Exode 33 - Ma Zhiklè

Ndohi Israel ta jèkeda samaʼa

¹ Te deɓaʼa Ndo nzi pèc pècèk a ngaɗa na Moise: Do a nda ndohi man ka helka ta te kokwar Egypte, a kin dè a kokwar man i mbada ta nda Abraham, Isaac a Jacob, a i gada: I woy a i va ta ndohi verzi kinè.

² A i woy a i zlindè gol ga a ma ngaya, a i dzam ta ndohi Canaan, Amor, Heth, Phérez, Hévi, a Jébus,

³ a kin dè a kokwar man wa a vongwom a hi te pa. I feda kinè ma a pa azbai, a géɗ man kinè ndohi man kin tsena gèɗ bai. Wa ngiɗè ba, i da gedas kinè a civèɗ.

⁴ Aman ndohi ta tsena ma ndzoan haha, a mbeɗama ta ndav, ndo a vi skwi wi a va azɓai.

⁵ A Ndo nzi pèc pècèk a ngaɗa na Moise: Gada ta ndohi Israel: Kinè ndohi man kin tsena gèɗ bai. Aman i do do a ndev kinè, a i nzi te ndev kinè kèshkata genè, ar i gedas kinè ma. Anai va-peda skwi wi kinè a hai, a i da rka skwi man i da ga kinè.

⁶ A ndohi Israel ta peda skwi wi tengaʼa a hai, a ta hinè ngi arsa a sam za Horeb.

⁷ A Moise a nco gi nkezlaʼa a nda feda a dala, daf kata a sam man ta geda gi ta a pa, a mbaha na gi mɓicè-va. Ndo man a woya a jhèɗè ma a sam Ndo nzi pèc pècèk, a ndo auda a gi mɓicè-va a dala, daf kata.

⁸ Aman Moise a mdo auda, a ndè a sam gi mɓicè-va, ndohi tèlèba ta slambaɗa, a ta zlatsa a ntamagi ta, a ta pu di a verzi Moise, ha a ndo a gi nkezlaʼa.

⁹ Aman Moise a ndo a gi nkezlaʼa, sak vani njèraʼa a mshkèhai, a nzlatsa a ma gi nkezlaʼa. A Ndo nzi pèc pècèk a ngaɗka na Moise.

¹⁰ Aman ndohi tèlèba ta rka vani njèraʼa a ma gi nkezlaʼa, a nslambaɗa, ta kalahi a deb sak ta, staɗ staɗ tèlèba a ntamagi na.

¹¹ A Ndo nzi pèc pècèk a ngaɗa na Moise, ta peda di a iyam di iyam dai, ara man ta goɗ a mandai na. Te deɓaʼa Moise a mʼmèn na a deɓa a sam man ta geda gi ta a pa. Josué, ndo ntakaha, kra Nun, gola, a njèkeda gi nkezlaʼa ɓai.

¹² A Moise a ngaɗa na Ndo nzi pèc pècèk: Na haha ka fay ma a gèɗ, aman i de ta ndohi haha a ma. Aman ka ngray nengaʼa man ka woy a ka zlinday a verzi ga ɓai. Ka gada: I sen ka a nzlembaɗ ngaya, a ka ngots pombai a sam di ga.

¹³ Anai, aman i ngots pombai a sam di ngaya, ngray skwi man ka woy a ka giaʼa, a i da suna, a i ngècè pombai a sam di ngaya. Huro, ndohi haha, ndohi ngaya.

¹⁴ A Ndo nzi pèc pècèk a mʼmbeɗa na a ma Moise: I dè a ma ngaya. I woy a i de ka a sam nshèk va.

¹⁵ A nengaʼa a ngaɗa: Aman ka dè a ma nga azbai, ka de nga a ma ma bai.

¹⁶ Man bai nga da shinè te mè, nga a ndohi ngaya nga ngots pombai a sam ngaya; sèi man ka dè a nda nga, a nga a ndohi ngaya nga cko gèɗ auda aranta a sam ndohi a gèɗ herkeda tèlèba.

¹⁷ A Ndo nzi pèc pècèk a ngaɗa na Moise: Skwi man ka dzhoɗo a haha ba, i woy a i giaʼa, te man ka ngots pombai a sam di ga, a i sen ka a nzlembaɗ ngaya.

¹⁸ A nengaʼa a ngaɗa: Ngray nʼnjèl ngaya!

¹⁹ A mʼmbeɗa na a ma: I woy a i bizhdè pombi ga tèlèba a sam di ngaya, a i woy a i bèhè nzlembaɗ Ndo nzi pèc pècèk a ma ngaya. A ndo man i va na pombai, a nʼngots pombai a vava; a ndo man a siyè te va, a siyè te va a vava.

²⁰ A ngaɗa na: Ka slaha ka rka di ga azbai; aman ndo man a rkayè, a nzi a nshèffè azbai.

²¹ Ndo nzi pèc pècèk a ngaɗa: Na haha, sam a zhè a tsagi ga. Zlatsa a gèɗ godokwom haha!

²² Aman nʼnjèl ga a da bizhè a sam ngaya, i de ka a slrats kwa, a i wuzhè ri ga a gèɗ ngaya, ha i do ga auda a sam ngaya.

²³ Aman i da cè ri ga auda, ka slaha ka pakay di a verzai. Aman di ga, ndo a slaha a nrka bai.