Exode 36 - Ma Zhiklè

Ncèkèlè klèng

¹ Bethsaleel a Oholiab a ndohi tè-lèba man ta sun maya mizlinè, man Ndo nzi pèc pècèk a mva ta maya, a mwosl ta, a ta sun ngiaʼa, da gu mizlinè tèlèba a sam nkezlaʼa, zuraʼa lèmèlèmè ara man Ndo nzi pèc pècèk a njè ta.

² A Moise a mbaha na Betsaleel; a Oholiab, a ndohi man ta sun maya mizlinè, man Ndo nzi pèc pècèk a mva ta maya nslebi mizlinè tsaɗ tsaɗ, tèlèba man ndav tengaʼa a ngra ta, to do a sam nengaʼa a ta giaʼa.

³ A ta hul skwi man ndohi Israel ta tsakala a ngi mizlinè a sam nkezlaʼa tèlèba te ri Moise. A prèk a prèk ta hulkoɗi skwi a vaʼa a vaʼa, ara man ta woyaʼa.

⁴ Ndohi man ta sun maya mizlinè ta ɓicko va, tengaʼa man ta gu mizlinè a sam nkezlaʼa tèlèba, staɗ staɗ a mizlinè na man a giaʼa,

⁵ a ta gaɗa na Moise: Ndohi ta hulko kumba, a fena skwi man nga jhèdèʼa a mizlinè man Ndo nzi pèc pècèk a ngaɗa aman nga giaʼa.

⁶ A Moise a mboho a sam ta, a ngaɗa: Ko nguraʼa ko ngwoz da tülko skwi a nhulkoɗa vaʼa a sam nkezlaʼa asaɓai! Ta gada ta ndohi aranta, aman ta vi skwi a vaʼa asaɓai.

⁷ Aman skwi a zhè, dèʼa, a fena ba, aman ta gi mizlinè tèlèba a vna.

Gai

⁸ A ndohi tèlèba man ta sun maya mizlinè te va ndohi mizlinè, ta gu gai, a mprè maslaka 10, a maslaka gogumi ntsentsai, maslaka mʼmadzaʼa a nduzoa a vèvèzh, a chérubimhai a pa, ara man ndo nsun ntsi maslaka mbelaʼa a giaʼa; a ngau arsa.

⁹ Ngur maslaka staɗ a tsi ri 28, nguzloh nengaʼa a tsi ri 4, mbia tengaʼa lèmèlèmè.

¹⁰ A nzleɓa maslaka 5, a 5 ngiɗè arsa.

¹¹ A tsagiaʼa di maslaka mʼmadzaʼa ngulɓaʼa a pa. Lèmèlèmè a ma maslaka 5 ngiɗè.

¹² Maslaka ngulɓaʼa 50, a ma maslaka staɗ, a maslaka ngulɓaʼa 50 ngiɗè a ma maslaka 5 ngiɗè, a maslaka ngulɓaʼa ta nzi zuraʼa, nlèmdèʼa.

¹³ Te deɓaʼa a nhurma züdo 50, a ta derzla maslaka a züdo nhurmaʼa, a gai a gi a va na staɗ.

¹⁴ Te deɓaʼa a ngau maslaka a gwots ɓok, a gi a gèɗ gai. A ngu 11.

¹⁵ Ngur tengaʼa staɗ staɗ tèlèba, a tsi ri 30, nguzloh tengaʼa staɗ staɗ tèlèba a tsi ri 4: ta 11 tèlèba lèmèlèmè.

¹⁶ A nzleɓa 5 a sam staɗ, 6 ngiɗè a géɗ ta.

¹⁷ A ndoho a ma maslaka te tsagi ngiɗè, di maslaka ngulɓaʼa 50 a pa. Lèmèlèmè di maslaka ngulɓaʼa 50 a ma maslaka 5 ngiɗè.

¹⁸ Te deɓaʼa a nhurma züdo 50, a nderzla gèɗ gai, a va na staɗ.

¹⁹ Te deɓ tèlèba a ngau bkwi drok ntevaʼa a gèɗ gai, mpizleda pa a bkwi bhwal.

Wof gai

²⁰ Te deɓaʼa a ngau kaf gai, a nzlatseda, a wof acacia.

²¹ Ngur tengaʼa a tsi ri 10, nguzloh tengaʼa a tsi ri 1 a rèta.

²² Kaf staɗ staɗ ngogura a sam cèw, a ntarda kaf ngiɗè a pa. A ngu arsa a sam kaf gi staɗ staɗ tèlèba.

²³ Kaf gai a gi 20 te civèɗ dukwad,

²⁴ a ngau sak verzhègenè 40 tʼhwaɗ 20; sak cèw, cèw, a hwaɗ wof staɗ, a sam man ta gogura a pa.

²⁵ Lèmèlèmè te civèɗ man a géɗèʼa, kaf 20,

²⁶ a sak tengaʼa 40, a verzhègenè, sak cèw, cèw, tʼhwaɗ kaf staɗ.

²⁷ A kaf te civèɗ gai man a deɓa, te civèɗ nkèl pats, a gi 6.

²⁸ A ngau kaf cèw te zlogomhi gai, te civèɗ man a deɓa.

²⁹ Kaf nderzla cèw, lèmèlèmè te laɓai a ndè a géɗèʼa, a sam dangurai man a nderzl ta. A ta gu zlogomhia cèw.

³⁰ Aranta a ngau kaf 8, a sak tengaʼa a verzhègenè, sak 16, sak cèw a kaf staɗ.

³¹ Te deɓaʼa a ngau gada a wof acacia, 5 a sam kaf a dergi ngiɗè,

³² gada 5 a sam kaf a dergi ngiɗè, a gada 5 a sam kaf gai a dergi te civèɗ nkèl pats, man a deɓa.

³³ Gada te ndevaʼa a mʼmanda a ndev kaf, a hinè a sam staɗ, a ndè a sam ngiɗè.

³⁴ A mbèda kaf a guro, a danguri tengaʼa, man ta tarda gada a pa, a ngau a guro, a gada ba a mbèda a guro.

Maslaka a magai

³⁵ Te deɓaʼa a nga na maslaka a ma gai, a maslaka mʼmadzaʼa a nduzoa a vèvèzh a maslaka ntsentsai; a ngau a maslaka ntsentsai ndurtsotsoʼa, a chérubimhai a pa.

³⁶ A ngau a sak gai 4 a wof acacia, a mbèda a guro. A sulomhi tengaʼa ba a guro. A mvüɗo sak tengaʼa 4 a verzhègenè.

³⁷ Te deɓ tèlèba a ngau maslaka a ntamagai man a dè a gi nkezlaʼa, a maslaka mʼmadzaʼa a nduzoa a vèzèh a maslaka ntsentsai, maslaka ntsentsai ndurtsotsoʼa,

³⁸ a sak gi nengaʼa 5, a sulomhi nengaʼa. A mbèda gèɗ a gada te ndevaʼa a guro. A sak tengaʼa, a züdo.