Exode 25 - Ma Zhiklè

Mizlinè ntil gi nkezlaʼa

¹ Ndo nzi pèc pècèk a ngaɗa na Moise:

² Gada ta ndohi Israel, a ta tsakalkay skwai: Ndo staɗ staɗ da tsakalkay skwi ara man ndav nengaʼa a woyaʼa.

³ Ta cèkèlè: guro, verzhègenè, züdo,

⁴ maslaka mʼmadza a nduzoa a vèvèzh, bata maslaka, a maslaka man ta tsu a gwots ɓok,

⁵ bkwi drok ntevaʼa, a bkwi bhwal, a wof acacia.

⁶ Mbar skwi nfi vogwa, mbar ɓurdi man ta fèɗè a skwai, a burdi man vodzok nengaʼa a zhkè.

⁷ Kwa onyx a kwahi mbelaʼa ngiɗè, man ta pi a pa a Ephod, a maslaka ara limbèt.

⁸ A ta gayè sam nkezlaʼa, aman i nzi a sam tengaʼa.

⁹ Va-gu lèmèlèmè a skwi nlèmdè gai, a skwi nlèmdè kolongwi a pa, man i da ngra ka.

Kotai

¹⁰ Gu koti a wof acacia; ka livè ngur nengaʼa, a tsi ri 2 a rèta; nguzloh nengaʼa a tsi ri 1 a rèta; njüv nengaʼa a tsi ri 1 a rèta.

¹¹ Ka mbèda pa a guro ndaɓalaʼa, hwaɗaʼa, a deɓa ba, ka mbèʼa, a ka paɗa géɗèʼa a guro.

¹² Ka viɗè danguri nengaʼa faɗ a ka pi a sam sak faɗ, danguri cèw te civèɗ ngiɗè, danguri cèw te civèɗ ngiɗè.

¹³ A ka gu gada a wof acacia, a ka mbèda pa a guro.

¹⁴ A ka tarda gada a danguri te tsagi kotai, a ta slaha ta zhüɓèʼa te pa.

¹⁵ Gada da nza te danguri kotai, ta phodauda ɓai.

¹⁶ Ma kita man i va ka, ka ngheda a kotai.

¹⁷ Te deɓaʼa ka gi skwi mpizl kotai a guro ndaɓalaʼa; ngur nengaʼa a tsi ri 2 a rèta; nguzloh nengaʼa a tsi ri 1 a rèta.

¹⁸ A ka gi chérubimhi cèw a guro – ka viɗ ta – staɗ te tsagi nguzlohaʼa cèw, a skwi mpizl kotai.

¹⁹ Chérubim staɗ, te tsagi ngiɗè, ngiɗè te tsagi ngiɗè. Ka pi chérumimhai te tsagi cèw a skwi mpizl kotai.

²⁰ A chérubimhai ta wuzhè kelpasl a géɗèʼa, a géɗ skwi mpizl kotai, a ta nzi zuraʼa a vna, a ta pi di zuraʼa a skwi mpizl kotai.

²¹ A ka pi skwi mpizl koti a géɗ kotai; a ma kita man i da va ka, a hwaɗ kotai.

²² A samaʼa i woy a nga zli gèɗ a ka, a sam skwi mpizl kotai, te ndev chérubimhi cèw, man ta a géɗ koti ma kita, i woya man a i ngra ka skwi tèlèba, man i woy a ka menda ta ndohi Israel.

Table

²³ Gu table a wof acacia. Ngur nengaʼa a tsi ri cèw; nguzloh nengaʼa a tsi ri staɗ; njüv nengaʼa a tsi ri 1 a rèta.

²⁴ Ka mbèda pa a guro ndaɓalaʼa, a ka tèuda a pa, paɗa na guro a ma.

²⁵ Ka gezlala a wof, ga nguzloh nengaʼa pè wudri tèlè, a ka tèuda a pa, paɗa na guro a ma.

²⁶ Gu danguri guro faɗ a nengaʼa, a ka venda a sam zlogomhi faɗ, a sam man sak a pa.

²⁷ Derzla danguri a pa nderc ndercaʼa a sam wofaʼa, a ta tarda gada a pa, a ta slaha a ta zhüɓ table te pa.

²⁸ Gau gada a wof acacia, a ka mbèda pa a guro, a ta zhüɓ table a vna.

²⁹ Gau gandaf a kokwi a shiɗèf a ndèlèk, a va nengaʼa, a ta ɓèl skwi man ta va na Zhiklè a vna. Gau a guro ndaɓalaʼa.

³⁰ A géɗ table, a woy movar nkezlaʼa a zhè a sam di ga pèc pècèk.

Skwi nfi vogwa

³¹ Te deɓaʼa gau skwi nfi vogwa, a guro, ndaɓalaʼa; ka vidè skwi nfi vogwa, sakaʼa a gadaʼa. Gandafihai – mpi tengaʼa ara mwurzhè – a gakaɗi te gada guro nstaɗ.

³² A tsi ri 6, makar te civèɗ ngiɗè, makar te civèɗ ngiɗè,

³³ ri staɗ staɗ a gandaf makar – mpi nengaʼa ara mwurzhè – ara mwurzhè wof. Lèmèlèmè arsa a sam ri 6, man ta shkè auda a tsagi sam nfi vogwa.

³⁴ Skwi nfi vogwa a woya a nʼngots gandaf! 4 – mpi ta ara mwurzhè – nara mwurzhè wof.

³⁵ Gandaf staɗ a sam gada staɗ, a verzi man a kuzlu ri a pa nshèlèkuraʼa, gandaf staɗ, a verzi man a kuzlu ri a pa nshèlèkuraʼa, gandaf staɗ a verzi ri macecèwaʼa, a gandaf a verzi ri mamakaraʼa, a sam ri 6 tèlèba man ta shkè auda te gada staɗ.

³⁶ Da gakaɗi te gada guro nstaɗ, gandafihi a rihai, nvida a guro ndaɓalaʼa.

³⁷ Te deɓaʼa gu hototok 7 a ka pi skwi nhél sam a pa 7, a ta hél sam.

³⁸ A pidökihi sam nfi vogwa a ndèlèk man ta gi mizlinè a samaʼa a vna, a guro ndaɓalaʼa.

³⁹ Da gu a nengaʼa a kolongwi nengaʼa tèlèba a guro ndaɓalaʼa te di kilo 30.

⁴⁰ Gu maya, aman ka da gu skwi tèlèba lèmèlèmè ara skwi nlèmdèʼa man i da ngra ka a géɗ za.