Exode 20 - Ma Zhiklè

Ma nkwèr Zhiklè kula

¹ Bi Zhiklè a ngoɗ ma haha tèlèba, a ngaɗa:

² Iyè Ndo nzi pèc pècèk, Zhiklè ngaya, man i cka ka auda te herkeɗa Egypte, te gi ɓèlè ngaya.

³ Ka gu Zhiklè ngiɗè a tsagi ga bai!

⁴ Ka gu vrai a mèzhèb skwai nte zhiklè te géɗèʼa, a mèzhèb skwai nte godok a géɗ herkeda a mèzhèb skwai nte iyam tʼhwaɗ herkeda a sam ngaya bai!

⁵ Ka gurɓa a sam tengaʼa bai, ka tsu ri a tengaʼa bai! Aman iyè Ndo nzi pèc pècèk, Zhiklè ngaya, i Zhiklè i srak, man a gi kita a sam wudahi a géɗ mali bab ta, te verzi bab ta, te mamakaraʼa, te mafadaʼa, a sam tengaʼa man ta gi shèwa a iyè.

⁶ A i va ta pombai a ndohi gozhèm gozhèm kumba, man ta woy iyè a ta gi ara ma ga.

⁷ Ka slefu nzlembaɗ Ndo nzi pèc pècèk, Zhiklè ngaya, ambali bai! Aman Ndo nzi pèc pècèk a jèkeda kita azbai a géɗ nengaʼa man a slefi nzlembaɗ Zhiklè ambalai.

⁸ Hur pats nshèk va, aman ka kezlaʼa, a ka slébèrdèʼa.

⁹ Gu mizlinè mʼmèn 6, a ka ga mizlinè ngaya tèlèba!

¹⁰ Aman pats matsaraɗaʼa, nengaʼa pats nshèk va a sam Ndo nzi pèc pècèk, Zhiklè ngaya. Ka gu mizlinè ɓai, ko kèshkata, ka a kra ngaya, ko demaʼa, a ɓèl ngaya, ko nguraʼa ko ngwozaʼa, ko skwi kuɗomhi ngaya, ko ndo mbrok te ngwi ngaya.

¹¹ Aman te mʼmèn mokwa, Ndo nzi pèc pècèk a ngu giɗfèk a herkeda, a iyam mbiaʼa, a skwi tèlè te pa, a nsok va pats matsaraɗaʼa. Gar haha Ndo nzi pèc pècèk a mpshè na ma pats nshèk va, a nkezlaʼa, a nslébèrdèʼa.

¹² Slubordo bab ngaya a mam ngaya, a nderɗa ka pats nshèffè ngaya man Ndo nzi pèc pècèk a woya a mva ka, a ma ma tʼherkeda.

¹³ Ka kuɗ ndo bai!

¹⁴ Ka gu mphöm ngwoz bai!

¹⁵ Ka gu metsar bai!

¹⁶ Ka tsokol ma a géɗ nslamagi ngaya bai!

¹⁷ Ka gu ntétékè gi nslamagi ngaya bai! Ka gu ntétékè ngwoz nslamagi ngaya bai, ko ɓèl nengaʼa ba, ko nguraʼa ko ngwozaʼa, ko mari nengaʼa ba, ko kɗèh na ba, ko skwi tèlè man nslamagi ngaya a nʼngotso ba.

¹⁸ Aman ndohi Israel ta tsena ntsi iyam, a ta rka ndidiyam, ta tsena tolom, a ta rka za te va vodzok, a ndohi ta gu zlau, ta gudzai, ta zlatsa dra.

¹⁹ A ta gada na Moise: Gaɗka nga ar ka, a nga woy a nga fi zlembaɗ. Zhiklè da gada nga bai, nga da bèzl nga.

²⁰ A Moise a ngaɗa ta ndohai: Kin gu zlau bai, aman Zhiklè a shkè, aman a njkede kinè genè, a zlau Zhiklè a nʼnzi a ndav kinè, a kin da gi mali asaɓai.

²¹ A ndohi ta zlatsa dra, a Moise a nherda na va a vani ngalngalaʼa, man Zhiklè te vaʼa.

Ma Zhiklè a géɗ sam mvi skwi a Zhiklè

²² Ndo nzi pèc pècèk a ngaɗa na Moise: Ka da gada ta ndohi Israel aranta: Kin rka, ara man i gaɗka kinè te zhiklè te gédèʼa.

²³ Kin lèmda skwa a iyè bai; zhiklè verzhègenè a guro kin gu bai!

²⁴ Va-gayè sam mvi skwi a Zhiklè a wujèɗ, a kin ndaray skwai, a kin vay skwai a pombai. Tambakihai a zlèhai. A sam tèlèba man i vau a sam man ta slebardyè a pa, i da shkè a sam ngaya, a i da pshè ka ma.

²⁵ Aman ka woy a ka gi sam mvi skwi a Zhiklè a kwa, ka gu a kwa mpasla bai. Aman ka da pasla a züdo, ka derɗa sam mvi skwi a Zhiklè.

²⁶ Ka gu sam mvi skwi a Zhiklè, aman ka dzuva ɓai; aman ka da tivè a pa, ta da rka verzi ngaya a dala.