Exode 31 - Ma Zhiklè

Ndohi mizlinè gi nkezlaʼa

¹ Te deɓaʼa Ndo nzi pèc pècèk a ngaɗa na Moise:

² Na haha, i baha na Betsaleel, kra Uri, kra Hur, te verzi Juda.

³ I ndha ndav nengaʼa a Mèzhèɓ Zhiklè, a maya, a i woslaʼa, a sun ngi mizlinè tsaɗ tsaɗ.

⁴ A hér ngi skwi mɓuaʼa, a gi a guro, verzhègenè, a züdo,

⁵ a gum kwa mbelahiaʼa, a tseda a pa a guro, a bèzl wof a ngi skwi tsaɗ tsaɗ a vna.

⁶ Na haha i va na Oholiab, kra Ahisamac, te verzi Dan, a tsagai. A i va ta maya nslebi skwi a ndohi man ta ngots maya te gèɗ, aman ta gi skwi tèlèba ara man i njè ka a gèɗ.

⁷ Gi nkezlaʼa, koti ma kita, skwi mpizl kotai, a kolongwi gi nkezlaʼa tèlèba:

⁸ table a kolongwi nengaʼa, skwi nfi vogwa guro ndaɓalaʼa a kolongwi nengaʼa tèlèba, sam nʼndèr burdi a Zhiklè,

⁹ sam nʼndèr skwi a Zhiklè a kolongwi nengaʼa tèlèba, a shiɗèf a sak nengaʼa,

¹⁰ maslaka ntsentsai a maslaka nkezlaʼa man a Aaron, ndohi mvi skwi a Zhiklè, a maslaka wudahi nengaʼa, man ta gi mizlinè mvi skwi a Zhiklè a vna,

¹¹ mbar man ta fèɗè a skwai, a burdi man vodzok nengaʼa a zhkè amba, man ta gi mizlinè a vna a sam nkezlaʼa. Gau tèlè, zuraʼa, lèmèlèmè ara man i ngra ka; sèi ta da gia arsa.

¹² Ndo nzi pèc pècèk a ngaɗa na Moise:

¹³ Gada ta ndohi Israel: Va-gu maya a pats nshèk va ga tèlèba! A ta sunka kinè auda, te verzi kinè a ndè a ma ma pèc pècèk, a ndohi ta suna, i Ndo nzi pèc pècèk, i kezla ndav kinè.

¹⁴ Gar haha va-gu maya a a pats nshèk va: a woy kin kezlaʼa. Ndo man a slébèrdè azbai, da mets na! Ndo man a gi mizlinè a pats nshèk va, da gedasseda nshèffè nengaʼa aussa te va gwoli na.

¹⁵ Va-gu mizlinè mʼmèn 6; aman pats matsaraɗaʼa, nshèk va mbiaʼa, nkezlaʼa a sam Ndo nzi pèc pècèk. Ndo man a gi mizlinè a pats nshèk va, da mets na.

¹⁶ Gar haha ndohi Israel, sèi ta ɓer pats nshèk va, sèi ta slébèrdè pats nshèk va ndèzl, te verzi tengaʼa a ndè a ma ma pèc pècèk.

¹⁷ Te skwi haha nga shin va nga auda a mèdèp, nga a ndohi Israel. Aman te mʼmèn 6 Ndo nzi pèc pècèk a ngau giɗfèk a herkeda. Aman a pats matsaradaʼa a nsok va te mizlinè.

¹⁸ Aman ta goɗ a Moise a géɗ za Sinai klèng ma, Zhiklè a mva na kwa cèw, a ma kita a deɓaʼa, man Zhiklè a mwindeda pa a ri na.