Exode 32 - Ma Zhiklè

Mari guro

¹ Aman ndohi ta rkaʼa, Moise a nzi dai a géɗ za, nshkèhi tsam-tsam bai, ta ɓiceda va a sam Aaron, a ta gada na: Washkè, rama nga zhiklè nga, aman a dè a ma nga. Nga sun skwi man a nga na ndo haha bai, Moise, nengaʼa man a nhelka nga auda te kokwa. Egypte.

² A Aaron a ngaɗa ta: Va-hulkoɗauda te zlembaɗ ngwozihi kinè, wudahi kinè, a dalahi kinè, danguri guro tèlèba, a kin ɓickoda a sam ga!

³ A ndohi ta hulko danguri guro tèlèba auda te zlembaɗ ta, a ta ckoɗa a sam Aaron.

⁴ A Aaron a nco guro te ri tengaʼa, a ngeda a deb kwa, a nroma ara marai. Ta gada: Na haha zhi-klèhi ngaya, Israel, man ta helka ka auda te kokwar Egypte!

⁵ Aman Aaron a nrkaʼa, a nrom sam mvi skwi a Zhiklè, a ma nengaʼa, a mboho: Angoslèm nga da gi ngolala Zhiklè!

⁶ Te mangoslèmaʼa a prèk te gai, ta slambaɗa, a ta keɗa skwai, a ta ndara na a Zhiklè, a ta va na skwi te pombai; te deɓaʼa ndohi ta nzahai, aman ta ndi skwai, a ta si skwai, a ta slambaɗa, aman ta gècè a ta gi mphömè.

⁷ Ndo nzi pèc pècèk a ngaɗa na Moise: Do, sulomahai, ndohi ngaya, man ka helka ta auda te kokwar Egypte, ta gi malai.

⁸ Tsam-tsam ta jèkeda civèɗ man i ngra ta. Ta gau marai a ta tsu ri a nengaʼa, a ta zla na skwai, a ta gada: Na haha zhi-klèhi ngaya, Israel, tengaʼa man ta helka ka auda te kokwar Egypte!

⁹ A Ndo nzi pèc pècèk a ngaɗa na Moise: I rkaʼa, ndohi haha ta tsena gèɗ ɗai.

¹⁰ Antanta i woy a i gi ndav a vata a géɗ tengaʼa, a i gedas ta. Te deɓaʼa i woy a i ge ka a verzi ndohi mbiaʼa.

¹¹ A Moise a ntsu ri a Zhiklè, a ngaɗa: Bi ga, ka woy a ka gi ndav a géɗ ndohi ngaya èhèmè? Ndohi man ka helka ta auda te kokwar Egypte a wuɗi ri ngaya?

¹² Ehèmè ndohi Egypte ta da gada: A nhelka ta auda, aman a de ta a matakwan, a ngedas ta te za, a nzede ta tʼherkeda? Jèkeda ndzoan ngaya, manda ndav ngaya a hai!

¹³ Hur bèlèlihi ngaya, Abraham, Isaac a Israel, aman ka mbada ta a ma ngaya, a ka gada ta, i woya man i ga kinè tser a vata, a kin mènè a vata, ara bantihai te gidfèk, a kokwar haha tèlèba, man i gada i da va kinè, i woy a i va ta ndohi verzi kinè a mèdèp.

¹⁴ A Ndo nzi pèc pècèk a mʼmanda ndav na a hai, a nʼnga ta matakwan a ndohi bai, ara man a hur nshèlèkuraʼa.

Moise a mpasla kwa ma kita

¹⁵ Te deɓaʼa Moise a ngwodko gèɗ a deɓa, a mshkèhi te za, a kwa man ma kita a pa, te rai, kwa mwindèa te tsagi cèw, a deɓaʼa, tʼhwaɗaʼa ba.

¹⁶ Kwa, nengaʼa man Ndo nzi pèc pècèk a ngau; skwi mwindèa man a pa, Ndo nzi pèc pècèk mwindo, mvèhaʼa a pa.

¹⁷ Aman Josué a ntsena lalau var a zhè a sam ndohai, a ngaɗa na Moise: Lalau var a zhè a sam ta.

¹⁸ Aman nengaʼa a ngaɗa: Lalau ngul ndohi ka ɓai, lalau sabi ka ɓai, lalau nlèyè ka ɓai, i tsena ara lalau dimèsh.

¹⁹ Aman Moise a nherda na va a sam man ndohi ta nza a pa, a nrka marai, a ngècè tengaʼa, ndav nengaʼa a vècè ara vogwa, a nkalda kwa a hai a ndav, a kwa mpasl na a der za.

²⁰ Te deɓaʼa a nco marai man ta gau, a nfa na vogwa, a nkerɗaʼa ara shölölöm, a nkutèda a géɗ iyam, a mva ta ndohi Israel a ta siaʼa.

²¹ A Moise a ngaɗa na Aaron: Ndohi haha ta ga ka mè, aman ka fa ta mali mbiaʼa a gèɗ?

²² Aaron a mʼmbeɗa na a ma: Ka gu ndav bai, bi ga. Ka sun te gèɗ ngaya, ndohi ta gucè azbai.

²³ Ta gadayè: Rama nga zhiklèhi a ta dè a ma nga; aman nga sun skwi man a nga na Moise, ndo haha man a nhelka nga auda te kokwar Egypte, ɓai.

²⁴ A i gada ta: Va-hulkoɗi skwi wi guro a va kinè! A ta ckoyè, a i wusheda vogwa, a nde na a marai.

Ndohi Lévi ta pi ndav a Zhiklè

²⁵ Aman Moise a nrka, ndohi ta gucè azbai, a Aaron a mpra ta civèɗ a ndohai, a ta mbèh skwai, a mayamhi tengaʼa ta ngwossaha ta ɓukɓukaʼa,

²⁶ Moise a nzlatsa a sam man ta geda gi a pa, a mboho: Ndo man a woy Ndo nzi pèc pècèk, da shkè a sam ga! A ndohi Lévi, tèlèba ta ɓicko va a sam na.

²⁷ A ngaɗa ta: Ndo nzi pèc pècèk, Zhiklè Israel, a gaɗkaɗa: Staɗ, staɗ tèlèba, da dzawa va a tsakwal tʼrai. Vasawala te gi te gi te gai, va-bazl ta tèlèba, kramamhai, mandalahai, gwoli kinè!

²⁸ A ndohi Lévi ta gau, ara man Moise a fa ta ma a gèɗ. A ndohi ta bazl ta a pats nasa, a gi 3.000.

²⁹ A Moise a ngaɗa: Va-vau nshèffè kinè a mizlinè Ndo nzi pèc pècèk, a patsna, staɗ staɗ te di man a kra na, a kramam na, a va kinè mpshè ma a patsna.

³⁰ Te mangoslèmaʼa a prèk, Moise a ngaɗa ta ndohai: Kin gu mali mbiaʼa. Anai i woya man i dè a géɗ za a sam Ndo nzi pèc pècèk, a i rka, aman i slaha a i pil mali kinè.

Moise a tsi ri a Zhiklè zaʼa

³¹ A Moise a mdo a deɓa a sam Ndo nzi pèc pècèk, a ngaɗa: Ndohi ta gu mali a vata. Ta vüɗo Zhiklè a guro.

³² Dara ka pra ta mali tengaʼa; man bai gedassa nzlembaɗ ga te dèlèwèr ngaya man ka Windo.

³³ A Ndo nzi pèc pècèk a ngaɗa na Moise: I woya man i gedassa sèi nzlembaɗ ndo man a ngu mali a sam ga te dèlèwèr ga.

³⁴ Antanta do, de ta ndohi a sam man i gada ka. Na haha, i zlindè gol ga a man ngaya. Aman pats ngiɗè a i da ga ta kita a géɗ mali ta.

³⁵ Arsa Zhiklè a mva ta ma ambaɓiaʼa a gèɗ, a géɗ man ta tsu ri a marai man Aaron a gau.