Exode 21 - Ma Zhiklè

Ma Zhiklè a géɗ ɓèlè

¹ Na haha ma nkwèrè man ka da ngreda ta:

² Aman ka da shum ɓèl Hebreu, da gu mizlinè mvi 6, ambalai. Te mvi matsaraɗaʼa, da praʼa ambalai.

³ Aman a shkè a géɗ na, da praʼa a géɗ na. Aman a shkè a ngwoz, da pre ta a ngwoz na.

⁴ Aman babgi nengaʼa a mva na ngwoz, a nya na wudahi a dalahai, ngwoz a wudahai, ta a babgi bèlè. A ta pre ɓèlè a géɗ na.

⁵ Aman bèlè a gada: Babgi ga, a ngwoz ga, a wudahi ga, i woya a skwi ga, ka pryè bai,

⁶ babgi nengaʼa da da a sam Zhiklè. Da da a ntamagai, a tsagi ntamagai, a pa babgi nengaʼa da tuma na zlembaɗ a vatak, te deɓaʼa a ndi a ɓèlè a mèdèp.

⁷ Aman ndo ngiɗè a mpreda dem nengaʼa a ma, ta da prè nengaʼa ara ɓèlèlihi ngiɗè ka bai.

⁸ Aman a mʼmana a vna ma, te deɓaʼa ambaha babgi nengaʼa ɓai, sèi a preda ma a sulai. Aman a slaha a mprèʼa a ndohi a dala azbai, te man nzlara ma.

⁹ Aman a da va na kra na, da tsaka na skwi ara dem na.

¹⁰ Aman a da cè ngwoz a vaʼa, da helama na skwa auda a va bai, da jèka na skwi nʼndai, a maslaka, da mana a vna lèmèlèmè ara mpats giɗè.

¹¹ Aman a da gi skwi makar haha azɓai, nengaʼa mpra te ɓèlè ma, ambalai, da pul gèɗ ɓai.

Nkéɗ ndo

¹² Ndo man a tsi ndo ngiɗè, a ndo a mʼmets na, sèi ta keɗaʼa.

¹³ Aman ndo a ga na a ri ara mazlarai, a gu ara skwi Zhiklè, i da ngra ka sam man a slaha a nhi a pa.

¹⁴ Ndo man a gi mali a sam nslamagi na, a nkeɗaʼa a metsar, ka ngazla na auda a sam mvi skwi a Zhiklè, aman ta keɗaʼa.

¹⁵ Ndo man a tsi bab na a mam na, sèi ta keɗaʼa.

¹⁶ Ndo man a gi metsar ndo, ko a preda ma, ko a feda a tsagi nengaʼa, sèi ta keɗaʼa.

¹⁷ Ndo man a derde mam na a bab na, sèi ta keɗaʼa.

Mbèzl va

¹⁸ Aman ndohi cèw ta gi ndzoan, a staɗ a kèl ngiɗè a kwa, a ɗuko a rai, a ndo sa a metsi azɓai, aman a mènèhi a ɗish va,

¹⁹ ta gada na ndo ntsu bai. Aman ngiɗè a slèmbèɗè zaʼa, a ndukè va a gada, sèi ndo ntsau a pil ndo madzaf, a Suli te di mizlinè man a vak auda te pa.

²⁰ Ndo man a tsi ɓèl na, ko nguraʼa ko ngwozaʼa, a gada, a ntsi na a mets na, da ga na kita.

²¹ Aman ta da nzi a nshèffè mʼmèn staɗ, man cèw dai, ta ga na kita azɓai, te man ɓèl na.

²² Aman ndohi ta bèzl va, a ta ga na mblè a va ngwoz man kra tʼhwaɗ, a nengaʼa a mʼmèndè kra aussa, aman skwi ngiɗè a nga ná ɓai, sèi ta pilèʼa a sulai. Skwi man baki ngwoz a woya ndohi kita ta jhèdèʼa a sam ndo ntsau, da vau, te di man a mèndè kra a hai.

²³ Aman skwi ngiɗè a ga na ngwoz a vaʼa, sèi ta pilè te di ndo.

²⁴ Ta pil di a dai, zlèʼèn a zlèʼèn, ri a rai, sak a sak.

²⁵ Mblè vogwa a mblè vogwa, mblè a mblè, vovi mènèwèɗ a vovi mènèwèɗ.

²⁶ Ndo man a tsu ɓèl na a dai, a di a ngedas na, sèi a praʼa a géɗ di na.

²⁷ Aman a ncèma na zlèʼèn auda a ɓèl na, sèi ta praʼa a géɗ zlèʼèn na.

²⁸ Aman zlè a tsi ndo, man bai ngwoz, a drom, a ndo a mʼmets na, sèi ta keɗa zlè a kwa, ta ndi zluèɗèʼa azɓai. Aman ta ga na kita a bab zlè azɓai.

²⁹ Aman zlè a ntsu ndo pèc pècèk, a ta ngra na va a hi a bab zlè, a nengaʼa a mɓür zlè na bai, a zlè a ntsu ndo, man ɓai ngwoz, a ta metsi ta, sèi ta keɗa zlè, a ta keɗa na bab zlè a va.

³⁰ Aman ta jhèdè a mpil gèɗ a sulai, da pul gèɗ na a Suli ngama ngama man ta jhèdèʼa.

³¹ Lèmèlèmè aman zlè a ntsu kra nguraʼa a demaʼa.

³² Aman zlè a ntsu ɓèlè, ko nguraʼa ko ngwozaʼa, bab zlè da pela na bab ɓèlè a gurso 30. Zlè sèi ta kédèʼa a kwa.

³³ Ndo man a mpizlè thal ɓai, ndo man a ri thal, a mpizlè maʼa ɓai, a marai, man ɓai kɗèh, a kèlè a pa,

³⁴ bab ndo nra thal a pilèʼa. A pil bab zlè a sulai, aman skwi mʼmetsaʼa a nengaʼa.

³⁵ Aman zlè ndo staɗ a nkeda zlè ndo ngiɗè, a zlè a mʼmets na, sèi ta preda zlè man a nshèffè dai a ma, a ta kezla suliaʼa. A zlè mʼmetsaʼa ba ta kezlia te va.

³⁶ Aman ndo a suna, a ntsu zlè ngiɗè pèc pècèk, a bab zlè a mɓer skwi na ɓai, da va na zlè te di man a nengaʼa man a mʼmets na. Aman zlè mʼmetsaʼa, a nengaʼa.