Exode 10 - Ma Zhiklè

Dzarai

¹ Te deɓaʼa Ndo nzi pèc pècèk a ngaɗa na Moise: Do a sam Pharaon, aman i sassaya ndav nengaʼa, a ndav golahi nengaʼa, a i ga ta skwi tsaɗ tsaɗ.

² A ka njè ta wudahi a wud wudahi ngaya, ara man i ga ta matakwan a ndohi Egypte, a ka njè ta skwi man i ga ta, a kin suna, i Ndo nzi pèc pècèk.

³ A Moise a Aaron to do a sam Pharaon a ta gada na: Ndo nzi pèc pècèk, Zhiklè ndohi Hébreu, a gada: Ta ngèmè ka woy a ka manda gèɗ ngaya a hi azɓai a sam ga? Va ta civèɗ a ndohi ga, a ta da slèbèrdyè!

⁴ Aman ka da woya ɓai, a ka va ta civèɗ a ndohi ga azɓai, na haha, angoslèm i preko dzarai a kokwar ngaya.

⁵ Ta da zede gèɗ herkeda, a ka slaha ka rka herkeda ɓai, a njèkèdi skwi man vandzal a njèkaha, dzarai a da ndevda, ta ndi vah wof te dak, a ta nzi kurayaʼa.

⁶ Ta da ndheda va a gi ngaya, a gi golahi ngaya, a gi ndohi Egypte tèlèba, ara man babhi ngaya a bababhi ngaya ta rka zlèzlèa ɓai, daga man ndo a hüno nʼnzi a kokwar Egypte, ha patsna. A njèkeda Pharaon, a ndo na.

⁷ A ndohi mizlinè Pharaon ta gada na Pharaon: Ta ngèmè aman ndo haha a da gedas nga di ba! Va ta civèɗ a ndohai, aman ta zli skwi a Ndo nzi pèc pècèk, Zhiklè tengaʼa. Ka rka ɓi dè? Kokwar Egypte a gédèsh na!

⁸ A ta baha ta nda Moise a Aaron a deɓa a sam Pharaon, a Pharaon a ngaɗa ta: vo-do, va-slobordo Ndo nzi pèc pècèk, Zhiklè kinè! Kin woya te va wa, wa, man a dè?

⁹ A Moise a ngaɗa: Nga woy a nga dè tèlèba, a wudahi ba, a babgihi ba, a wudahi a dalahi nga, a tambakihi nga a zlèhai, nga woy a nga hel ta a ri tèlèba, te man nga da gi ngolala Ndo nzi pèc pècèk.

¹⁰ A nengaʼa a ngaɗa ta: Zhiklè do do a nda kinè; aman i va kinè civèɗ a wudahi kinè tèlè azɓai! Na haha kin hur skwi man ambaɓai.

¹¹ A da gi azɓai! Sèi ngrahiaʼa ta dè, a ta da slèbèrdè Zhiklè kinè, te man kin woy a kin gia arsa. A ta dzam ta auda a sam Pharaon.

¹² A Ndo nzi pèc pècèk a ngaɗa na Moise: Geda ri ngaya a géɗ kokwar Egypte, a dzarai a nslambaɗkaɗa te kokwar Egypte tèlèba, a ta ndi skwi a géɗ herkeda tèlèba, skwi tèlèba man vandzal a jèkaha.

¹³ A Moise a ngeda gada a géɗ kokwar Egypte. A Ndo nzi pèc pècèk a nzlündo kozlar te man a civèɗ mvèng pats, a pats staɗ, a vad staɗ. A prèk kozlar a nslambaɗdekoɗi dzarai.

¹⁴ A dzarai a nshkè a géɗ kokwar Egypte tèlèba, a ta nza a kokwar ndohi Egypte tèlèba, ɗekɗekaʼa. Dzari zlèzlèa a nshkè aranta ɓai, ko pats ngiɗè ba a da shkè arsa azɓai.

¹⁵ A ta tutpa a géɗ herkeda, herkeda a rkè azɓai. A ta ndeda skwi a géɗ herkeda, ko nyi wof a ma tèlèba, skwi tèlèba man vandzal a jèkaha. Te kokwar tèlèba, skwi mɓayaʼa te wof, te dak, azɓai.

¹⁶ A Pharaon a mbaha ta nda Moise a Aaron tsam tsam, a ngaɗa ta: I gu malai a sam Ndo nzi pèc pècèk, Zhiklè kinè, a sam kinè ba.

¹⁷ Va-pray mali ga a za va staɗ, va-tsu ri a Ndo nzi pèc pècèk, Zhiklè kinè, da cèmay skwi ngedassyè a haha auda a tsagai.

¹⁸ A Moise a ndo auda a sam Pharaon, a ntsu ri a Ndo nzi pèc pècèk.

¹⁹ A Ndo nzi pèc pècèk a nʼngwodko kozlar a civèɗ nkèl pats, a ntsakalda dzarai a ma, a nwusheda a woyam mbiaʼa, dzari njèka bai, ko staɗ te kokwar Egypte.

²⁰ Aman Ndo nzi pèc pècèk a nsassaya ndav Pharaon, a Pharaon a mva ta civèɗ a ndohi Israel bai.

Ruva

²¹ A Ndo nzi pèc pècèk a ngaɗa na Moise: Geda ri ngaya a zhiklè, a ruva tèdèdikdikaʼa a nshkè a géɗ kokwar Egypte.

²² À Moise a ngeda ri a zhiklè, a ruva a mshkè a géɗ kokwar Egypte, tèdèdikdikaʼa, mʼmèn makar.

²³ Ndo ngiɗè a rka ngiɗè ɓai, ndo a nslambaɗa auda a sam nʼnzi na ɓai, mʼmèn makar. Aman a sam ndohi Israel, sam nhela, di a rka cerhcerhaʼa.

²⁴ A Pharaon a mbaha na Moise, a ngaɗa: Vo-do, va-slobordo Zhiklè kinè! Sèi tambakihi a zlèhi ta nzi a haha. A wudahi kinè ba, do do a verzi kinè.

²⁵ A Moise a mʼmbeɗa na a ma: Sèi ka ba ka va nga skwi man nga zli a nga ndèra na Ndo nzi pèc pècèk, Zhiklè nga.

²⁶ A skwi kudom ba do do a verzi nga, ko kotèkwèr skwi staɗ a nzi a deɓa azɓai. Sèi nga cè te vaʼa a nga vi a Ndo nzi pèc pècèk, Zhiklè nga. A nga shinè, nga da va na Zhiklè ngama ngama, sèi nga ndikè a samaʼa.

²⁷ Aman Ndo nzi pèc pècèk a nsassaya ndav Pharaon, a Pharaon-a woya a nva ta civèɗ ɓai.

²⁸ A Pharaon a ngaɗa na: Kazlay auda a tsagai! Gu maya a ka da shkè a deɓa a sam ga asaɓai, man bai ta da keɗe ka.

²⁹ A Moise a mʼmbeɗa na a ma: Ara man ka goɗa – i da shkè a deɓa a sam ngaya asaɓai.