a tsi ri 100,

¹⁰ a sak gi 20, a sak tengaʼa züdo 20, a sulomhi sak gai, a gada te ndevaʼa a verzhè-genè;

¹¹ lèmèlèmè te civèɗ man a géɗèʼa, a sak gi 20, a sak ta züdo 20, a sulomhi a gada te ndev sak gai a verzhègenè.

¹² Te civèɗ nkèl pats, maslaka a tsi ri 50, a sak 10, a sak tengaʼa 10, a sulomhi a gada te ndev sak gai a verzhègenè.

¹³ Te civèɗ man a ma, te civèɗ mvèng pats, a tsi ri 50.

¹⁴ Maslaka a tsi ri 15, a sak 3, a sak tengaʼa 3, te civèɗ ngiɗè,

¹⁵ lèmèlèmè te civèɗ ngiɗè: a tsagi ntamagi dala nʼngalaʼa maslaka man ta tsi ri 15, a sak 3, a sakhi tengaʼa 3.

¹⁶ Maslaka man ta tèuda dala nʼngalaʼa, tèlèba, a maslaka ntsentsai,

¹⁷ a sak gi a züdo, a sulomhi tengaʼa a verzhègenè, gèɗèʼa mbè te pa a verzhè-genè, a sak gi dala nʼngalda a pa ta derzla a gada te ndevaʼa a verzhègenè.

¹⁸ Maslaka a ntamagai man a dè a dala nʼngalaʼa ngaʼa a maslaka ntsentsai ndurtsotsoʼa, a maslaka mʼmadzaʼa nduzoa a vè-vèzh a maslaka ntsentsai, ntsi ri nengaʼa 20, mprè maslaka a tsi ri 5, nlèmdè a nguzloh maslaka man ta ngalda dala a pa a vna.

¹⁹ A sak gi tengaʼa 4, a sak 4 a züdo, a sulomhi verzhègenè, a gèɗèʼa mbè te pa a verzhègenè, a gada te ndevaʼa a verzhègenè.

²⁰ Gada man ta ɓara gi a dala nʼngalaʼa a vna, züdo.

Nlivè züdo

²¹ Na haha skwi man ta ngraʼa a pa, a sam gai, gi ma kita, man ta gau, ara man Moise a gada ta. Ndohi Lévi ta gau, a Ithamar, kra Aaron, ndo mvi skwi a Zhiklè, bi ndohi mizlinè.

²² Betsaleel, kra Uri, kra Hur, te verzi Juda, a ngau tèlèba, man Ndo nzi pèc pècèk a ngaɗka na Moise,

²³ a nda Oholiab, kra Ahisamac, te verzi Dan, ara ndo mviɗè züdo, ndo mbèzl wof, ndo ntsi maslaka mbelaʼa a ndurtsotsoʼamʼmadzaʼa a nduzoa a vèvèzh a bata maslaka.

²⁴ Guro tèlèba man ta gu mizlinè a vna a sam nkezlaʼa, guro tèlèba man ta tsakala a ta va na Zhiklè, a gi kilo 909, ara skwi nlivè nkezlaʼa.

²⁵ Verzhègenè man ta dzhoɗo te ri ndohi man ta nger ta a sam mpi ndohi Israel, a gi kilo 3.022, ara skwi nlivè nkezlaʼa.

²⁶ Ndohi man ta nger ta, staɗ staɗ tèlèba, rèta Suli verzhègenè, ara skwi nlivè nkezlaʼa; staɗ staɗ tèlèba man mvi na 20 a ndè a ma ma, a gi ndohi 603.550.

²⁷ A verzhègenè kilo 3.000 ta vüd sak sam nkezlaʼa a vna, a sak maslaka a ma gai, sak 100 a kilo 3.000, sak staɗ staɗ tèlèba kilo 30.

²⁸ A verzhègenè kilo 22 ta gau sulom sak gai, a ta mbèda gèɗ tengaʼa a ta derzla a gada te ndevaʼa.

²⁹ Züdo man ta tsakala a ta va na Zhiklè, a gi kilo 2.100.

³⁰ A nengaʼa a ngau sak ntamagi gi nkezlaʼa, sam mvi skwi a Zhiklè züdo, a züdo njèrnjè-raʼa ntsaffaʼa a pa, a kolongwi sam mvi skwi a Zhiklè tèlèba,

³¹ a sak dala nʼngalaʼa; a sak ntamagi man a dè a dala nʼngalaʼa; a gada mɓara gai a gada mɓara dala nʼngalaʼa.