Exode 35 - Ma Zhiklè

Ncèkèlè kolongwi mizlinè

¹ A Moise a mɓicko mpi ndohi Israel tèlèba, a ngaɗa ta: Skwi haha Ndo nzi pèc pècèk a va kinè, aman kin giaʼa.

² Mʼmèn 6 kin gi mizlinè. Aman a pats matsaraɗaʼa, pats nshèk va a sam Ndo nzi pèc pècèk. Ndo man a gi mizlinè a pats sa, da mets na.

³ A pats nshèk va kin vatsa vogwa te gi kinè bai!

⁴ A Moise a ngaɗa ta mpi ndohi Israel tèlèba: Skwi haha Ndo nzi pèc pècèk a njè kinè a gèɗ:

⁵ Va-tsakala skwi kinè, a kin va na Ndo nzi pèc pècèk! Staɗ staɗ tèlèba ara man ndav nengaʼa a ngra na, da ckoɗa skwi man a va na a Ndo nzi pèc pècèk: Guro, verzhègenè, züdo.

⁶ Maslaka, mʼmadzaʼa a nduzoa a vèvèzh, bata maslaka, a maslaka man ta tsu a gwots ɓok,

⁷ bkwi drok ntevaʼa, bkwi bhwal, a wof acacia.

⁸ Mbar skwi nfi vogwa, a mbar burdi man ta fèɗè a skwai, a burdi man vodzok nengaʼa a zhkè.

⁹ Kwa onyx a kwahi mbelahiaʼa ngiɗè, aman ta nübda a Ephod, a va maslaka ara limbèt.

¹⁰ A ndohi tèlèba a sam kinè, man maya mizlinè tengaʼa a zhè, da shkè, a ta gi skwi tèlèba, ara man Ndo nzi pèc pècèk, a njè nga.

¹¹ Gai, a der gai, a gèɗ gai, züdo nhurmaʼa nengaʼa, kaf gai, gada man ta tarda a dangurai, sak gai a sak tengaʼa,

¹² kotai a gada nengaʼa, skwi mpizl kotai, a maslaka a ntamagai, a ngheda kotai.

¹³ Table a gada nengaʼa, a kolongwi nengaʼa tèlèba, a movar nkezlaʼa

¹⁴ skwi nfi vogwa a kolongwi nengaʼa a nhototok a mbar skwi nfi vogwa.

¹⁵ Sam nʼndèr burdi a Zhiklè, a gada nengaʼa, a mbar man ta fèɗè a skwai, a burdi man vodzok nengaʼa a zhkè, a maslaka a ntamagai man a ndè a gai.

¹⁶ Sam mvi skwi a Zhiklè a züdo nengaʼa ntsaffaʼa, a gada nengaʼa, a kolongwi nengaʼa tèlèba, a shidèf züdo a sak nengaʼa.

¹⁷ Maslaka dala nʼngala a pa, a sak gi nengaʼa, a sakaʼa, a maslaka a ntamagi ndè a dala nʼngala a pa.

¹⁸ Gada man ta ɓara na gai, a gada man ta ɓara na dala nʼngalaʼa a pa, a teɓa tengaʼa.

¹⁹ Maslaka suɗkova man ta gi mizlinè a sam nkezlaʼa a vna, maslaka nkezlaʼa man a Aaron, ndo mvi skwi a Zhiklè, a maslaka wudahi nengaʼa, aman ta gi mizlinè mvi skwi a Zhiklè a vna.

²⁰ A mpi ndohi Israel tèlèba ta jèkeda Moise a pa a to do ta.

²¹ Te deɓaʼa ta shkè, staɗ staɗ tèlèba, ara man ndav nengaʼa a ngra na, man a fi gèɗ a Mèzhèɓ te ndav na, a ta cko skwi man ta va na Ndo nzi pèc pècèk, a ngi gi nkezlaʼa a vna, a mizlinè tèlèba te pa, a maslaka nkezlaʼa ba.

²² Ngurhi a ngwozai ta shkè: ta tèlèba man ndav tengaʼa a ngra ta, a ta hulkoɗi dasirai, skwi zlembaɗ, tèslrai, a skwi wi ngiɗè, skwi wi guro tsaɗ tsaɗ, tèlèba man ta feda skwi guro a hai a ta va na Ndo nzi pèc pècèk.

²³ A ndohi tèlèba man ta ngots maslaka mʼmadzaʼa a nduzoa a vèvèzh, bata maslaka a maslaka gwots ɓok, bkwi drok ntevaʼa a bkwi bhwal, ta hulkoɗai.

²⁴ A ndo man a woya a mvi verzhègenè a züdo, a ncko skwi man a va na Ndo nzi pèc pècèk. A ndo man a nʼngots wof acacia, aman ta gi mizlinè tèlèba a vna, a nckoɗai.

²⁵ A ngwozi tèlèba man ta sun maya mizlinè, ta min gogumai a ri ta, a ta cko skwi mʼminèʼa: maslaka mʼmadzaʼa a nduzoa a vèvèzh a bata maslaka.

²⁶ A ngwozi tèlèba man ta woya a ndav ta, a ta sun maya sa, ta min gwots ɓok.

²⁷ A bihi ta hulkoɗi kwa onyx a kwahi mbelaʼa tsaɗ tsaɗ, aman ta nüɓda a Ephod, a maslaka ara limbèt.

²⁸ A mbar burdi, a mbar skwi nfi vogwa, a mbar man ta fèdè a skwai, a burdi man vodzok nengaʼa a zhkè.

²⁹ Aranta ndohi Israel ta va na skwi a Ndo nzi pèc pècèk, ara man ndav tengaʼa a ngra ta, a ta vau a mizlinè tèlèba, ara man Ndo nzi pèc pècèk a gaɗa na Moise, aman ta giaʼa.

Ndohi mizlinè

³⁰ A Moise a ngaɗa ta ndohi Israel: Na haha, Ndo nzi pèc pècèk a mbaha na Betsaleel, kra Uri, kra Hur, te verzi Juda, a nzlembaɗ nengaʼa

³¹ a nʼndha ndav nengaʼa a Mèzhèɓ Zhiklè, a maya, a sun nslebi mizlinè a maya mizlinè tsaɗ tsaɗ,

³² a slaha a nhér maya mɓuaʼa, a giaʼa, a guro, verzhègenè a züdo,

³³ a ntseda kwa mbelaʼa a pa a guro, a sun mbèzl wof a ngi mizlinè mbelaʼa tsaɗ tsaɗ a vna.

³⁴ A mva na maya, a slaha a nslebda ta ndohi ngiɗè, a nengaʼa a Oholiab, kra Ahisamac, te verzi Dan.

³⁵ A mva ta maya nslebi mizlinè, a gèɗ, a ta gi mizlinè tsaɗ tsaɗ, ara mizlinè mvidè skwai, mizlinè mbèzl wof, mizlinè ntsi maslaka mbelaʼa, ntsi maslaka ndurtsotsoʼa mʼmadzaʼa a nduzoa a vèvèzh, a bata maslaka, ara man ndo nsun ntsi maslaka a giaʼa, a mizlinè tsaɗ tsaɗ, a ta slaha ta hér maya mɓuaʼa.