Exode 22 - Ma Zhiklè

Metsar skwi kudom

¹ Ndo man a cè zlè man ɓai tambak a metsar a keɗaʼa, man ɓai a prèʼa, da pa na zlè zlam te di man a zlè staɗ, a tambakihi faɗ te di man a tambak staɗ.

² Aman ta ngots ndo metsar a géɗ skwai, a ta keɗaʼa, ta gi kita a ndo nkeɗaʼa ara ndo nked ndo azɓai.

³ Aman a gau a pats, sèi a pilèʼa a ndo nkeda ndo. Aman skwi man a pilè a vna azɓai, sèi ta preda ma, a ta pilè a vna.

⁴ Aman ta ngots skwi man a hul a metsar a deɓa a sam na, ko zlè ko kɗèh, ko tambak, na zhè a nshèffè dai, a vi skwi staɗ a vaʼa, te di skwi staɗ staɗ tèlèba.

Mpre skwai a gi dau ndo ngiɗè

⁵ Aman ndo ngiɗè a mpreda skwi a gi dau ndo ngiɗè, man ɓai a gi lak, a ta ndeda skwi a ma te pa, da pela na a skwi te gi dau, a skwi te gi lak mbelaʼa.

⁶ Aman vogwa a hèrè a nsawak, a ndeda nkèl dau a dau ntseɓiaʼa a ma, a ngedasseda gi dau aussa, ndo nfu vogwa a pil skwi man vogwa a ndau.

⁷ Ndo ngiɗè a nco sulai, a skwi mèshèlè, a ngheda a ri ndo ngiɗè, a ta cedama a metsar te gi ndo sa, a ta ngots ndo metsar, ndo metsar a pilèʼa, a fi skwi a gerziaʼa, tar man a nhul a matsa.

⁸ Aman ta ngatsa ndo metsar ɓai, babgi da zlatsa a sam Bi Zhiklè, a mbèɗè; i ga metsar skwi ndo matsa ɓai.

⁹ Aman a ngu rai, ko zlè, ko kɗèh, ko tambak, ko maslaka, ko skwi ngiɗè man a ze na, a ndo ngiɗè a ngaɗa skwi ga, ta da ma ndohi cèw a sam Bi Zhiklè. Ndo man Zhiklè a ga na kita a gèɗ, da pela na ngiɗè a skwi cèw cèw.

¹⁰ Ndo man a mpa na kɗèh, man ɓai zlè, man ɓai tambak, man ɓai skwi kudom ngiɗè a ndo ngiɗè, aman a wara na, a skwi a metsi na, sak mpasla, a ndo ngiɗè mrka ɓai,

¹¹ ta cèw ta mbèdè a sam Zhiklè, a ndèlèʼa, aman ndo mɓer skwai a ngu ri a skwi nslamagi na ɓai. A bab skwi da nzu mènè, a ndo mɓer skwai a pilè azɓai.

¹² Aman ta cama na skwi a metsar, da pela na bab skwai.

¹³ Aman skwi dak a nco, da ngreda njèkèdiaʼa a skwi malwudai, te deɓaʼa a pil skwi man skwi dak a nco, azɓai.

¹⁴ Aman ndo staɗ a ndzhodo skwi a sam ndo ngiɗè a dua, a sak a mpasl na, a skwi a mʼmets na, bab skwi az a pa bai, sèi a pilèʼa.

¹⁵ Aman bab skwi a zhè a pa, a pilè azbai. Aman ta va na hi a nslembolom, a pilèʼa a skwi nslembelomaʼa.

Nshèshür dam

¹⁶ Ndo man a peda bidali a wai, man nshib na az di bai a mʼmana a vna, da pau skwi ngwoz, da co a ngwoz.

¹⁷ Aman bab nengaʼa a woya a vi azbai, aman skwi ngwoz a pia genè.

Njèjèr ma Zhiklè

¹⁸ Ngwoz man a mbèh skwai, ka jèka na nshèffè bai.

¹⁹ Ndo man a nzi a deɓa a skwi kudom, sèi ta keɗaʼa.

²⁰ Ndo man a pil gèɗ vrai a zhiklè ngiɗè, a Ndo nzi pèc pècèk stadgenè ka ɓai, sèi ta da phomda.

²¹ Ndo mbrok, ka zumda na gèɗ bai, ka ga na matakwan bai, aman zlèzlèa kinè ba kin ndohi mbrokihai te kokwar Egypte.

²² Ngwozi mazihai a wud dikihai, kin zumda ta gèɗ ɓai.

²³ Aman ka da ga ta matakwan, a ta kuɗi a sam ga, i ncinè kuɗ tengaʼa a vava,

²⁴ a i gi ndav, a i bazl kinè a tsakwal, a ngwozi kinè ta ndi a ngwozi mazihai, a wudahi kinè ta ndi a wud dikai.

²⁵ Aman ka va na Suli a dua a ndo Israel staɗ, a ndo ntawassa a tsagi ngaya, ka dzhoɗ skwi a deɓa ɓai. Kin gau a ndo nderkèzha ɓai!

²⁶ Aman ka jhèɗè ndo ngiɗè da va ka maslaka mtasl na a hai, ka da va na a deɓa, ga pats a kèlè.

²⁷ Aman nengaʼa maslaka na stadgenè, a fi a va. A da mènè a mè? Aman a da kuɗi a sam ga, i da cinè kuɗ nengaʼa, aman ndo a siyè te va.

²⁸ Ka durɗo Zhiklè ɓai, ka durɗo bi kokwar ngaya ɓai!

Tsuvom skwai

²⁹ Dau te wov ngaya, iyam nyi wof te duzlak ngaya, mbar te gatsak ngaya, ka ngheda bai! Vay tsuvom ngaya!

³⁰ Lè-mèlèmè a sam zlè a tambak ngaya. Da nza a sam mam na mʼmèn 7; a pats matsamakaɗaʼa ka vayè.

³¹ Sèi kin ndi a ndohi ga nkezlaʼa. Zluèɗ man skwi dak a nkeɗaʼa, kin ndau bai! Va-kalda ta a kdadihai!