Exode 15 - Ma Zhiklè

Dimèsh ngul var

¹ A pats nasa Moise a ndohi Israel ta slu dimèsh a sam Ndo nzi pèc pècèk, aranta: I woy a i sli dimèsh a Ndo nzi pèc pècèk, aman nʼnjèl nengaʼa mbiaʼa. A nkalda plèsh a ndo man a deɓaʼa a va iyam mbiaʼa.

² Ndo nzi pèc pècèk, wuɗi ga, dimèsh nslébèrdè ga, a nde na a skwi mbelyè. Nengaʼa Zhiklè ga, i woy a i shida na géɗ, Zhiklè bab ga, i woy a i nzalaʼa.

³ Ndo nzi pèc pècek, ngul var, nzlembaɗ nengaʼa Ndo nzi pèc pècèk.

⁴ A mwushede ta kiki Pharaon a ndohi var nengaʼa a va iyam mbiaʼa, a nzede ngul ndohi var nengaʼa a hwaɗ iyam mbiaʼa.

⁵ A nsa ta iyam a gèɗ, a ta wusha a hwaɗaʼa ara kwa.

⁶ Ndo nzi pèc pècèk ga, ri mandi ngaya a zhè a wuɗi nʼnzalaʼa. Ndo nzi pèc pècèk ga, ri mandi ngaya a mbazl ta ndohi mayamhai.

⁷ Te nʼnjèl ngaya mbiaʼa ka wushede ta ndohi mayamhai, ka ga ta ndav a gèɗ, a ka ndev ta ma ara düsh pandar.

⁸ Ka vèɗè htsan, a iyam a ngrè, a nzlatsa, ara zlazlar, a iyam a nsassay na te woyam.

⁹ Ndo mayam a gada: I hi a verzi ta, i woy a i gs ta, i ɓicè skwi ta, a ndav ga a mʼmènèhai. I geda ta tsakwal ga, ri ga a gedas ta.

¹⁰ Ka saffeda nshèffè ngaya a pa, a iyam mbiaʼa a mpizl ta a pa. Ta wush ta a hwaɗ iyam, mbiaʼa ara züdo.

¹¹ Te va zhiklèhai, nlèmdè va a ka wa, Ndo nzi pèc pècèk? Nʼnjèl ngaya mbiaʼa, nkezlaʼa, ka wuɗitpa te skwi mbiaʼa man ka giaʼa, te nrkedi ngaya man ka ngreda.

¹² Ka tor ri mandi ngaya, a herkeda a nseɗeka ta a ma.

¹³ Ka de ta ndohi man ka praka ta auda, te pombai, ka de ta a sam nʼnzi ngaya nkezlaʼa a wuɗai.

¹⁴ Ndohi a géɗ herkeda ta tsenaʼa, a ta gudzau. A mpra ta zlau a va ndohi Philistie.

¹⁵ A pats nasa, bihi Edom ta rzl ta, ndohi Moab mbibihiaʼa ta gudzau. A ndohi Canaan a nkalda ta gèɗ a ndav.

¹⁶ Zlau a ndza ta, zlau a nkeda ta va a hai, a géɗ wuɗi ri ngaya, a ngwor ta wofaʼa. A ndohi ngaya ta beza a pa aranta, Ndo nzi pèc pècèk, ndohi man ka ngatska ta auda, ta beza a pa.

¹⁷ Ka de ta a pa, a ka geda ta a géɗ za ngaya, a sam man ka, Ndo nzi pèc pècèk, ka gu a sam nʼnzi ngaya, a sam nkezlaʼa, Ndo nzi pèc pècèk, man ri ngaya a mpau.

¹⁸ Ndo nzi pèc pècèk a gi bai a mèdèp.

¹⁹ Aman plèshi Pharaon a kiki nengaʼa a ndohi a deɓ plèshi to do a pa a ndev iyam mbiaʼa, Ndo nzi pèc pècèk a ngu aman iyam a mpizlè ta ma a pa, aman ndohi Israel tengaʼa ta beza a wyak te ndev iyam ngworaʼa.

²⁰ A Miriam, ngwoz nhadka ma, demam Aaron, a nco ganga, a ngwozi tèlèba to do a verzi nengaʼa, a ta tsi ganga, atagècè.

²¹ A Miriam a mfu dimèsh: Va-sla na dimèsh a Ndo nzi pèc pècèk, aman nʼnjèl nengaʼa mbiaʼa. A nkalda plèsh a ndo plèsh a va iyam mbiaʼa.

Mara

²² A Moise a ngaɗa ta ndohi Israel, aman ta slèmbèɗè a ma iyam mbiaʼa nduzoa, a to do a hèshèkèɗ Shur. A ta dè tʼhèshè-kèɗ mʼmèn 3, a ta ngatsa iyam bai.

²³ A ta shke a sam Mara, a ta slaha ta si iyam bai, wurzkwurzkaʼa holholaʼa. A géɗ nengaʼa ta baha na samaʼa Mara.

²⁴ A ndohi Israel ta ga na ma a va Moise, a ta gada: Nga da si mè?

²⁵ A nengaʼa a kuɗi a sam Ndo nzi pèc pècèk, a Ndo nzi pèc pècèk a ngra na wof. A nkalda a va iyam, a njén haldemdemaʼa. A pa Zhiklè a mva na ma nkwèr a ma kita nengaʼa, a pa a njkede ta ndohai.

²⁶ A ngaɗa: Aman ka jèjèr ma Ndo nzi pèc pècèk, Zhiklè ngaya, a nlèɓèslè, a ka gi skwi nzuraʼa a sam di nengaʼa, a ka jèjèr ma kita nengaʼa, i woy a i zlindaka ka matakwan man i zlinda a sam ndohi Egypte, azbai. Aman iyè, Ndo nzi pèc pècèk, i ndo madzaf ngaya.

²⁷ Te deɓaʼa ta ndikè a Elim. Nlèlè iyam 12 te pa, a wof gangar 70. A ta mana a pa a ma iyam.