Esther 2 - Ma Zhiklè

Esther a shke a gi bai

¹ Te deɓ nengaʼa, aman ndav bi mpkwe na ma, a mhur Vasthi, a skwi man a gau, a skwi man ta goɗ a géɗ nengaʼa.

² A golahi bai ta gaɗa: Sèi ta hassa na dalahi a bai, man ta sun baki di ɓai, man ta hudemshè te dai.

³ Bai da zlündo ndohi sak a kokwar-bi nengaʼa tèlèba, a ta ɓickoɗi bidalihi tèlèba a gi bi Suse, a sam mɓicè-va ngwozai; a Hégai, ntokotasl bai, ndo mɓer ngwozai da ɓer ta, da kezla ta skwi tèlèba man ngwozi ta jèɓèslè va ta a vna.

⁴ Bidali man a da ambaha bai, a ndi a ngwoz bai te di man a Vasthi. Ma haha ambaha bai, a ngu arsa.

⁵ Te gi bi Suse, ndo Juif ngiɗè a zhè, nzlembaɗ na Mardochée, kra Jair, te verzi Shimei, te verzi Kis, ndo Benjamin,

⁶ man ta ckoɗi a verzi ndohi te Jérusalem, te va man Nebucadnetsar, bi Babylone a nhel ta a ɓèlè a nda Jéconia, bi Juda.

⁷ Hadassa – nasa Esther – dem kük na, a gra a gi na, bab na azɓai, mam na azɓai. Demaʼa hondülüfaʼa, nhudemshè te dai. Aman bab na a mam na ta bazl ta, Mardochée a nco a gi na a dem na.

⁸ Aman bai a ngoɗ ma nengaʼa, a ta ɓickodi dalahi kumba a gi bi te Suse, a Hégai a ɓer ta, ta co Esther ba, a ta ckoɗa gi bai; a Hégai, ndo mɓer ngwozai a ɓerèʼa.

⁹ Dem ambaha, a nʼngots pombai a sam na. Tsam tsam a mva na skwi njèɓèslè va, a skwi nʼndi na, a mpa na dalahi mbelaʼa tsaraɗ te gi bai, man ta ga na mizlinè, a mfeda a sam mɓicè-va ngwozai, a sam mbelaʼa, a nda dalahi nengaʼa.

¹⁰ Esther a nʼngra ta verzi ndohi na, a kokwar bab na ɓai, te man Mardochée a njè na ma a gèɗ: ka da ngreda ɓai!

¹¹ A nciɗ sam a nda sam Mardochée a nsawala a ma gi ngwozihai, aman a suna, Esther a nʼnza genè ɗè, ta da gi a vna mè?

Esther a ndi a ngwoz bai

¹² Aman bidalihi ta til va ta ma, ki 12, ara man ngwozi ta til va ta – ki 6 a mbar myrrhe, ki 6 a mbar a ɓurdi ngwozi tsaɗ tsaɗ, bidali staɗ staɗ tèlèba a nʼngots civèɗ a ndè a sam bi Assuérus.

¹³ Demaʼa a mshkè a sam bai; a skwi mèmè man demaʼa a woyaʼa te gi ngwozai, a ndè a sam bai, ta va na.

¹⁴ A dakwaɗ a dè a gi bai, a prèk a shkè a deɓa a gi ngwozihai, a gi ngiɗè, man Shaashgaz, ntokotasl bai, ndo mɓer ngwozi bai a ɓerèʼa. Te pa a dè a deɓaʼa a sam bi azɓai, sèi man bi a woyaʼa, a baha na.

¹⁵ Aman pats a mshkè, aman Esther, dem Abichail, kük Mardochée, man a gre te gi na, a dè a sam bai, a ndzhaɗa skwi ngiɗè ɓai, sèi skwi man Hégai, ntokotasl bai, ndo mɓer ngwozai, a ngra na. Ndohi tèlèba man ta rka Esther, ta wuffè a géɗ nengaʼa.

¹⁶ A pats man ta da Esther a sam bi Assuérus, a gi bai, ki makulaʼa, ki Tébeth, te ngi bi nengaʼa mvi matsaraɗaʼa.

¹⁷ A bai a woya Esther a fena ngwozi ngiɗè tèlèba, a nʼngots pombai, nuba na zhè a fena bidali ngiɗè tèlèba. A mpaɗa na mpèɗè gèɗ bai a gèɗ, a ngaʼa a ngwoz bai te di man a Vasthi.

¹⁸ A bai a ngu skwi nʼndi ngolala mbiaʼa, a nda tsuvomhi a ndohi mizlinè nengaʼa tèlèba: ngolala Esther. Kokwar tèlèba a nʼngots nshèk va pats staɗ, a bai a mva ta skwi mbalai.

Mardochée a mbel nshèffè bai

¹⁹ Aman dalahi ta ɓicko va macecèwaʼa, Mardochée a nʼnza a ntamagi bai.

²⁰ Esther a nʼngra ta verzi nengaʼa a kokwar bab na ɓai, ara man Mardochée a njè na a gèɗ; a nfu gèɗ a ma Mardochée, ara pats man a nza te gi na.

²¹ A pats nasa Mar-dochée a nʼnza a ma gi bai. Bigthan a Théresh, ntokotasl bihi cèw, ndohi mɓer ntamagi bai, ta gu ndav, a ta woy a ta keɗa bi Assuérus.

²² Aman Mardochée a ntsenaʼa, a nʼngra na Esther, ngwoz bai, a Esther a nʼngra na bai, a nslefu nzlembaɗ Mardochée.

²³ Aman ta njunjor ma haha, ta ngots arsa, a ta mana teɓa a daʼai ndohi cèw sa, a ta ktsal ta a wof. A ma haha ta Windo a ɗèlèwèr bai, a sam di bai.