Exode 28 - Ma Zhiklè

Maslaka ndohi mvi skwi a Zhiklè

¹ Gada na Aaron, kramam ngaya, wudahi nengaʼa, a ta shkè auda te va ndohi Israel, a ta zlècè a sam ngaya, a ta ndi a ndohi mvi skwi a Zhiklè. Aaron a wudahi nengaʼa: Nadab, Abihu, Eleazar, a Ithamar.

² A ka ga na maslaka nkezlaʼa a Aaron, kramam ngaya, a nslébèrdè a nʼnjèlè.

³ Goɗ a ndohi tèlè man maya ta ta zhè, man i va ta maya nslebi skwai, a ta gi maslaka Aaron, a ta faɗa na mbar a gèɗ, a ndi a ndo mvi skwi a Zhiklè.

⁴ Maslaka haha sèi ta giaʼa. Maslaka ara limbèt, Ephod, sajibèr, a gadabu maslaka, mpèdè gèɗ, a skwi deɓa. Da ga ta maslaka nkezlahiaʼa a Aaron, kramam ngaya, a wudahi nengaʼa, aman a gi a ndo mvi skwi a Zhiklè.

⁵ A ta cè guro, a maslaka mʼmadzaʼa a nduzoa a vèvèzh a bata maslaka, a ta gi maslaka a vna.

Ephod

⁶ Ephod sèi ta gi a guro, a maslaka mʼmadzaʼa, a nduzoa a vèvèzh, a maslaka ntsentsai, ara ndo man a sun ntsi maslaka a tsiaʼa.

⁷ Riaʼa a zhè cèw, a géɗ nkelbadza, a ta ngerzla maʼa.

⁸ Di maslaka nkelawda na a va na, da gu a mizlinè lèmèlèmè, da gu a maslaka staɗ a vna, a guro, a maslaka mʼmadzaʼa a nduzoa a vèvèzh, a maslaka ntsentsai.

⁹ A ka hil kwa onyx cèw, a ka vèhda nzlembaɗ ndohi Israel a pa,

¹⁰ nzlèmbaɗ 6 a deɗ kwa staɗ, nzlèmbaɗ 6 ngiɗè a deb kwa ngiɗè, ara mbegédèʼa, mbegèɗ.

¹¹ A mizlinè ngum kwa ka vèhda nzlèmbaɗ verzi Israel a kwa cèw, ara man ndohi ngum skwai ta giaʼa. A ta tseda guro a pa.

¹² Kwa cèw, ka nüɓda a va Ephod, a ta ndi a kwa man ta hér nzlèmbaɗ verzi Israel te pa. Aaron a nhelda nzlèmbaɗ verzi Israel a nkelbadza na, a sam di Ndo nzi pèc pècèk, a Ndo nzi pèc pècèk a hér ta.

¹³ Te deɓaʼa tsaffa guro,

¹⁴ a cirèɓ guro cèw, ngaʼa ara teɓa, dzerngazla ara teɓa, a ka kelawa na cirèb guro a va guro ntsaffaʼa.

Maslaka ara limbèt

¹⁵ Te deɓaʼa gau maslaka ara limbèt man ta gi kita a vna, ndo man a sun ngi mizlinè sa, da gau. Da gu lèmèlèmè ara Ephod: a guro, a maslaka mʼmadzaʼa a nduzoa a vèvèzh, a maslaka ntsentsai, ka da gau.

¹⁶ Tsagiaʼa 4 lèmèlèmè, ta cèw, tsagiaʼa ndahaʼa ara gozhèm, ngurèʼa ndérɗè ri dèok staɗ, nguzlohaʼa ndérɗè ri dèok staɗ.

¹⁷ A ka nüɓda kwa mbelahiaʼa a pa, zluhaʼa a gi civèɗ 4; a civèɗ nshèlè-kuraʼa, sardoine, a topaz, a émeraude.

¹⁸ A civèɗ macècèwaʼa, escarboucle, saphir a diamant;

¹⁹ a civèɗ mamakaraʼa, agathe, a hyacinthe, a améthyste;

²⁰ a civèɗ mafadaʼa, chrysolithe, cornaline, a jaspe. Ta nüɓda kwa a pa a ta tseda pa a guro.

²¹ A woy kwa 12, ara nzlèmbaɗ verzi Israel 12. Ta vèhda nzlèmbaɗ verzi Israel a pa, ara man ndohi ngum kwa ta giaʼa, nzlèmbaɗ staɗ a deb kwa staɗ.

²² A ka derzla na va maslaka ara limbèt, cirèɓ guro, ndzerngazla ara teɓa,

²³ a ka gi danguri 2 a va maslaka ara limbèt, danguri cèw a ma nengaʼa cèw.

²⁴ Ngerzla cirèɓ guro cèw a danguri cèw a ma maslaka ara limbèt.

²⁵ Ma cirèɓ te civèɗ ngiɗè cèw, ngerzla a ma guro ntsaffaʼa céw, ka derzla a géɗ maslaka nkelbadza man a ma Ephod.

²⁶ A ka gi danguri guro cèw ngiɗè a vaʼa, a ka derzl ta a ma maslaka ara limbèt, cèw, te man a civèɗ Ephod.

²⁷ A ka da gu danguri guro cèw ngiɗè a vaʼa, a ka derzl ta a ma maslaka nkelbadza cèw, man a Ephod, a ma, a sam man ka humda a pa, a géɗ di maslaka Ephod.

²⁸ A ta da manda danguri maslaka ara limbèt, a danguri Ephod, a teɓa maslaka mʼmadzaʼa, a mfa na a deɓa a di maslaka Ephod, a maslaka ara limbèt a slaha a jèr va auda a sam Ephod bai.

²⁹ Aranta, aman Aaron a dè a sam nkezlaʼa, do do a nzlèmbaɗ verzi Israel te go-zhèm maslaka ara limbèt, nzlèmbaɗ ta a zhè a ndav na, te gozhèm ngi kita, a Ndo nzi pèc pècèk a hér ta.

³⁰ Ka da peda urim a tummim a gozhèm maslaka ara limbèt, a ta zhè a ndav Aaron a ngi kita, aman a dè a pa a sam Ndo nzi pèc pècèk. A Aaron a nhelda kita ndohi Israel pèc pècèk a sam Ndo nzi pèc pècèk aranta, a ndav na.

Sajibèr Ephod

³¹ Sajibèr Ephod, gu a maslaka mʼmadzaʼa,

³² daʼai te ndevaʼa, ma daʼai mpasla, ntsaʼa ndadalaʼa, aman a kurècè azbai.

³³ Mpasla te verziaʼa, a ka geda skwi ndèlèlk-ndèlèlkaʼa a pa, a maslaka mʼmadzaʼa a nduzoa a vèvèzh, a ka tèuda verzi mpaslaʼa a vna, te ndev skwi ndè-lèlkaʼa staɗ staɗ, ngurlèli guro,

³⁴ a ka tèuda ma maslaka sajibèr te verziaʼa a pa tèlè a ngurlèli guro staɗ, a skwi ndèlèlkaʼa staɗ, a ngurlèli staɗ, a skwi ndèlèlkaʼa staɗ.

³⁵ A Aaron a mviaʼa a va, aman a dè, a gi mizlinè Zhiklè, a ta cinè nslhè nengaʼa, aman a dè a sam nkezlaʼa, a sam Ndo nzi pèc pècèk, aman a metsi azɓai.

Lamba a medai

³⁶ Geda lamba a medi a guro, a ka vèhda a pa, ara man ndohi ngum skwai ta giaʼa: Nkezlaʼa a sam Ndo nzi pèc pècèk!

³⁷ A ka manda a deb mpèdè gèɗ a medi a teɓa maslaka mʼmadzaʼa.

³⁸ Da nza a medi Aaron, a Aaron da hul mali ndohi Israel tèlèba man ta gau a sam skwi nkezlaʼa man ndohi Israel ta va na Zhiklè. Da nza a medi nengaʼa pèc pècèk, aman ta ngècè pombai a sam Ndo nzi pèc pècèk.

³⁹ A ka da pi gadabu maslaka, a bata maslaka, a ka haɗawaraʼa; a ka gu mpèɗè gèɗ a bata maslaka; a skwi deɓa a maslaka ntsentsai ndurtsotsoʼa.

⁴⁰ A ka ga ta suɗkova maslaka a wudahi Aaron, a skwi deɓa, a pokwa te gèɗ, a nslébèrdè ta, a nʼnjèl ta.

Maslaka a va ndohi mvi skwi a Zhikiè

⁴¹ A ka va ta a va a nda Aaron a wudahi nengaʼa, a ka faɗa ta mbar a gèɗ, a ka ndha ta ri tengaʼa, a ka pe ta a sam mizlinè Zhiklè, a ta gi a ndohi mvi skwi a Zhiklè.

⁴² Va ta sirla kalahai, a ta ngheda verzi a vna, ta feda a godor, ta gurmbèzh.

⁴³ A Aaron a wudahi nengaʼa ta viaʼa a va, aman ta de a gi nkezlaʼa, aman ta dè a sam mvi skwi a Zhiklè, a ta gi mizlinè a sam nkezlaʼa, aman ta fi mali a gèɗ ta azbai, a ta metsi azbai. Sèi ta gi aranta ndèzl, nengaʼa a ndohi verzi tengaʼa pèc pècèk.