Exode 17 - Ma Zhiklè

Iyam a hakaɗauda te za

¹ Te deɓaʼa nhèyè ndohi Israel ta slambaɗa tʼhèshèkèɗ Sin, ara man Ndo nzi pèc pècèk a gada ta, a to do a ma, a ta nza a Rephidim. Aman ta ngatsa iyam nsi bai.

² A ndohi ta ga na ndzoan a Moise, a ta gada: Va nga iyam a nga siaʼa! A Moise a mʼmbeɗa ta a ma: Kin gay ndzoan èhèmè? Kin jkede Ndo nzi pèc pècèk èhèmè?

³ Aman iyam a ndza ta ndohi te pa, ta gu ndav a Moise, a ta gada na: Ka helka nga auda te kokwar Egypte èhèmè, aman nga a wudahi nga a skwihi nga nga bèzl nga a mi iyam?

⁴ A Moise a ntsu rai, a kuɗi a sam Ndo nzi pèc pècèk, a ngaɗa: I da gi ma kè a ndohi haha? Njèkè kètè genè, a ta kalyè a kwa.

⁵ A Ndo nzi pèc pècèk a ngaɗa na Moise: Do a ma ndohai, hul ndohi Israel nhalaʼa mats kata a verzi ngaya, co gada ngaya man ka tsu woyam a vna, a ko do a za Horeb.

⁶ Na haha i woy a i zlècè a pa a ma ngaya. Te pa ka tsi za, a iyam a hakaɗauda, a ndohi a ta siaʼa. A Moise a ngu arsa a sam di ndohi nhalaʼa te Israel.

⁷ A ta baha na samaʼa ‘Massa’, a Mériba, a géɗ man ndohi Israel ta gu ndzoan, a ta jkede Ndo nzi pèc pècèk, a ta gada: Ndo nzi pèc pècèk a zhè a sam nga ɗè, ɗè, azɓi ɗè?

Var a Amalek

⁸ Ndohi Amalek ta shkè a ta gu var a ndohi Israel te Rephidim.

⁹ A Moise a ngaɗa na Josué: Par ta ndohai, ngurhai, aman angoslèm ka da gi var a ndohi Amalek. Iyè i woy a i nzi a géɗ za, a gada Zhiklè te rai.

¹⁰ A Josué a ngau, ara man Moise a gada na: a mdo a nda gi var a ndohi Amalek. A Moise a Aaron a Hur, ta teva a géɗ za.

¹¹ Man ri Moise nzlatseda, Israel a gi ngulaʼa. Aman ri Moise mʼmanda tʼhai, Amalek a gi ngulaʼa.

¹² Aman matèndèzh a nkeda na ri a Moise, ta co kwa, a Moise a nʼnza a pa, a Aaron a Hur ta gsa na ri nengaʼa, staɗ te civèɗ ngiɗè, staɗ te civèɗ ngiɗè. A ri nengaʼa nzlatseda, ha pats nkala.

¹³ A Josué a mbazl ta ndohi Amalek a ndohi var tengaʼa.

¹⁴ A Ndo nzi pèc pècèk a ngaɗa na Moise: Windeda skwi haha a ɗèlèwèr, aman a pca ta a gèɗ azɓai, a ka njè na ma a gèɗ a Josué: I woy a i gi a ta hér Amalek azɓi fèt a géɗ herkeda.

¹⁵ A Moise a nrom sam mvi skwi a Zhiklè, a mbaha na Ndo nzi pèc pècèk, tolom var ga.

¹⁶ Aman a ngaɗa: Tolom var Ndo nzi pèc pècèk te rai! Ndo nzi pèc pècèk a gi var a Amalek, te verzi tèlèba, a dè a ma ma.