Exode 23 - Ma Zhiklè

Ndohi mayamhai

¹ Ka tsokol ma ambali bai! Ka takaha ndo malai a malwuɗi ncèkèlma bai!

² Ka dzodzor nhèyè ndo a sam man ta gi skwi ambaɓiaʼa bai. Ko a sam kita ka gada ta ma a va a ndohi nhaya ɓai, aman ka da terɗa ta kita a gèɗ a ndohi ɓai.

³ Ko mbelaw ndo ka takaha a sam kita a nʼngwèdè ma bai.

⁴ Aman zlè man bai kɗèh ndo mayam ngaya a nzlak na, a ka ngotso, mbalda a deɓa a ngwi a sam na.

⁵ Aman ka ngots kɗèh ndo mayam ngaya, a nkala tʼhai a skwi a deɓa, ka jèkeda a pa bai, slambaɗda.

⁶ Ka terɗa ta kita a gèɗ a ndohi ntawassa bai!

⁷ Kazla ngay auda a sam skwi man a ngwèdè ndo. Ndo man a nga mali bai, man a ngau zuraʼa, ka ngela na kita mʼmetsi a gèɗ bai. A ndo man a ngau malai, ka pra bai.

⁸ Ndo man a woya a ruɓ ka, ka co bai! Ndo man ta ruɓa, a di a pa na a dai, a térɗa ta ma a gèɗ a ndohi man ta gau zuraʼa.

⁹ Ka ga na matakwan a ndo mbrok bai! Kin sun nʼnzi ndo mbrok, aman kinè ba kin goko mbrok te kokwar Egypte halaʼa.

Nshèk va

¹⁰ Mvi 6 ka gi gi dau ngaya, a ka ɓicè skwiaʼa.

¹¹ Te mvi matsaraɗaʼa da jèkeda a mohozo, a ka jèka ta a ri a ndohi ntawassaʼa, a ta ngècè skwi nʼndi te pa. Njèkèɗi skwai, skwi dak da ndau. Lèmèlèmè gi lak ngaya a wof ngaya,

¹² Mʼmèn 6 gau mizlinè ngaya; a pats matsaraɗaʼa sok va, a zlè ngaya, a kɗèh ngaya ta shèk va, a kra ɓèlè ngaya, a mbrok ngaya, a ta manda nshèffè a hai.

¹³ Va-ɓür va kinè te skwi tèlèba man i njè kinè a gèɗ. Nzlembaɗ zhiklèhi ngiɗè ka slefu bai, da shkè auda te ma ngaya bai!

Ngolala Israel

¹⁴ Sak makar tʼhwaɗ mvai ka gi ngolala ga.

¹⁵ Ngolala movar man skwi nshégèr skwi a te di bai. Mʼmèn 7 ka ndau movar man skwi nshégèr skwi te di bai, ara man i njè ka, a ki Abib; aman a pats nasa ka jèkeɗa kokwar Egypte. Man skwa te ri bai, da shkè a sam ga bai!

¹⁶ Te deɓaʼa ngolala skwi nslaʼa. Te tsuvom skwi gi dau ngaya; a ngolala mɓicè skwai, man vi a dè auda.

¹⁷ Ndohi ngaya, ngurhai, ta da shkè a sam di Bi Zhiklè sak makar tʼhwaɗ mvai.

¹⁸ Pombaz skwi man ka zlayè, ka humda ɓai a movar man skwi nshégèrè te dai. Mbeza skwi man ka vayè a sam ngolala, ka fedahi a mangoslèm bai.

¹⁹ Te tsuvom skwi gi dau ngaya, makaɓai, ka ckoɗa gi Ndo nzi pèc pècèk, Zhiklè ngaya. Kra ɓok ka ta te wa mam na bai.

Mpèsl ri a géɗ ndè a kokwar Canaan

²⁰ Na haha i zlindè gol ga a ma ngaya, da ɓer ka a civèɗ, da de ka a sam man i tilaʼa.

²¹ Gau maya a géɗ ngaya, a sam na; fu gèɗ a ngèɗè nengaʼa, ka Sala va a sam na bai. Aman kin da tèwèɗè ma nengaʼa, a da pra kinè mali kinè azbai. Aman iyè, te nengaʼa.

²² Aman ka fi zlembaɗ a ngèdè nengaʼa zuraʼa, a ka gi tèlèba ara man a gada ka, i woy a i gi a mayam ndohi mayamhi ngaya, a i gi a ndo nzumda gèɗ a ndohi man ta zumda ka gèɗ.

²³ A gol ga a dè a ma ngaya, a de ka a sam ndohi Amor, Heth, Phérez, Canaan, Hévi a Jébus, a i da zede ta.

²⁴ Ka da tsu ri a zhi-klèhi tengaʼa bai, ka da tsosl mblom tengaʼa bai, ka da gu lèmèlèmè ara tengaʼa bai, aman sèi ka zlerdaussa; kwa man ta Zlatseda a ta shin samaʼa te pa, ka paslama na gèɗ.

²⁵ Va-gu mizlinè Ndo nzi pèc pècèk, Zhiklè kinè, a i pshè kinè ma a movar kinè a iyam nsi kinè, a i cè matakwan auda tèlèba a sam kinè.

²⁶ Ngwoz a mèn kra a hi azbai, ngwoz man delai, azbai, te kokwar ngaya. A i gi a ka da metsi te babgai.

²⁷ A sam tèlèba man ka dè a pa, ta gi zlau ngaya; zlau ngaya a da dzakabama ta gèɗ a ndohi tèlèba man ka ndi-kè a sam ta, a ndohi mayamhi ngaya tèlèba ta hi ta auda a sam ngaya.

²⁸ I da zlindè mangavar zlè a ma ngaya, a ta da dzam ta ndohi Hévi, Canaan, Heth auda a sam ngaya.

²⁹ I da dzam ta te mvi staɗ ka ɓai; herkeɗa da nda a hèshèkèɗ ɓai, a skwi dak da mana a vata a gedas ka ɓai.

³⁰ I da dzam ta auda a sam ngaya a maya maya, ha verzi ngaya a mènè a vata, a ka ndha kokwar.

³¹ Sam ngaya a da hinè a sam woyam mbiaʼa nduzoa, a ndè a sam iyam mbiaʼa man a ndohi Philistie, a hinè a sam hèshèkèɗ, a ndè a ma woyam Euphrate. A vava i da va ka ndohi kokwar a rai, a ka da dzam ta auda a ma ngaya.

³² Ka da derzla va a tengaʼa a zhiklèhi tengaʼa bai!

³³ Da nza a herkeda ngaya bai, man bai ta da pe ka a wai, a ta de ka a sam malai. Aman ka da tsosl mblom tengaʼa, ka da kèlèhi a gaddaʼa.