Exode 24 - Ma Zhiklè

Moise a géɗ za Sinai

¹ Zhiklè a ngaɗa na Moise: Va-tüvkaɗa géɗè a a sam Ndo nzi pèc pècèk, kinè a Aaron, Nadab a Abihu, a ndohi Israel nhalaʼa 70. Va-tsu rai, va-nzaka dra!

² Moise staɗ a gèɗ na da herda na va a Ndo nzi pèc pècèk; aman tengaʼa da herdeka na va bai, ndohi da shkè a géɗèʼa a verzi ngaya bai!

³ Te deɓaʼa Moise a mshkè, a mʼmenda ta ndohai ma nkwèr Ndo nzi pèc pècèk, a ma kita nengaʼa tèlèba. A ndohi tèlèba ta goɗ a ma staɗ, a ta gada: Ma tèlèba, man Ndo nzi pèc pècèk a mva nga, nga woy a nga jèjèrèʼa.

⁴ A Moise a mwindo ma Zhiklè tèlèba. Te mangoslèmaʼa a prèk, a ngau sam mvi skwi a Zhiklè a der za, a nzlatseda kwa ndzaraʼa 12, ara verzi Israel 12.

⁵ Te deɓaʼa a mbaha ta golahi Israel, a ta ndara na skwi a Ndo nzi pèc pècèk, a ta zlaha mamokwa marihai, a ta va na Zhiklè te pombai.

⁶ A Moise a nco rèta Pombaz, a mɓalda a gandaf, rèta ngiɗè a nguceda a sam mvi skwi a Zhiklè.

⁷ Te deɓaʼa a mco dèlèwèr ma Zhiklè, a njongo a sam di ndohai. A ta gada: Skwi tèlèba man Ndo nzi pèc pècèk a njè nga a gèɗ, nga woy a nga giaʼa, a nga woy a nga cinèʼa.

⁸ Te deɓaʼa Moise a nco pombaz, a nguca ta a va ndohai, a ngaɗa: Na haha Pombaz nderzlè-ma, man Ndo nzi pèc pècèk a derzla a nda kinè, a géɗ ma nengaʼa haha tèlèba.

⁹ Te deɓaʼa Moise a Aaron, Nadab a Abihu a ndohi Israel nhalaʼa 70, ta teva a géɗèʼa,

¹⁰ a ta rka Bi Zhiklè Israel; sam sak nengaʼa kwa saphir, di a rkè cerhaʼa te pa, ara giɗfèk nhelaʼa.

¹¹ A Zhiklè a ntara ri aman a gédèshè ndohi Israel nhalaʼa bai. Ta slaha ta rka Zhiklè, a ta nzi a nshèffè a sam nengaʼa.

¹² A Ndo nzi pèc pècèk a ngaɗa na Moise: Washkè a sam ga a géɗ za, nza a pa, a i va ka kwa, man i windeda ma kita ga a ma nkwèr ga a pa, a i slebda kinè.

¹³ A Moise a to do a Josué, ndo ntakaha, a to do a géɗ za Zhiklè.

¹⁴ A ngaɗa ta ndohi nhalaʼa: Va-nza a haha, ha i shkè a deɓa a sam kinè. Na haha, Aaron a Hur ta zhè a sam kinè; ndo man ma nengaʼa a zhè, do do a sam ta!

¹⁵ Aman Moise a dèagédza, vanai a mbèd géɗ za a pa.

¹⁶ A nʼnjèl Ndo nzi pèc pècèk a nʼnza a géɗ za Sinai, a vanai a mbèd géɗ za a pa, mʼmèn 6; a pats matsaraɗaʼa, Zhiklè a mbaha na Moise te va vanai.

¹⁷ Ndohi Israel ta rka nʼnjèl Ndo nzi pèc pècèk ara vogwa man a ndi skwi a géɗ za.

¹⁸ A Moise a mdo a va vanai. A Moise a mdo a géɗ za, a nʼnza a géɗ za pats 40 a mʼmèn 40.