Exode 30 - Ma Zhiklè

Sam nʼndèr burdi a Zhiklè

¹ A ka gi sam nʼndèr burdi a Zhiklè. Gau a wof acacia.

² Ngur nengaʼa a tsi ri 1, nguzloh nengaʼa a tsi ri 1, tsagiaʼa 4 lèmèlèmè, njüv nengaʼa a tsi ri 2. Dromhi na, ta shkè auda te gada nstaɗ.

³ A ka mbèʼa a guro ndaɓalaʼa, gèɗèʼa, a tsagiaʼa, a dromhi na, a ka paɗa na gèɗ a guro.

⁴ Gau danguri guro cèw, te verzi mpèdè gèɗ. A ka pe ta a zlogomhi cèw, a civèɗ staɗ staɗ, a ta tarda gadahi a pa, a ta zhüɓèʼa a vna.

⁵ Gau gada a wof acacia, a ka mbèʼa a guro.

⁶ A ka feda a ma maslaka ntamagai, man a ngheda koti man ma kita te pa, a ma skwi mpizl kotai, a sam man i woy a nga zli gèɗ a ka.

⁷ Aaron da fa na vogwa a pa a burdi man vodzok nengaʼa a zhkè. A prèk a prèk, aman a til skwi nfi vogwa, da fa na vogwa.

⁸ A dakwaɗ ba, aman Aaron a fi vogwa a skwi nfi vogwa, da fa na vogwa, a gi a skwi man vogwa nengaʼa a zhkèha Ndo nzi pèc pècèk, te verzi tengaʼa a ndè a ma ma pèc pècèk.

⁹ Kin vay skwi ngiɗè a samaʼa ɓai, burdi ngiɗè man kin ndaraʼa, movar ka ɓai, a kin ɓalay skwi a pa bai.

¹⁰ Aaron da pul gèɗ malai a sam drom sam mvi skwi a Zhiklè, sak staɗ tʼhwaɗ mvai. Da pul gèɗ malai, a sam na, a pombaz skwi mpil gèɗ malai man ta vau, sak staɗ tʼhwaɗ mvai, te verzi tengaʼa a ndè a ma ma pèc pècèk. Nengaʼa nkezli nkezlaʼa a sam Ndo nzi pèc pècèk.

¹¹ Ndo nzi pèc pècèk a ngaɗa na Moise:

¹² Aman ka nger ta ndohi Israel, tengaʼa man ta ngrèʼa, staɗ staɗ da pela nshèffè na a sulai a sam Ndo nzi pèc pècèk, man ɓai matakwan a da ga ta, aman ta nger ta.

¹³ Staɗ staɗ tèlèba man ta ngrèʼa, da vau rèta Suli guro, man ta livèʼa, a skwi nlivè nkezlaʼa, Suli guro te di guéras 20. Rèta Suli guro, skwi man ta cèkèlè a ta va na Ndo nzi pèc pècèk.

¹⁴ Ndo staɗ staɗ tèlèba man ta ngrèʼa, man mvi na 20 a ndè a ma ma, da tsakala skwi man a va na Ndo nzi pèc pècèk.

¹⁵ Ndo mèshèlè a ndo ntawassaʼa ta vi rèta Suli guro lèmèlèmè, aman kin cèkèlè skwi a Ndo nzi pèc pècèk, a mpil gèɗ nshèffè kinè.

¹⁶ Ka cèkèlè Suli mpil gèɗ te ri ndohi Israel, a ka gu mizlinè a sam gi nkezlaʼa a vna, a nʼndi a Suli mpil gèɗ nshèffè ndohi Israel, a Ndo nzi pèc pècèk a nda hér ta.

¹⁷ Ndo nzi pèc pècèk a ngaɗa na Moise:

¹⁸ Gau shidèf züdo staɗ, a sakaʼa züdo, a ka pèn va te pa. Feda a ndev gi nkezlaʼa a sam mvi skwi a Zhiklè, a ka ɓalda iyam a pa,

¹⁹ a Aaron a wudahi nengaʼa ta pènè rai a sak te pa.

²⁰ Aman ta dè a gi nkezlaʼa, sèi ta pènè va ta, a iyam, aman ta metsi azbai. Lèmèlèmè aman ta herda na va a sam mvi skwi a Zhiklè, a ta gi mizlinè tengaʼa, a ta fa na vogwa a skwi man ta va na Zhiklè te vogwa.

²¹ Sèi ta pènè rai a sak te pa, aman ta metsi azbai. Sèi ta gi arsa ndèzl, nengaʼa a ndohi verzi nengaʼa, te verzi tengaʼa, a ndè a ma ma pèc pècèk.

²² Ndo nzi pèc pècèk a ngaɗa na Moise:

²³ Co mbar burdi, porko mbelmbelaʼa, aman a zhkè: myrrhe ka livè 500 sicles, man a hi a ri na: cinnamone 250 sicles; roseau man a zhkè, 250 sicles;

²⁴ casse, 500 sicles, ara skwi nlivèʼa nkezlaʼa; a mbar dèok kata.

²⁵ Gau mbar nkezlaʼa a vna, man ta fèdè a skwai, ndzakaɓa a boma, ara man ndo ntsakasla mbar a tilèʼa. Da gu mbar nkezlaʼa man ta fèdè a skwai.

²⁶ A ka faɗda a va gi nkezlaʼa, a va koti man ma kita te pa,

²⁷ a table, a kolongwi nengaʼa tèlèba, a skwi nfi vogwa a kolongwi nengaʼa tèlèba, a sam nʼndèr burdi a Zhiklè,

²⁸ a sam nʼndèr skwi a Zhiklè a kolongwi nengaʼa tèlèba, a shidèf züdo a sak nengaʼa.

²⁹ A ka pe ta a mizlinè Zhiklè arsa, a ta ndi a skwi nkezli nkezlaʼa. Ko wawa man a lama ta, nkezla mènè.

³⁰ A ka faɗa ta mbar a gèɗ a Aaron a wudahi nengaʼa, a ka pe ta a mizlinè Zhiklè, a ta gi a ndohi mvi skwi a Zhiklè.

³¹ A ka gada ta ndohi Israel: Skwi haha da gu a mbar nkezlaʼa, man ta fèdè a skwai, te verzi kinè, a ndè a ma ma pèc pècèk.

³² Ta fèɗè a va ndo azbai, a kin tsakasla ngiɗè lèmèlèmè bai; nengaʼa nkezlaʼa, da nza a sam kinè a nkezlaʼa mènè.

³³ Ndo man a ntsakasla, man mizlinè nengaʼa ka bai, ndo man a tsaka na ndo a dala, da gedassedaussa te va gwoli na.

³⁴ Ndo nzi pèc pècèk a ngaɗa na Moise: Co mbar burdi: Kuɗ wof man a zhkè amba, ongle odorant, galbanum, encens, a ka livè lèmèlèmè,

³⁵ a ka gu a burdi man vodzok nengaʼa a zhkè, ntsakasla ara man ndo ntsakasla mbar a tilèʼa, boma te dai, zi a te pa bai, a ta gi mizlinè nkezlaʼa a vna.

³⁶ Co kètè, a ka kerzhèʼa mbelembela, a ka ckoɗa gi nkezlaʼa a sam ma kita, a sam man i woy a nga zli gèɗ a ka. Da ga a skwi kinè nkezli nkezlaʼa.

³⁷ Burdi man vodzok nengaʼa a zhkè, man ka tsakasla arsa, kin tsakasla skwi kinè ngiɗè arsa bai! Da ga ka a skwi nkezlaʼa a sam Ndo nzi pèc pècèk.

³⁸ Ndo man a giaʼa, a woya a mwuffe a gèɗ vodzok man a zhkè, sèi da gedassedaussa te va gwoli na.