Esdras 9 - Ma Zhiklè

Ndohi Israel ta hil dalahi nte deɓa a ngwoz

¹ Aman ta gu skwi haha tèlèba ma, mbibihiaʼa ta shkè a sam ga, a ta gaɗa: Ndohi Israel, ndohi mvi skwi a Zhiklè a ndohi Lévi, ta kezla va auda a sam ndohi nte deɓa ɓai; ta mbèh skwi tengaʼa, skwi mʼmbèh skwi Canaan, Heth, Phérez, Jébus Ammon, Moab, Egypte a Amor.

² Ta hul te va dalahi tengaʼa a ngwozi ta, a ngwozi wudahi ta, a verzi ndohi Zhiklè nkezlaʼa ndzakaɓa a ndohi nte deɓa. Tsuvom ndohai a ndohi kita ta hüno mali sa.

³ Aman i tsena ma haha, i kuratsa maslaka ga a dawar ga, i peda ri a gèɗ, a i taɓatsa ma, a i nzahi a ndav.

⁴ Ta tèlèba man ta gi zlau ma Zhiklè Israel, a géɗ mali man ndohi ta gau, man ta shke a deɓa te ɓèlè, ta ɓicko va a sam ga; a i nza a ndav, ha ta ndara na skwi a Zhiklè a dakwaɗ.

Esdras a kuɗi a sam Zhiklè

⁵ A dakwaɗ, man ta ndara na skwi a Zhiklè, i slambaɗa a hori a dai, a maslaka nkuratsa a va, a dawar nkuratsa a va, a i gurɓahai a i peda ri a Ndo nzi pèc pècèk, Zhiklè ga,

⁶ a i gaɗa: Zhiklè ga, hori a dzay kumba, hori a keɗyè a vèvèd; i slaha a i pi di a zhiklè ɓai, Zhiklè ga! Skwi ambaɓiaʼa man nga gau a nge na a mbiaʼa a sam nga. Mali nga a ngre na a ma ma, ha a ndikè a géɗèʼa.

⁷ Daga babhi nga, ha mshkè na mpatsna, mali nga mbiaʼa, a géɗ mphömè nga man nga gau, ka pe nga a ri bihi herkeda, a ma tsakwal, a dangai, a ɓèlè, a ri metsarhai, nga a bihi nga, a ndohi mvi skwi a Zhiklè nga; a nga zhè a hori a dai a patsna.

⁸ Nʼnzi a zhè kètè, Ndo nzi pèc pècèk, Zhiklè nga a va nga pombai, a mʼmbel nga njèkèdi ndohi man ta menkaɗ ta a deɓa te ɓèlè, a va nga nshèk va a sam nengaʼa nkezlaʼa, a nciɗa nga dai, a nga ngaha pa kètè te ɓèlè.

⁹ Ko nga te ɓèlè, nga pca na a gèɗ ɓai, a Zhiklè a mva nga pombai a sam bihi Perse, a mʼmendaka nga nshèffè a pa, aman nga rèm gi Zhiklè nga zaʼa, a nga til skwi mʼmbeɗa sa, a nga gi zlazlar te Juda, te Jérusalem.

¹⁰ Anai Zhiklè nga, nga da gèɗ ma kè te deɓ skwi haha tèlèba? Nga jèkeda ma nkwèr ngaya,

¹¹ man ka va ta ndohi nhadka ma, ɓèlèlihi ngaya, a ka gaɗa ta: Kokwar man kin da dè a pa, a kin kwè-rèʼa, kokwar mphomaʼa. Ndohi nte deɓa ta ga a kokwar mphomaʼa a mʼmbèh skwi tengaʼa, ta ndhaʼa a mali ta, a hünko te verzi ngiɗè a ndè a verzi ngiɗè.

¹² Gar haha kin va ta dalahi kinè a ngwoz a wudahi tengaʼa ɓai, kin woy dalahi tengaʼa a ngwoz a wudahi kinè ɓai. Kin derzla va a tengaʼa ɓai a mèdèp, kin woy skwi mèshèlè tengaʼa ɓai! A kin ngècè wuɗai, a kin ndi skwi nʼndi mbelaʼa te pa, a wudahi kinè ta ndi kokwaraʼa a mèdèp.

¹³ A géɗ skwi tèlèba man a shkè a géɗ nga, a géɗ skwi man ambaɓai man nga gau, a géɗ mali nga mbiaʼa, ka Zhiklè nga, ka ga nga kita mbiaʼa ara mali nga ɓai, a ka jèka nga ndohi haha man ta menkada deɓa te ɓèlè.

¹⁴ A nga za kwola ma nkwèr ngaya, a nga hil ngwozi te va ndohi man ta mbèh skwi ambaɓiaʼa aranta dè? Ar ka gi ndav a géɗ nga a ka zede nga a mèdèp, a ka jèkè ndo azɓai, ko staɗ, ka ɓi dè?

¹⁵ Ndo nzi pèc pècèk, Zhiklè Israel, ka nzuraʼa, nga ndohi kèshkata man nga mbel nga genè. Na haha nga zhè a sam di ngaya te mali nga, nga slaha nga zlècè a sam ngaya azɓai.