Exode 34 - Ma Zhiklè

Nderzlè-ma Ndo nzi pèc pècèk

¹ Ndo nzi pèc pècèk a ngaɗa na Moise: Gum kwa cèw, kwa ara nshèlèkurhiaʼa. A i woy a i windeda ma a pa, man a zhè a deb kwa nshèlèkuraʼa, man ka bazlaʼa.

² Tila va ngaya, aman angoslèm a prèk ka tivè za Sinai, a ka zlatsa a sam ga a gèɗ za.

³ Ndo da teva a verzi ngaya bai, ndohi ngiɗè da herdeka na va a za ɓai, a tambakihi a zlèhi da ndau mandi a der za bai!

⁴ A Moise a ngum kwa cèw, kwa ara nshèlèkurhiaʼa. Te mangoslèmaʼa a prèk, a nteva za Sinai, ara man Ndo nzi pèc pècèk a njè na a gèɗ, a nceda kwa cèw a rai.

⁵ A Ndo nzi pèc pècèk a mshkèhai te va vanai, a nzlatsa a tsagi nengaʼa, a mboho nzlembaɗ na.

⁶ A Ndo nzi pèc pècèk a mbeza auda a sam di Moise, a mboho: Ndo nzi pèc pècèk, Ndo nzi pèc pècèk – Zhiklè man ndo a sia te va, man pombi na zhè, man a zhèr skwi a ma ma, a ndav amba, nlèɓèslèa a vata ba,

⁷ man pombi na a zhè a verzi ndohi gozhèm gozhèm kumba, man a pra ta mphömè a maharam a malai a ndohai, aman a pra ta ambali ka bai, aman a gi kita a sam wudahi a géɗ mali bab ta, te verzi bab ta, te mamakaraʼa, te mafaɗaʼa.

⁸ A Moise a ngurɓahai, a herkeda, a nkalahai a deb sak nengaʼa, a ngaɗa:

⁹ Ndo nzi pèc pècèk, man i ngots pombai a sam di ngaya, ka Ndo nzi pèc pècèk, do a nda nga. Aman ndohi haha ta tsena gèɗ bai. Pra nga mphömè a mali nga, ge nga a ndohi nʼndi gi ngaya!

¹⁰ A Ndo nzi pèc pècèk a ngaɗa na: Na haha nga derzla ma a ka: I woy a i gi nrkedi a sam ndohi ngaya tèlèba, ara man nʼnga bai zlèzlèa, a géɗ herkeda tèlèba, a sam ndohi ngiɗè tèlèba; a ndohi tèlèba man ka zhè a sam ta, ta da rka skwi man Ndo nzi pèc pècèk a giaʼa. Aman i da gi skwi mwuɗitpa a sam ngaya.

¹¹ Gu skwi man i gada ka a patsna. Na haha i da dzam ta ndohi Amor, Canaan, Heth, Phérez, Hévi a Jébus a ma ngaya.

¹² Gu maya, ka da derzla ma a nda ndohi kokwar man ka dè a pa bi kla, man bai a da kalda ka a gadda.

¹³ Sèi kin zlerda sam mvi skwi a zhiklèhi tengaʼa aussa, kin bazla kwa man ta Zlatseda, a kin gedassa mblom tengaʼa aussa.

¹⁴ Ka da tsu ri a Zhiklè ngiɗè bai! Aman nzlembaɗ Ndo nzi pèc pècèk, srak, i Zhiklè, i srak.

¹⁵ Ka da derzla ma a ndohi kokwar sa bai! Aman ta vi ndav ta a zhiklèhi ta, a ta zli skwi a zhiklèhi ta, a ta baha ka a pa, wa ngiɗè ba, a ka da ndi vri tengaʼa.

¹⁶ Wa ngiɗè ba, ka da hil ngwozi wudahi ngaya te va dalahi tengaʼa. Te deɓaʼa, aman dalahi tengaʼa ta da vi ndav ta a zhiklèhi tengaʼa, ta da pe ta wudahi ngaya a wai, a ta vi ndav ta a zhiklèhi tengaʼa zaʼa.

¹⁷ Ka vüɗ skwi ngiɗè a ka sla na Zhiklè ɓai!

¹⁸ Gau ngolala movar man skwi nshé-gèrè a te di ɓai: Mʼmèn 7 ka ndau movar man skwi nshégèrè a te di ɓai, a pats man i njè ka a gèɗ, a ki Abib, a géɗ man a ki nengaʼa ka jèkeda kokwar Egypte.

¹⁹ Tsuvom skwai, a ga ga. Tsuvom skwihi ngaya, man ngurhiaʼa, tsuvom zlè a tambak, a ga ga.

²⁰ Tsuvom kɗèh ngaya, ka humbèdè a kra tambak; aman ka woy a ka humbèdè azbai, momorɓoslama na daʼai. Tsuvom wudahi ngaya tèlèba, ka humbèɗèʼa. A ta shkè a sam di ga azbai, man skwa te ri bai.

²¹ Gau mizlinè mʼmèn 6; aman a pats matsaraɗaʼa, sok va! Ko te va man ta pizhè, ko te va man ta ɓicè skwai, ka sok va!

²² A ka gu ngolala tsuvom skwai, anshèlèkurdau. A ka gu ngolala mbicè skwai, man vi ngiɗè klèng ma.

²³ Ndohi ngaya, ngurhi tèlèba, da ɓica va a sam Ndo nzi pèc pècèk, Zhiklè Israel, sak makar tʼhwaɗ mvai.

²⁴ Aman ka dè a sam Ndo nzi pèc pècèk, Zhiklè Israel, sak makar tʼhwaɗ mvai, i da dzam ta ndohi herkeda a ma ngaya, a i herda ka kuma ngaya a deɓa, a ndo ngiɗè a cèma ka kokwar ngaya azbai

²⁵ Pombaz skwi man ka zloho, ka da va na Zhiklè a va movar man skwi nshégèrè a te di ɓai. Tambak Pâque kin jèkahahai a mangoslèm bai!

²⁶ Skwi mbelmbelaʼa, skwi nshèlèkuraʼa te gi dau ngaya, ka ckoɗa gi Ndo nzi pèc pècèk, Zhiklè ngaya. Ka tu kra ɓok te wa mam na bai!

²⁷ A Ndo nzi pèc pècèk a ngaɗa na Moise: Windo ma haha! A géɗ ma haha nga derzla ma nga a ka a Israel.

²⁸ A Moise a nʼnza a pa a sam Ndo nzi pèc pècèk, pats 40 a mʼmèn 40, a nʼnda skwa bai, a nsa iyam bai. A Zhiklè a mwindo nderzlè-ma a deb kwa, ma kula.

²⁹ Aman Moise a mshkèhi te za Sinai (kwa cèw a ma kita te rai, aman a nshkèhi te za), a sun a ngaɗa medi ga nhela, te va man ta goɗ a Ndo nzi pèc pècèk, a sun ɓai.

³⁰ Aman Aaron a ndohi Israel ta rka Moise, na haha medi nengaʼa nhela, a ta gi zlau aman ta herda na va.

³¹ A Moise a mbaha ta a sam na. A Aaron a bihi mpi ndohai to do a deɓa a sam na, a Moise a ngaɗa ta.

³² A ndohi Israel tèlèba to do a pa, a Moise a mʼmenda ta ma tèlèba man Ndo nzi pèc pècèk a gada na a géɗ za Sinai.

³³ Aman Moise a ngaɗa ma klèng ma, a nʼngheda di nengaʼa a maslaka.

³⁴ Aman Moise a ndo a gai a sam Ndo nzi pèc pècèk, aman ta gèdè a vna, a nca maslaka na auda a dai, ha a mshkè auda zaʼa. Aman a mshkè auda ma, a mʼmenda ta ndohi Israel ma man Zhiklè a njè na.

³⁵ A ndohi Israel ta rka medi Moise nhela. A Moise a nʼngheda di na a maslaka, ha a ndè a deɓa a gi zaʼa, aman ta gèdè a Ndo nzi pèc pècèk.