Exode 27 - Ma Zhiklè

Sam mvi skwi a Zhiklè

¹ Te deɓaʼa gu sam mvi skwi a Zhiklè a wof acacia. Ngur nengaʼa a tsi ri 5, nguzloh nengaʼa a tsi ri 5, tsagraʼa 4 lèmèlèmè. Njüv nengaʼa a tsi ri 3.

² A zlogomhia faɗ, drom a pa. Drom a sam mvi skwi a Zhiklè a shkè auda te gada nstaɗ, a ka mbèda sam mvi skwi a Zhiklè a pa a züdo.

³ Ga na gandafhi, aman ta pècè mèrwèc a vna, a kizlèɗ gongong, a kokwi Pombaz, magatshai a shiɗèfihai. Vüd kolongwi nengaʼa tèlèba a züdo.

⁴ Gau züdo njèrnjèraʼa, a ka tsaffaʼa, nara zlèl züdo, a danguri züdo 4, te zlogomhi sam mvi skwi a Zhiklè faɗ.

⁵ Slerda a hwaɗ sam man ta paɗa na ma a pa, a dè a hai a verziaʼa, a ngela sam mvi skwi a Zhiklè te va.

⁶ A ka gi gada sam mvi skwi a Zhiklè, a wof acacia, a ka mbè a züdo.

⁷ A ta tarda gada a dangurai, a ta nza a tsagi cèw, man ta zhüɓ sam mvi skwi a Zhiklè.

⁸ Gau ara nguzlungor kotai, ara man i ngra ka a géɗ za; gu arsa!

Dalmagi nʼngataʼa a pa

⁹ Ngelda dala a dalmagai. Te civèɗ dukwad, a maslaka nkelawda pa, maslaka ntsentsai, civèɗ staɗ a tsi ri 100.

¹⁰ Wof zlazlar a woy a gi 20, a sak tengaʼa 20 arsa, a züdo. Sulom wof zlazlar a gada man ta ɓara na wof, a verzhègenè.

¹¹ Lèmèlèmè maslaka te civèɗ ngurèa te man a géɗèʼa, a tsi ri 100. A wof zlazlar 20, a sak tengaʼa 20 a züdo, a sulom wof zlazlar a gada man ta ɓara na wof a verzhègenè.

¹² Nguzloh nengaʼa te civèɗ nkèl pats, nʼngala a maslaka man a tsi ri 50, a wof zlazlar 10 a sak tengaʼa 10.

¹³ Maʼa, te civèɗ man pats a vangka te pa, nguzloh nengaʼa a tsi ri 50.

¹⁴ Maslaka man a tsi ri 15 a wof zlazlar 3, a sak tengaʼa 3, te civèɗ ri gula,

¹⁵ lèmèlèmè maslaka man a tsi ri 15, a wof zlazlar 3, a sak tengaʼa 3, te civèɗ ri mandai,

¹⁶ Ntamagi dalmagai man ta ngalda pa a woya a nʼngots maslaka staɗ, nguzloh nengaʼa a tsi ri 20, a maslaka mʼmadzaʼa a nduzoa a vèvèzh, maslaka ntsentsai, ndurtsotsoʼa, a wof 4 a sak tengaʼa 4.

¹⁷ Wof zlazlar man ta ngalda dala a dalmagi a pa a vna, ta derzla a gada verzhègenè, a sulom verzhègenè, a sak tengaʼa züdo.

¹⁸ Ngur dalmagi nʼngalaʼa a pa, a woya a tsi ri 100, nguzloh nengaʼa 50, njüv nengaʼa a tsi ri 5, a maslaka ntsentsai. Sakhiaʼa a züdo.

¹⁹ Kolongwi mizlinè gi tèlèba, a sak gi tèlèba, a sak dalmagi nʼngalaʼa a pa, a züdo.

Mbar

²⁰ A ka da fa ta ma a gèɗ a ndohi Israel, a ta cko ka mbar vogwa nkuzlerküzleraʼa a sam nfi vogwa, a vogwa mvatsa te pa pèc pècèk.

²¹ Te gi nkezlaʼa, a ma maslaka a ntamagi man a ngheda koti a ma kita te pa, Aaron a wudahi nengaʼa ta til sam nfi vogwa a pa, a vogwa a hél sam daga dakwaɗ, a nda na ma a prèk, a sam di Ndo nzi pèc pècèk. Skwi haha ndohi Israel sèi ta giaʼa ndèzl, te verzi tengaʼa, te verzi tengaʼa pèc pècèk.