Exode 37 - Ma Zhiklè

Koti ma kita

¹ Te deɓaʼa Betsaleel a ngau koti a wof acacia. Ngur nengaʼa atsi ri 2 a rèta; nguzloh nengaʼa a tsi ri 1 a rèta, njüv nengaʼa a tsi ri 1 a rèta.

² A mbèda a guro tʼhwaɗaʼa, mana deɓa ba, a ntèuda a pa a mpaɗa na guro a ma.

³ A mvüɗo danguri guro 4 a zlogomhi nengaʼa 4, danguri cèw te civèɗ ngiɗè, danguri cèw te civèɗ ngiɗè.

⁴ A ngau gada a wof acacia, a mbèda a guro.

⁵ A ntarda gada a danguri te tsagi kotai, aman ta slaha ta zhüɓ kotai.

⁶ Te deɓaʼa a ngau skwi mpizl kotai a guro ndaɓalaʼa, ngur nengaʼa a tsi ri 2 a rèta, nguzloh nengaʼa a tsi ri 1 a rèta.

⁷ A ngau chérubimhi cèw a guro, a mviɗèʼa, a mpe ta a pa a ma cèw a skwi mpizl kotai.

⁸ Chérubim staɗ a ma ngiɗè, chérubim ngiɗè a ma ngiɗè. A mpe ta chérubimhai a ma cèw a skwi mpizl kotai.

⁹ A chérubimhai ta wuzhè kelpasl tengaʼa a géɗèʼa, a ta pizlèda skwi mpizl koti a pa, a ta nzi zuraʼa a vna, a ta pi di zuraʼa a skwi mpizl kotai.

Table

¹⁰ Te deɓaʼa a ngau table a wof acacia, ngur nengaʼa a tsi ri 2, nguzloh nengaʼa a tsi ri 1, njüv nengaʼa a tsi ri 1 a rèta.

¹¹ A mbèda guro ndaɓalaʼa, a ntèuda a pa, a mpaɗa na guro a ma.

¹² A ngezlala a wof, nguzloh nengaʼa pè wudri tèlè, a ntèuda a pa, a mpaɗa na guro a ma.

¹³ A mvüɗo danguri nengaʼa guro 4, a mpe ta a sam zlogomhia faɗ, a sam man sak a pa.

¹⁴ Danguri ta derzla a pa nderc ndercaʼa a sam wofaʼa, a ta tarda gada a pa, aman ta slaha a ta zhüɓ table a vna.

¹⁵ Gada a nʼnga a wof acacia, a mbèʼa a guro, a ta zhüɓ table a vna.

¹⁶ A ngau kolongwi table, a gandafihai, a kokwi a ndèlèk a shiɗèf nengaʼa, man ta ɓèlè skwi man ta va na Zhiklè a vna – tèlèba a guro ndaɓalaʼa.

Skwi nfi vogwa

¹⁷ Te deɓaʼa a ngau skwi nfi vogwa a guro ndaɓalaʼa, a mvüdo skwi nfi vogwa, sakaʼa a gadaʼa. Gandafhi nengaʼa – mpi ta ara mwurzhè – a gakaɗi te gada nstaɗ.

¹⁸ A tsi ri 6; 3 te civèɗ ngiɗè, 3 te civèɗ ngiɗè,

¹⁹ ri staɗ staɗ a gandaf makar mpi nengaʼa ara mwurzhè – ara mwurzhè wof. Lèmèlèmè arsa a sam rihia 6, man ta shkè auda a tsagi sam nfi vogwa.

²⁰ Skwi nfi vogwa a nʼngots gandafhi 4 – mpi tengaʼa ara mwurzhè – ara mwurzhè wof –

²¹ gandaf staɗ, a verzi man a nkuzlu ri a pa nshèlèkuraʼa, a gandaf staɗ a verzi ri macecèwaʼa, a gandaf a verzi ri mamakaraʼa, a sam ri 6 tèlèba man ta shkè auda te skwi nfi vogwa.

²² Gandafhi a rihi ta gakaɗi te gada nstaɗ, tèlè te guro nstaɗ, mviɗèʼa, a guro ndabalaʼa.

²³ A ngau hototok 7 a nengaʼa, a pidökihai a ndèlèk man ta gi mizlinè a samaʼa; a guro ndaɓalaʼa.

²⁴ A ngau nengaʼa a kolongwi nengaʼa tèlèba a guro ndaɓalaʼa te di kilo 10.

Sam nʼndèr burdi a Zhiklè

²⁵ Te deɓaʼa a ngau sam nʼndèr burdi a Zhiklè, a wof acacia, ngur nengaʼa a tsi ri staɗ, nguzloh nengaʼa a tsi ri 1, tsagiaʼa 4 lèmèlèmè, njüv nengaʼa a tsi ri 2. Dromhi nengaʼa ta gakaɗi te gada nstaɗ, a vna.

²⁶ A mbèʼa a guro ndaɓalaʼa, skwi mpizlè ma nengaʼa, a tsagi nengaʼa, a dromhi nengaʼa ba. A ntèuda a mpaɗa na guro a ma.

²⁷ Te verzi mpèɗè gèɗ a mpeda danguri guro cèw a pa, a zlogomhi cèw, staɗ Tuna, staɗ Tuna a ta tarda gada a pa, aman ta slaha ta zhüɓè a vna.

²⁸ A ngau gada a wof acacia, a mbèʼa a guro.

²⁹ A ngau mbar nkezlaʼa, man ta fèɗè a skwai, a burdi man a zhkè amba, ara man ndohi ncèkèslè mbar ta tilèʼa.