Exode 13 - Ma Zhiklè

Tsuvomhi Israel

¹ Te deɓaʼa Ndo nzi pèc pècèk a ngaɗa na Moise:

² Vay tsuvom ndohi Israel tèlèba, skwi nkaldeka ma hai tèlèba, ndohai a skwihai, a ga ga.

³ A Moise a ngaɗa ta ndohai: Va-hur pats man kin shkè auda te kokwar Egypte, te gi ɓèlè. Ndo nzi pèc pècèk a nhelka kinè auda te pa a wuɗi ri nengaʼa. Nga ndi movar man skwi nshégèrè a te di bai, a pats sa.

⁴ A patsna kin dè auda, a ki Abib.

⁵ Aman Ndo nzi pèc pècèk a de kinè a kokwar Canaan, Heth, Amor, Hévi a Jébus, man a mpasla ta a ri a bababhi kinè, a woya a mva ta, kokwar man wa a vongwom a hi te pa, a ki haha, sèi kin da gu ara di skwi nkezlaʼa haha.

⁶ Mʼmèn 7 kin da ndau movar man skwi nshégèrè a te di bai; a pats matsaraɗaʼa, ngolala Ndo nzi pèc pècèk.

⁷ Mʼmèn 7 ta ndi movar man skwi nshégèrè a te di bai; skwi nshégèr movar a woya az a sam kinè bai, a sam man kinè a pa tèlèba.

⁸ A pats nasa kin da ngra ta wudahi kinè, a kin gada ta: Nga giaʼa, a géɗ skwi man Ndo nzi pèc pècèk a gu a sam nga, aman nga jèkede kokwar Egypte.

⁹ Da ga ara wuɗah a deb ri kinè, a medi kinè, aman kin hérèʼa, a ma kita da zhè te ma kinè. Aman Ndo nzi pèc pècèk a nhelka kinè auda te kokwar Egypte a wuɗi ri nengaʼa.

¹⁰ A géɗ nengaʼa sèi kin fi gèɗ a skwi haha, a mvi a mvai, te patsaʼa, te patsaʼa.

¹¹ Aman Ndo nzi pèc pècèk a nda de kinè a kokwar Canaan ma, ara man a mbada ta bababhi kinè, a nda va kinè ma,

¹² kin da va na skwi tèlèba man a shkè auda tʼhwaɗ mam na, tsuvom skwai, a Ndo nzi pèc pècèk. Skwi nkaldeka ma hai a ma ma man kin ngotso, man ngurhiaʼa, a Ndo nzi pèc pècèk.

¹³ Tsuvom kɗèh kin humbèdè a kra tambak. Aman kin woy a kin humbèdè ɓai, va-berɗama na daʼai. Tsuvom ndohai, wud ngurhai, kin humbèɗèʼa arsa.

¹⁴ Aman kra nguraʼa a da dzhaɗ ka pats ngiɗè: Verzi skwi haha a ngra nga mè? Ka da mbeɗa na a ma: Ndo nzi pèc pècèk a nhelka nga auda te kokwar Egypte, te gi ɓèlè, a wuɗi ri nengaʼa.

¹⁵ Aman Pharaon a woya a nva ta civèɗ ɓai, a tsena gèɗ ɓai, Ndo nzi pèc pècèk a mbazl ta tsuvomhi te kokwar Egypte tèlèba, tsuvom ndohai, a tsuvom skwai; gar haha i zla na skwi tèlèba, tsuvom skwai, man ngurhiaʼa, a Ndo nzi pèc pècèk. Tsuvom wud ngurhi ga, i humbèɗèʼa.

¹⁶ Skwi haha da gu ara wuɗah a deɓ ri ngaya, a medi ngaya aman ka hérèʼa, aman Ndo nzi pèc pècèk a nhelka nga auda te kokwar Egypte a wuɗi ri nengaʼa.

Nèʼèn vogwa, a vanai

¹⁷ Aman Pharaon a mva ta civèɗ a ndohai, Zhiklè a mbezde ta a civèɗ kokwar Philistie ɓai; nengaʼa civèɗ ndulaʼa. Aman Zhiklè a nhuro: Gar man ndohi ta da rka var a ma ta, ta da hur te ndav ta: Dara nga min nga a deɓa a kokwar Egypte.

¹⁸ A Zhiklè a nlawade ta ndohi a civèɗ ndraʼa, a hèshèkèɗ, a ma iyam mbiaʼa nduzoa. A ndohi Israel ta jèkede kokwar Egypte, a skwi var a va.

¹⁹ A Moise a nhelda vatasl nckondo Joseph a rai, ara man a nco ma mʼmbèɗè te ri wudahi Israel, a ngaɗa: Zhiklè a da takaha kinè a vava. Te deɓaʼa sèi kin helda vatasl nckondo ga a rai.

²⁰ Te deɓaʼa ta jèkeda Succoth, a ta mana a Etham, a ma hèshèkèɗ.

²¹ A Ndo nzi pèc pècèk a mdo a ma tengaʼa. A pats te va vani njèraʼa, a ngreda ta civèɗ; a vad te va nèʼèn vogwa, a nhela ta sam, a ta slaha ta dè a pats a vad.

²² A vani njèraʼa a pats, a nèʼèn vogwa a vad, a nkazla auda a ma ndohi nhayaʼa bai.